كەشەندى قامقورلىق جاسالۋدا

وبلىس اكىمى سەرگەي كۋلاگيننىڭ تسەلينوگراد اۋدانىنا تامىز ايىنداعى كەزەكتى ساپارى سۋ تاسقىنىنان زارداپ شەككەندەر ءۇشىن ايرىقشا ماڭىزدى ەدى. ويتكەنى, سولتۇستىك وڭىردە بۇل شەشۋشى كەزەڭ سانالادى. ساپار سايىن تۇرعىندارمەن سۇحباتتاسپاي كەتپەيتىن ادەتىمەن, سەرگەي ۆيتالەۆيچ جۇمىستى الدىمەن قۇرىلىس الاڭدارىنان باس­تادى. قوسشى اۋىلىندا توتەنشە جاع­دايلار جۇيەسىمەن 45 پاتەرلى ەكى ءۇي ەسەلەنگەن قارقىنمەن سالىنىپ جاتىر. مەردىگەرلىك ۇيىم – «اسگارد» جشس باسشىسى ەركىن اياپوۆ قۇرىلىس جۇمىستارىنىڭ باسىم بولىگى اياقتالۋعا جاقىن ەكەندىگىن بايانداپ, 10 قازانعا قاراي پاتەر كىلتتەرى تاپسىرىلاتىنىن ايتتى. ال, ەكىنشى ءۇيدى تۇرعىزىپ جاتقان كوەلو دا سيلۆا رەگو ديوگو باسقاراتىن «سمپ-610» سەرىكتەستىگىندەگى قارجىلاندىرۋ ماسەلەسى باستاپقىدا تج جۇيەسىمەن اتقارىلاتىنى جوسپارلانعان بولاتىن. ءوز مۇمكىندىكتەرىن ەكشەگەن مەردىگەرلىك ۇيىم ودان باس تارتىپ, جۇمىستى تولىقتاي ءوز قارجىسىمەن جۇرگىزىپ جاتىر. الداعى كەزدە تۇرعىندار پاتەرلەرىن ساتىپ الاتىن بولادى. «ءوز ءۇيىم – ولەڭ توسەگىمگە» سايساق, بۇل ەكىجاقتى ءتيىمدى قادام ەكەنى انىق. استاناعا جاقىن تايتوبە اۋىلىندا تۇرعىندار سانى كۇن ساناپ ءوسىپ كەلەدى. وسىعان بايلانىستى مەكتەپ ءۇش اۋىسىمدى ءبىلىم بەرۋگە ءماجبۇر. مۇندا 300 ورىندىق جاڭا مەكتەپ قۇرىلىسى سالىنىپ جاتقانىنا ءبىرتالاي ۋاقىت ءوتتى. وبلىس اكىمى قۇرىلىستى جۇرگىزىپ جاتقان «ەلەكتروسەتستروي» كوم­پانياسىنىڭ ديرەكتورى جانات اسقاروۆقا جۇمىس قارقىنىن ارتتىرىپ, بۇدان بۇرىنعى مەردىگەرلەردىڭ قاتەلىگىن قايتالاماۋدى قاتاڭ ەس­كەرتتى. قۇرىلىس باسشىسىنىڭ سەن­دىرۋىنشە, جاڭا مەكتەپ بيىل جۇمىسىن باستايتىن بولادى. بيىلعى سۋ تاسقىنىندا توتەنشە جاعداي ورىن العان ورازاق اۋىلىندا تۇيتكىل ماسەلەلەر كەشەندى تۇردە شەشىلۋدە ەكەن. بىرىنشىدەن, جانە ەڭ ماڭىزدىسى, مۇندا ەكى پاتەرلى 100 ءۇيدىڭ قۇرىلىسى ءبىر مەزەتتە اتقارىلۋدا. جاڭا شاعىن اۋدانداعى جۇمىستاردىڭ باسى-قاسىندا جۇرگەندەر قاتارىنداعى «ىسكەر تتج» جاۋاپكەرشىلىگى شەكتەۋلى سەرىكتەستىگىنىڭ ديرەكتورى دانيار تۇڭعىشباەۆتى سوزگە تارت­قانىمىزدا, وزىنە قاراستى 50 ءۇيدىڭ قابىرعاسى قالانىپ قويىل­عاندىعىن ايتتى. مۇندا 300 ادام, جەتكىلىكتى كولەمدەگى تەحنيكا قۇ­رامى ۋاقىتپەن ساناسپاي جۇمىس ءىس­تەۋدە. ال, وسىنداعى قابىرعالىق پا­نەلدەر زاۋىتى كۇنى-ءتۇنى ءونىم شىعارادى. سوعان قاراماستان, ءجۇز ءۇيدى جوسپارلى مەرزىمدە (20 تامىز) پايدالانۋعا بەرۋ مۇمكىن ەمەستىگى دە كوزگە ۇرىپ تۇر. ونى قۇرىلىسشىلار ۇيلەر دايىن بولعانىمەن, شاعىن اۋدانعا سۋ, ەلەكتر جەلىلەرىن تارتۋ ۋاقىت الاتىندىعىمەن تۇسىندىرۋدە. سوندىقتان, وسىنداعى قۇرىلىس كومپانيالارىنىڭ باسشىلارى تۇرعىن ۇيلەردى قابىلداپ الۋدى ەكى كەزەڭمەن (قىركۇيەكتىڭ سوڭى مەن قازاننىڭ باسىندا) اتقارۋدى ۇسىندى. ورازاق اۋىلىنىڭ تۇرعىندارى­مەن كەزدەسۋدە بيىكتىگى 4 مەتر, ۇزىندىعى 8 مەترلىك جاڭا توعان قۇرىلىسى باستالعانى, ەلدى مەكەن كوشەلەرى مەن اۋلالار تارتىپكە كەلتىرىلىپ جاتقانى, ورازاق مەكتەبىن قايتا قالپىنا كەلتىرگەنشە بالالار تۇگەلدەي جاڭارتىلعان مادەنيەت ۇيىندە ءبىلىم الاتىنى بەلگىلى بولدى. وسىمەن ءبىر مەزەتتە مەكتەپتىڭ سپورت جانە ءماجىلىس زالى جاڭا وقۋ جىلىنا دەيىن كۇردەلى جوندەۋ­دەن وتكىزىلەتىنىن, مۇندا ششۋچە قا­زان­­­­­دىق-مەحانيكالىق زاۋىتىنىڭ كومەگىمەن ءۇش اگرەگاتتى بىرىكتىرەتىن قۋاتتى بلوك-مودۋلدىك قازاندىق ورناتىلعانىن ايتقىمىز كەلەدى. –  مەملەكەت سۋ تاسقىنىنان زارداپ شەككەندەردى تۇرعىن ۇيلەرمەن, پاتەرلەرمەن قامتاماسىز ەتۋ ءۇشىن بارلىق جاعدايلاردى جاساپ جاتىر, – دەدى وبلىس اكىمى سەرگەي كۋلاگين. – سونداي-اق, اۋدان ورتالىعى اقمولدا «زاۆودستروي» جشس 45 پاتەرلى بەس قاباتتى ءۇيدى «قولجەتىمدى باسپانا» باعدارلاماسى شەڭبەرىندە اياقتاۋعا جاقىن قالدى. اتالعان قۇرىلىس كومپانياسى توتەنشە جاعدايلار جۇيەسىمەن 45 پاتەرلى ەكىنشى ءۇيدى دە تۇرعىزىپ جاتىر. مەردىگەرلەر بۇل نىسانداردى بەلگىلەنگەن مەرزىمىندە پايدالانۋعا بەرۋگە مىندەتتەنگەن. ءبىزدىڭ تاراپىمىزدان قاتاڭ باقىلاۋ ورناتىلعان. سوندىقتان, الاڭداۋعا ەش نەگىز جوق. اۋىل تۇرعىندارى وزدەرىن قام­قور­لىقتان تىس قالدىرماعان مەملە­كەت جانە وبلىس باسشىلىعىنا ريزالىقتارىن ءبىلدىردى. باقبەرگەن امالبەك, «ەگەمەن قازاقستان». اقمولا وبلىسى, تسەلينوگراد اۋدانى. سۋرەتتى تۇسىرگەن ەرمۇرات دوسىموۆ.