ەرلىك ەشقاشان ەسكىرمەيدى

9 مامىر – جەڭىستىڭ قىزىل تۋى رەيحستاگتا جەلبىرەپ, فاشيستىك گەرمانيانىڭ كۇيرەگەن كۇنى. سودان بەرى ارادا قانشا ۋاقىت اتقان وقتاي, شاپقان اتتاي زىمىراپ وتسە دە, جان جاراسى ۇمىتىلار ەمەس. اعا ۇرپاقتىڭ ەرلىك داستۇرلەرىن وسكەلەڭ ۇرپاق اركەز قاستەرلەيدى. سونىڭ جاقسى ءبىر ۇلگىسى جاڭا جىل قارساڭىندا قانات قاعىپ, جان-جاقتى قولداۋ تاپقانى بەلگىلى. وبلىس, اۋدان, قالا, اۋىل باسشىلارى سوعىس ارداگەرلەرىنىڭ ۇيلەرىندە بولىپ, ارنايى سىيلىقتى سالتاناتتى تۇردە تابىس ەتكەندەرى ءمالىم. ءومىر مەن ءولىم بەلدەس­كەن ساتتە نەبىر عالامات ەرلىك­تەرىمەن كوزگە ءتۇسىپ, ورتاق وتان­دى قورعاۋ جولىنداعى قاھار­ماندىق جورىقتارى مەن قاندى شايقاستارى قالاي ۇلىقتاسا دا جاراسادى. وبلىستا مۇقاتاي ايتباەۆ پەن ۆاسيلي تەرەيكوۆسكي اقساقالداردى بىلمەيتىندەر كەمدە-كەم. ەكەۋىنىڭ تاعدىرى ۇقساس. كىشى وفيتسەرلەر دايىندايتىن قىسقاشا كۋرستان وتكەننەن كەيىن بىردەن الدىڭعى مايدان شەبىنە الىنعان. ەۋرو­پا ەلدەرىن جاۋدان ازات ەتۋ وپەرا­تسيالارىنا قاتىسىپ, جاۋىن­گەرلىك ەرلىكتەرى ءۇشىن ءبىر­نەشە وردەن-مەدالدارمەن ماراپاتتالعان. جەڭىس كۇنىن ءبىرى گەرمانيادا, ەكىنشىسى بال­تىق جاعالاۋىندا قارسى العان. ولاردىڭ بەيبىت ومىردەگى ەڭبەك جولدارى ورتتەن قورعاۋ, ازاماتتىق قورعانىس سالالارىندا جالعاسىپ, ءوز مىندەتتەرىن ابىرويمەن اتقارا ءبىلدى. بيىل ءبىرى 94 جاسقا, ەندى ءبىرى 90 جاسقا تولىپ وتىرعان قاريالار كارىلىك دەندەپ, دەن­­ساۋ­لىقتارى سىر بەرگەنىنە قاراماستان, كوڭىلدەرىن كوتەرىڭكى ۇستاۋعا ۇمتىلادى. وسىدان ءۇش ايعا جۋىق ۋاقىت بۇرىن قۇتتىقتاۋعا كەلگەن وبلىستىق توتەنشە جاعدايلار دەپارتامەنتى باسشىسىنىڭ ورىنباسارى اسەت ىسماعۇلوۆتى, ءورت ءسوندىرۋ جانە اۆاريالىق-قۇتقارۋ قىزمەتىنىڭ جەتەكشىسى سەرىك عايسيندى جانە ارداگەرلەر كەڭەسىنىڭ وكىلى ساعىنباي ۋاليەۆتى جىلى شىرايمەن قارسى الىپ, اڭگىمە تيەگىن اعىتقان ەدى. وتكەن كۇندەردەن سىر شەرتىپ, قارۋلى مايدانداستارىن, وت كەشۋلەرىن ەسكە تۇسىرگەن بولاتىن. ءاجىم تورلاعان جۇزدەرىنە بىردە كۇلكى ءۇيىرىلىپ, بىردە مۇڭ تورلاپ, نەبىر قيىندىقتار مەن تاۋقىمەتتەرگە توزە بىلگەن, توتەپ بەرگەن جەڭىمپاز ۇرپاقتىڭ بولاتتاي بەرىك, قايسار مىنەزى كوز الدىمىزعا كەلگەندەي بولدى سول ساتتە. عاسىرعا جۋىق ءومىر كەشسە دە قۇلاقتارى تۇرىك, كوكىرەك­تەرى وياۋ. تىلەۋلەرى – ەل ۇستىندە, وتان­نىڭ اماندىعى. بۇگىنگى قازاق­ستاننىڭ جاراسىمدى­ ءتىر­لىگى مەن اۋىزبىرلىكتى ىنتىما­عىنا قۋا­نادى. اسپاندى سو­عىس بۇلتى تورلاماعانىنا شۇكىر­شىلىك ايتادى. كەشەگى مايدانگەرلەر, بۇگىن­گى ارداگەرلەر 9 مامىر كۇنى №1 ءورت ءسوندىرۋ اۋماعىندا ماي­دان پالاتكاسى قۇرىلاتىنىن ەس­تىپ, سولداتتاردىڭ بوتقاسىن جەي­تىن بولدىق قوي دەگەندەي ءبىر-بىرىنە قاراسىپ, جىمىڭداسىپ قالعان ەدى. سول كۇنگە دە كوپ قالعان جوق. اسقار ىسماعۇلوۆ, وبلىستىق توتەنشە جاعدايلار جونىندەگى دەپارتامەنتتىڭ كادر جۇمىسى ءبولىمىنىڭ باستىعى. پەتروپاۆل.