حالىق سايلاۋعا قاتىسۋعا دايىن

پرەزيدەنت سايلاۋى الدىندا الەۋمەتتىك زەرتتەۋلەر ۇيىمدارى دا بەلسەندىلىكتەرىن ارتتىرۋدا. وسىعان دەيىن «الەۋمەتتىك زەرتتەۋلەر ينستيتۋتىنىڭ» جۇمىسى تۋرالى جازعان بولساق, ەندى «دەموكراتيا ينستيتۋتى» دا الدىمىزداعى سايلاۋعا قاتىستى ءوزىنىڭ العاشقى بولجامدارىن جاريالادى. كەشە وسى ينستيتۋتتىڭ ديرەكتورى يۋليا كۋچينسكايا جۋرناليستەرگە بريفينگ بەرىپ, حالىقتىڭ ەلەكتورالدى بەلسەندىلىگى بو­يىنشا جۇرگىزىلگەن العاشقى ساۋالدامانىڭ قورىتىندىسىن ايتتى. ءبىز ءوز جۇمىسىمىزدى «قازاقستاننىڭ ازاماتتىق اليانسى» ۇيىمىمەن بىرلەسىپ جۇرگىزەمىز. وسى ۇيىمنىڭ تاپسىرماسىمەن قازاقستاندىقتاردىڭ 15 جانە 25 ناۋرىز ارالىعىنداعى سايلاۋعا قاتىستى بەلسەندىلىگى زەرتتەلدى. زەرتتەۋ جۇمىستارى قازاقستاننىڭ بارلىق وبلىستارىنىڭ ورتالىقتارى جانە استانا مەن الماتى قالالارى بويىنشا جۇرگىزىلدى. ساۋالداماعا وسى قالالاردىڭ 18 جاستان اسقان 2000 تۇرعىنى قاتىستى. مىنە, وسى ازاماتتاردىڭ 92 پايىزى 2015 جىلدىڭ 26 ساۋىرىندە قازاقستاندا پرەزيدەنتتىك سايلاۋ بولاتىنىنان حاباردار ەكەنىن ايتتى, دەدى يۋليا كۋچينسكايا. ساۋالداما جۇرگىزىلگەن ازاماتتاردىڭ 68 پايىزى بۇل تۋرالى حاباردى تەلەارنالاردان ەستىگەنىن ايتقان. ال 78,2 پايىزى رەسپۋبليكالىق گازەتتەر مەن جۋرنالداردان وقىپتى. سونداي-اق, سايلاۋ تۋرالى حاباردى رەسپوندەنتتەردىڭ 28,5 پايىزى جەرگىلىكتى تەلەارنالاردان ەستىگەنىن, 27,2 پايىزى ينتەرنەتتەن كورگەنىن ايتقان. ال وبلىستىق جانە قالالىق گازەتتەر ارقىلى بىلگەنىن 27,1, راديودان ەستىگەنىن 25,3 پايىز رەسپوندەنتتەر ايتقان. بۇعان قاراعاندا, حالىقتىڭ نەگىزگى حابار الاتىن كوزى – رەسپۋبليكالىق گازەتتەر مەن جۋرنالدار ەكەنى كورىنىپ تۇر. سايلاۋدا داۋىس بەرۋگە سۇرالعانداردىڭ 93 پايىزى كەلەتىنىن جەتكىزگەن. ءسويتىپ, حالىقتىڭ داۋىس بەرۋگە دايىن ەكەنى كورىنىپ تۇر. سونىمەن قاتار, ەلەكتورالدىق بەلسەندىلىك كوبىنەسە 18-24 جاس شاماسىنداعى جاستار مەن زەينەتكەرلەر اراسىنان كوپ بايقالعان. سونداي-اق, سايلاۋعا مىندەتتى تۇردە قاتىساتىنىن ستۋدەنتتەر مەن بيۋدجەت سالاسىندا ىستەيتىن قىزمەتكەرلەر ايتقان. جاقسىباي سامرات, «ەگەمەن قازاقستان».