فۋتبولدان قازاقستان قۇراماسى رەسەيمەن تەڭ وينادى

استانا. 1 ءساۋىر. بۇگىن, ناۋرىزدىڭ 31-نەن ءساۋىردىڭ 1-نە قاراعان ءتۇنى فۋتبولدان قازاقستان ۇلتتىق قۇراماسى ماسكەۋ تۇبىندەگى حيمكي قالاسىندا  رەسەيدىڭ باس كومانداسىمەن جولداستىق كەزدەسۋ وتكىزىپ, 0:0 ەسەبىمەن تەڭ وينادى. بۇل تۋرالى egemen.kz حابارلادى. ويىن ورتاشا دەڭگەيدە ءوتتى. الاڭدا جان بەرىپ, جان الىسقان تارتىس كورىنبەدى. ايتكەنمەن, ءبىزدىڭ قۇراما ويىنشىلارى مۇنىڭ الدىنداعى يسلانديامەن كەزدەسۋگە قاراعاندا, ءسوز جوق, بۇل جولى ءبىرشاما ءتاۋىر ويىن كورسەتتى. اسىرەسە, باۋىرجان يسلامحان مەن ۇلان قونىسباەۆ بەلسەندىلىكتەرىمەن ەرەكشە كوزگە ءتۇستى. وسى جەردە ايتا كەتەتىن ءجايت, بۇدان ءۇش كۇن بۇرىن ءبىز باۋىرجاننىڭ يسلانديامەن وتكەن ويىنداعى جانكەشتىلىگىنە دە ءتانتى بولعان ەدىك. ماتچ بارىسىندا قاقپاشى ستانيسلاۆ پوكاتيلوۆ ەرەكشە شەبەرلىگىمەن كوزگە ءتۇستى. ول وسى جولى ۇلتتىق قۇراما ساپىندا ستارتتىق قۇرامدا الاڭعا العاش رەت شىعىپ وتىرعانىنا قاراماستان, بىرنەشە رەت شەبەر ويىن ورنەگىن كورسەتىپ, قارسىلاستاردىڭ ايتارلىقتاي قاۋىپتى سوققىلارىنا توسقاۋىل بولا ءبىلدى. بۇدان بولەك, گەورگي جۋكوۆ تا ءبىرىنشى رەت ۇلتتىق قۇرامانىڭ نامىسىن قورعاعانىن ايتا كەتۋىمىز كەرەك. كەزدەسۋدىڭ ءبىرىنشى بولىگىندە الاڭ يەلەرىنىڭ ەسەپ اشاتىن ءبىراز مۇمكىندىكتەرى بولدى. سونىڭ بىرىندە ايىپ سوققىسىن ورىنداعان الەكساندر سامەدوۆتىڭ اياعىنان ۇشقان دوپتى قاقپا ماڭدايشاسىنا ءتيىپ, كەرى قايتتى. ال ەكىنشى تايمدا ءبىزدىڭ ويىنشىلار بەلسەندىلىك كورسەتتى. ولار ويىن بارىسىندا ءۇش بىردەي مۇمكىندىكتى ءمۇلت جىبەرىپ الدى. الدىمەن يسلامحان قاقپاشىمەن بەتپە-بەت شىعىپ, دوپتى قيىس تەپسە, توقتار جاڭعىلىشباي ەكى مارتە بوس قاقپانى كوزدەي العان جوق. وسى رەتتە كوماندادا شابۋىلعا نۇكتە قويا الاتىن ويىنشىنىڭ جەتىسپەيتىنى انىق بايقالادى. جالپى, ماتچ كەزىندە رەسەيدىڭ سونشالىقتى وتكىر شابۋىلدارىن كورە المادىق. الاڭ يەلەرىنىڭ باس باپكەرى فابيو كاپەللو سوندىقتان التى ويىنشىسىن الماستىرىپ, ويىندى قىزدىرۋعا كۇش سالىپ باقتى. بىراق كوزدەگەن ماقساتىنا جەتە المادى. ال قازاقستاندىقتاردىڭ باس جاتتىقتىرۋشىسى يۋري كراسنوجان ءتورت ويىنشىنى عانا تىڭنان قوستى. اينالىپ كەلگەندە, ەكى جاقتان دا ەرەكشە ءبىر گول سوعاتىن مۇمكىندىكتەر بولا قويماعان كەزدەسۋ اقىرى ەسەپ اشىلماعان كۇيى اياقتالدى. ەلامان قوڭىر. دەرەك: egemen.kz. سۋرەت: khabar.kz.   رەسەي – قازاقستان 0:0 31 ناۋرىز. حيمكي. «حيمكي-ارەنا» ستاديونى. 9 500 كورەرمەن. تورەشى: الەكسەي كۋلباكوۆ (بەلارۋس). رەسەي: يۋري لودىگين, گەورگي ششەننيكوۆ (ەلمير نابيۋللين 71), ۆاسيلي بەرەزۋتسكي (رومان زوبنين 22), الەكسەي كوزلوۆ, يۆان نوۆوسەلتسەۆ, رۋسلان كامبولوۆ, دميتري توربينسكي (دەنيس داۆىدوۆ 63), الەكساندر ريازانتسەۆ (ماگومەد وزدوەۆ 46), الەكساندر سامەدوۆ, ارتەم دزيۋبا (يگور پورتنياگين 46), ماكسيم كانۋننيكوۆ (دميتري ەفرەموۆ 80). قازاقستان: ستانيسلاۆ پوكاتيلوۆ, مارك گۋرمان, سەرگەي مالىي, سامات سماقوۆ, دميتري شومكو, كونستانتين ەنگەل, باۋىرجان يسلامحان, يۋري لوگۆينەنكو, ۇلان قونىسباەۆ (جاقىپ قوجامبەردى 77), گەورگي جۋكوۆ (ابزال بەيسەبەكوۆ 86), باۋىرجان جولشيەۆ (توقتار جاڭعىلىشباي 43, الەكسەي ششەتكين 82). ەسكەرتۋ: باۋىرجان جولشيەۆ 17.