سولتۇستىك قازاقستاندا تۋبەركۋلەز جانداردى ماجبۇرلەپ ەمدەۋدە

پەتروپاۆل. 4 ناۋرىز. سولتۇستىك قازاقستان وبلىسىندا دارىگەرلەر اسا جۇقپالى ءارى قوعام ءۇشىن ۇلكەن قاۋىپ توندىرەتىن تۋبەركۋلەزدىڭ اشىق تۇرىمەن اۋىراتىنداردى ءتارتىپ ساقشىلارىمەن بىرلەسە ىزدەپ, ماجبۇرلەپ ەمدەۋ شارالارىنا كىرىستى. بۇل تۋرالى وبلىستىق دەنساۋلىق ساقتاۋ باسقارماسىنىڭ ءباسپاسوز قىزمەتى حابارلادى. وتكەن جىلى وڭىردە تۋبەركۋلەزبەن سىرقاتتانۋ – 5,5, ودان قايتىس بولۋ كورسەتكىشى 21,2 پايىزعا ازايعان. الايدا, تۇرمەدە قۇرت اۋرىنا شالدىققاندار بوستاندىققا شىققاننان كەيىن ەم-دوم الۋدىڭ ورنىنا قايتادان قىلمىسقا باراتىنى, ماسكۇنەمدىككە سالىناتىنى الاڭداتپاي قويمايدى. دەرتىن جاسىرىپ, سايدان سانىن, قۇمنان ءىزىن تاپتىرمايتىندار دا وسى ساناتتاعىلار. كەيىنگى كەزدەرى ولاردىڭ اراسىندا وزگەنىڭ اتىن جامىلىپ, ەمدەلەتىندەر كوبەيىپ كەتكەن. سولاردىڭ ءبىرى وبلىس ورتالىعىندا اۆتوبۋسپەن جولاۋشىلار تاسىپ جۇرگەن جەرىنەن قۇرىقتالىپ, ەرىكسىز ەمدەلۋگە جاتقىزىلعان. «تۋبەركۋلەز – الەۋمەتتىك اۋرۋ. بۇل كەسەلمەن اۋىراتىندار كۇنىنە 40 ادامعا دەيىن جۇقتىرا الادى. ىندەتتەن تۇبەگەيلى ايىعۋ ايلارعا, جىلدارعا سوزىلادى. ءبىزدى قاتتى قينايتىنى –تۇرمەدە كوح تاياقشاسىن جۇقتىرعانداردىڭ جازالارىن وتەگەن سوڭ قاشىپ كەتەتىنى. وسىنداي 16 ناۋقاسقا ىزدەۋ سالىنعان. بۇلار بەلگىلىلەرى عانا. «قۇجاتتارىمدى جوعالتتىم» دەگەن سىلتاۋمەن بۇركەنشىك اتپەن جۇرگەندەرى قانشاما؟!», دەيدى وبلىستىق تۋبەركۋلەزگە قارسى كۇرەس ديسپانسەرىنىڭ باس دارىگەرى پاۆەل سوبولەۆسكي. كوشى-قون پوليتسياسىنىڭ ينسپەكتورى الماس تەمىربەكوۆتىڭ ايتۋىنشا, ىزدەستىرۋ ءىس-شارالارى ناتيجەسىز ەمەس. بۇگىنگە دەيىن قۇرت اۋرۋىنىڭ اشىق تۇرىنە ۇشىراعان 4 ناۋقاس تابىلىپ, دارىگەرلەرگە تاپسىرىلعان. ءومىر ەسقالي. دەرەك: سولتۇستىك قازاقستان وبلىستىق دەنساۋلىق ساقتاۋ باسقارماسىنىڭ ءباسپاسوز قىزمەتى. سۋرەت: mzsr.gov.kz.