بوستون وقيعاسىنا قاتىسى بار وتانداستارىمىزدىڭ سوتى ماۋسىمدا وتەدى

استانا. 16 مامىر. سىرتقى ىستەر مينيسترلىگى بوستون لاڭكەستىگىنە قاتىسى بار دەپ ايىپتالعان قازاقستان ازاماتتارى – دياس قادىرباەۆ پەن ازامات تاجاياقوۆ جونىندە رەسمي اقپارات تاراتتى. بۇل تۋرالى tengrinews.kz حابارلادى. اتالعان مينيسترلىكتىڭ حابارلاۋىنشا, وتانداستارىمىزعا قاتىستى سوت وتىرىسى 2 جانە 5 ماۋسىمدا وتەدى. ايتا كەتەيىك, لاڭكەستىكتى ۇيىمداستىردى دەپ ايىپتالعان دجوحار تسارناەۆ ءولىم جازاسىنا كەسىلدى. ۆەدومستۆو تاراتقان حابارلامادا: «سىرتقى ىستەر مينيسترلىگى بوستون القابيلەر سوتىنىڭ دجوحار تسارناەۆقا قاتىستى ۇكىمىنەن حاباردار. جاعدايدىڭ ءارى قاراي قالاي ءوربيتىنى باستى نازاردا بولماق. ەلىمىزدىڭ نيۋ-يوركتاعى باس كونسۋلدىعى ايىپتالۋشى قازاقستان ازاماتتارىنىڭ اتا-انالارى جانە ادۆوكاتتارىمەن ۇنەمى بايلانىسىپ وتىر. سونداي-اق, بارلىق قاجەتتى قۇقىقتىق كومەكتى كورسەتۋدە», – دەلىنگەن. ەستەرىڭىزگە سالا كەتەيىك, اعايىندى تامەرلان جانە دجوحار تسارناەۆتار 2013 جىلدىڭ ءساۋىر ايىندا ءداستۇرلى بوستون مارافونى كەزىندە جارىلىس ۇيىمداستىردى. ناتيجەسىندە 3 ادام قازا تاۋىپ, 264-ءى ءارتۇرلى دەڭگەيدەگى جاراقات الدى. ۇستاۋ وپەراتسياسى كەزىندە تامەرلان تسارناەۆ قازا تاۋىپ, دجوحار قولعا ءتۇستى. وسى جىلدىڭ ءساۋىر ايىندا القابيلەر سوتى ۇزاق كەڭەستەن كەيىن دجوحار تسارناەۆتى وعان تاعىلعان ايىپتاردىڭ 30 پۋنكتى بويىنشا ايىپتى دەپ تاپتى. ناتيجەسىندە ونى ءولىم جازاسىنا كەسۋ تۋرالى ۇكىم شىقتى. ال قادىرباەۆ پەن تاجاياقوۆقا ايعاق زاتتاردى جويدى دەگەن ايىپ تاعىلۋدا. ەلامان قوڭىر. دەرەك: tengrinews.kz. سۋرەت: reuters.com.