«اگروماشحولدينگ» پەن «سارىارقااۆتوپروم» زاۋىتتارىنىڭ ءوندىرىس الاڭىندا قازاقستانداعى ماشينا جاساۋ ءىسىنىڭ كەزەكتى ءبىر سالتاناتى وتكەندەي اسەر قالدى. ەلباسى نۇرسۇلتان نازارباەۆتىڭ باستاماسىمەن ومىرگە جولداما العان «قازاقستاندا جاسالعان» اكتسياسى وتاندىق ءوندىرىستەگى ونىمدەردى قولداۋ جانە قارقىندى دامىتۋدى مۇرات تۇتقان بولاتىن. اكتسياعا رەسپۋبليكا ۇلتتىق ەكونوميكا ۆيتسە-مينيسترى تيمۋر جاقسىلىقوۆ, الماتى قالاسى اكىمىنىڭ ورىنباسارى يۋري يلين, ينۆەستيتسيالار ءجانە دامۋ مينيسترلىگى مەن قارجى مينيسترلىگىنىڭ, الماتى قالاسى ىشكى ىستەر دەپارتامەنتى, اقمولا, الماتى جانە قوستاناي وبلىستارى اكىمدىكتەرىنىڭ, سونىمەن قاتار, ءىرى بيزنەس قۇرىلىمدارىنىڭ وكىلدەرى قاتىستى.
«اگروماشحولدينگ» جانە «سارىارقااۆتوپروم» زاۋىتتارىنداعى الەمدىك برەندتەر Ssang Yong پەن Toyoto جۇردەك اۆتوموبيلدەرى, IVEGO جۇك ماشيناسى قۇراستىرىلىپ جاتقان تسەحتاردى ارالاپ كورۋدىڭ ءوزى تۋريزم قىزىعىنان كەم ەمەس. تازالىعىنان شىبىن تايىپ جىعىلاتىن تسەحتاردا ماشينا قۇراستىرۋشىلار زەرگەرلەردەي جۇمىس ىستەپ جاتىر. زاۋىتتار باسشىلارى الەكسەي سيدورەنكو مەن اندرەي لاۆرەنتەۆ اتشاپتىرىم تسەحتاردى قوناقتارعا ارالاتا ءجۇرىپ, تولىق وندىرىستىك ۇدەرىس, سونىڭ ىشىندە ءبارى دەرلىك روبوتتالعان اۆتوموبيل شاناعىن دانەكەرلەۋ جانە بوياۋ, شاناق پەن رامانى جالعاۋ ۇدەرىسى, بارلىق كەزەڭدەر مەن ءاربىر جەلى جۇمىسىنىڭ ناتيجەسى رەتىندە كاسىپورىننىڭ دايىن ءونىمىن اكتسياعا قاتىسۋشىلاردىڭ نازارىنا ۇسىندى. بۇگىنگى كۇنى «اگروماشحولدينگ» پەن «سارىارقااۆتوپروم» وندىرىستىك الاڭدارىندا وندىرىلگەن اۆتوموبيلدەردىڭ بارلىق مودەلدەر قاتارى 7 برەندتىڭ 43 ۇلگىسىن قۇرايدى.
وندىرىستىك كورمەدە استانانىڭ كولىك ينفراقۇرىلىمىندا قازىردىڭ وزىندە بەلسەندى قولدانىلاتىن Iveco Citelis اۆتوبۋسىن اكتسيا قوناقتارىنا كورسەتتى.
– فرانتسيادان 358 اۆتوبۋس الۋعا كەلىسىمشارت بولعان ەدى, سونىڭ قازىردىڭ وزىندە 128-ءى الىندى. جىلدىڭ ورتاسىنا دەيىن قالعانى دا جەتكىزىلەدى. قالالىقتار ريزا, وتە قولايلى, ءىشى كەڭ اۆتوبۋس. استانادا ەكسپو-2017 كورمەسى وتەتىن ۋاقىتقا دەيىن ەسكى اۆتوبۋستاردىڭ بارلىعى دا جاڭارتىلادى دەگەن جوسپارىمىز بار. ءدال ىرگەمىزدە وسىنداي ساپالى اۆتوبۋستار قۇراستىرىلىپ جاتقاندا, ونىڭ مۇمكىن بولارىنا سەنىمدىمىز, – دەيدى استانا قالالىق كاسىپكەرلىك جانە ونەركاسىپ باسقارماسىنىڭ باسشىسى ماليكە بەكتۇروۆا.
