باراك وباما 2014 جىلعى تابىسى تۋرالى ەسەپ بەردى

استانا. 16 مامىر. كەشە اقش پرەزيدەنتىنىڭ رەزيدەنتسياسى – اق ءۇيدىڭ رەسمي سايتىندا باراك وبامانىڭ 2014 جىلعى تابىسى تۋرالى ەسەبى جاريالاندى. 9 بەتتەن تۇراتىن قۇجاتتا مەملەكەت باسشىسى مەن ونىڭ وتباسىنىڭ قارجىلىق جاعدايى 1,9 ملن. دوللاردان 6,9 ملن.-عا دەيىن باعالانعان. بۇل تۋرالى gazeta.ru حابارلادى. اتالعان مالىمەت پرەزيدەنت پەن ونىڭ وتباسىنىڭ جەكە باعاۋلارى جانە ەسەپتەۋلەرىنە سۇيەنە وتىرىپ جاسالعان. سوعان سايكەس باراك وباما وزدەرىنىڭ قارجىلىق جاعدايىن جاريالادى. ونىڭ داۋلەتىنىڭ باسىم بولىگى ەلدىڭ قارجى مينيسترلىگىنە تيەسىلى بورىش قاعازدارىنا جۇمسالعان. بۇل قاعازدارعا 1 ملن-نان 5 ملن. دوللارعا دەيىن سالىنعان ەكەن. ال 250 مىڭنان 500 مىڭ دوللارعا دەيىنگى قارجى وزگە مەرزىمدەردە وتەلەتىن بورىشتىق قاعازدارعا بولىنگەن. سونىمەن قاتار, JP Morgan Chase بانكىندەگى پرەزيدەنتتىڭ ەسەپشوتىندا 50 مىڭنان 100 مىڭعا, ال Northern Trust بانكىندە 15 مىڭ دوللارعا دەيىن اقشاسى جاتىر. ودان بولەك, ميشەل مەن باراك وبامانىڭ Vanguard زەينەتاقى جيناقتاۋ قورىندا 100 مىڭنان 250 مىڭ كولەمىندە قارجىسى بار. ەرلى-زايىپتى وبامالاردىڭ وتكەن جىلداعى كىرىسى 477 383 دوللاردى قۇراعان. بۇل الدىڭعى جىلمەن سالىستىرعاندا 3 715-كە كەم. فەدەرالدىق سالىق رەتىندە پرەزيدەنت پەن ءبىرىنشى حانىم 93 مىڭ دوللار تولەگەن. اقش پرەزيدەنتى جىل سايىن 400 مىڭ دوللار كولەمىندە جالاقى الاتىنىن ايتا كەتەيىك. ەلامان قوڭىر. دەرەك: gazeta.ru. سۋرەت: etoday.ru.