«اگروماشحولدينگ» پەن «سارىارقااۆتوپروم» زاۋىتتارىندا وندىرىلگەن ماشينالار راحاتىن كورىپ وتىرعان تەك استانالىقتار عانا ەمەس, الماتى وبلىسى توتەنشە جاعدايلار دەپارتامەنتى وتكەن جىلى قوستانايدان IVEGO ماركاسىمەن شىققان ءورت سوندىرەتىن ماشينانىڭ 24-ءىن ءبىر-اق العان.
– بۇل ماشينانىڭ بۇرىنعى ءورت سوندىرەتىن ماشينالارعا قاراعاندا ارتىقشىلىعى مول. ەڭ باستىسى, مۇندا ورتكە شاشاتىن 3 توننا سۋ مەن ۇيلەردىڭ 5-ءشى قاباتىنا دەيىن جەتەتىن اۆتوساتى ءبىر ماشينادا ورنالاستىرىلعان. ال بۇرىن سۋدى ءبىر ماشينا, اۆتوساتىنى ەكىنشى ماشينا تاسىپ جۇرەتىن ەدى, – دەيدى الماتى وبلىستىق توتەنشە جاعدايلار دەپارتامەنتى ءورت ءسوندىرۋ جانە اۆاريالىق جۇمىستار قىزمەتى مەملەكەتتىك مەكەمەسى باستىعىنىڭ ورىنباسارى دانيار ىسقاقوۆ.
جينالعاندارعا زاۋىت اۋلاسىندا ورتەنگەن ماشينانى ءسوندىرۋ جۇمىسى دا كورسەتىلدى. IVEGO جۇك ماشيناسى نەگىزىندە «اگروماشحولدينگ», «سارىارقااۆتوپروم» زاۋىتتارىنىڭ ءوندىرىس الاڭىنان بەنزين, قوقىس, تسەمەنت تاسيتىن ماشينالار, «جەدەل جاردەم» ماشيناسى قۇراستىرىلىپ جاتىر. ولاردىڭ قۇراستىرۋ ۇدەرىسىنىڭ 30-38 پايىزى قازاقستاندىق مازمۇنعا يە. ءتىپتى, «جەدەل جاردەم», انىعىراق ايتساق رەانيموبيل ماشيناسىن جاساعاندا قازاقستاندىق مازمۇن 70 پايىزدى قۇرايدى. بۇل دا ءوز ەلىمىزدىڭ دەنساۋلىق ساقتاۋ سالاسىنا وتە قاجەتتى زاماناۋي جابدىقتىڭ بىرىنە اينالعان. «قازاقستاندا جاسالعان» دەگەن ماركامەن اۆتوموبيلدەر كورمەسىندە بولعان قر ۇلتتىق ەكونوميكا ۆيتسە-ءمينيسترى تيمۋر جاقسىلىقوۆ ونىڭ سوڭعى كەلىپ كەتكەن ۋاقىتتان بەرى زاۋىتتا بولعان ۇلكەن وزگەرىستەرگە تاڭ قالعانىن جاسىرعان جوق.
– مەن زاۋىتتا 5 جىل بۇرىن بولعانمىن. سول كەزدە مۇندا اۆتوموبيلدەر تەك ءىرى توراپ ءادىسى بويىنشا عانا قۇراستىرىلعان. ال بۇگىن بۇكىل ەل مۇنداي ءوندىرىستىڭ اۋقىمدىلىعىن, وسىنداي زاۋىت جابدىعىن, جاڭا ءوندىرىس دەڭگەيىن مەڭگەرىپ العان ماماندارعا ريزا بولاسىڭ. ولار قۇراستىرىپ جاتقان ءمىنسىز اۆتوموبيلدەردى «قازاقستاندا جاسالعان» دەپ ماقتانا ايتامىز, – دەدى تيمۋر جاقسىلىقوۆ. سونىمەن قاتار, ەكونوميكا ۆيتسە-ءمينيسترى ماشينا وندىرىسىندەگى قازاقستاندىق مازمۇنعا جوعارى باعا بەردى.
– قازاقستاندىق مازمۇن دەگەنىمىز, ول قۇراستىرىلعان ماشينانىڭ وزىندىك قۇنىنىڭ ەداۋىر بولىگى ءوزىمىزدىڭ ينجەنەرلەردىڭ, جۇمىسشىلاردىڭ, جوبالاۋشىلاردىڭ ەڭبەگىنەن تۇرادى دەگەن ءسوز. قوستانايلىق ماشينا جاساۋشىلار ونىڭ كولەمىن بىرتە-بىرتە ۇلعايتىپ كەلەدى. بۇل دەگەنىمىز – قازاقستاندا قالاتىن قارجى, جۇمىس ورنى, جالپى تۇرعىنداردىڭ الەۋمەتتىك جاعدايىنىڭ كوتەرىلۋى, ەڭبەكاقى دەگەن ءسوز. بۇل اكتسيانى وتكىزۋ سەبەبىمىز قازاقستاندىق يندۋستريانىڭ مۇمكىندىگى مەن بولاشاعىن پاش ەتۋ بولاتىن, – دەدى تيمۋر جاقسىلىقوۆ. اكتسياعا قاتىسۋشىلار زاۋىت اۋلاسىنداعى جاڭا اۋىل شارۋاشىلىعى تەحنيكالارىنىڭ كورمەسىن دە تاماشالادى. استىق جينايتىن كومبايندارعا سۇرانىم جوعارى. ولاردىڭ 44 پايىزى ساتىلدى.
قارجى-ەكونوميكالىق داعدارىس دۇنيەنى شىرماعانىمەن قازاقستاندىق ءوندىرىس قادامى كىبىرتىكتەمەيدى. مەملەكەت وتاندىق وندىرۋشىلەرگە قولداۋ ءبىلدىرىپ وتىر. جاقىندا ماشينا جاساۋ ءوندىرىسى ءۇشىن 20 ميلليارد تەڭگە بولىنەتىنى جونىندە شەشىم قابىلداندى. ونىڭ 5 ميلليارد تەڭگەسى ليزينگ باعدارلاماسى ءۇشىن جۇمسالسا, قالعان 15 ميلليارد تەڭگە تۇتىنۋشىلار سۇرانىسىن قولدايتىن بولادى.
AllurGroup اۆتوموبيل كومپانياسىنىڭ پرەزيدەنتى, «اگروماشحولدينگ» ديرەكتورلار كەڭەسىنىڭ مۇشەسى اندرەي لاۆرەنتەۆ قازاقستانداعى ءونىم وندىرۋشىلەردى قولداۋ مەملەكەتتىك باعدارلامالارى ءوندىرىستى كەڭەيتۋگە جانە تۇتىنۋشىلار ءۇشىن باعانى دا تومەندەتۋگە مۇمكىندىك جاسايتىنىن ايتتى.
– ەلباسى ەلىمىزدەگى بارلىق وندىرىسشىلەرگە وزىندىك قۇندى تومەندەتۋگە, سول ارقىلى باعانى كەمىتۋگە شاقىرعان بولاتىن. وعان ءبىز اۆتوموبيلشىلەر تەك قازاقستاندىق مازمۇندى ۇلعايتۋ ارقىلى قول جەتكىزەتىن بولامىز. مىسالى, قازىر قازاقستاندىق مازمۇن 40 پايىزدىڭ ۇستىندە. الداعى 3-4 جىلدا ول 50 پايىزدان اساتىن بولادى. مىنە, وسىلاي بولعاندا باعا دا ارزاندايدى, تابىس تا مولايادى, – دەدى اندرەي لاۆرەنتەۆ.
«نۇرلى جول» جاڭا ەكونوميكالىق ساياسات شەڭبەرىندە قازاقستاندىقتارعا وتاندىق ءونىمدى دارىپتەۋ «قازاقستاندا جاسالعان» اكتسياسى وسىلاي باستاۋ الدى. ءوز ەلىمىزدە جاسالعان ءونىمدى ءوزىمىز تۇتىنامىز. «ءوز ماڭداي تەرىڭمەن تاپقان نان ءدامدى» دەيدى حالقىمىز. قازاقستاندا جاسالعان ماشينا دا وزگەنىكىنەن كەم ەمەس, قايتا ارتىق. سەبەبى, ول قازاقستاندا جاسالعان!
ءنازيرا جارىمبەتوۆا,
«ەگەمەن قازاقستان».
قوستاناي.
