پاۆلوداردا «جاڭاشىل ۇستاز» بايقاۋىنىڭ جەڭىمپازى انىقتالدى

پاۆلودار. 30 ماۋسىم. استاناداعى «ZIAT» عىلىمي – ادىستەمەلىك ورتالىعىنىڭ ۇيىمداستىرۋىمەن وتكەن بايقاۋعا ەلىمىزدىڭ بارلىق وڭىرلەرىنەن جوعارى وقۋ ورىندارىنىڭ وقىتۋشىلارى قاتىستى. بۇل تۋرالى egemen.kz ءتىلشىسى حابارلادى. بايقاۋدا سۇلتانماحمۇت تورايعىروۆ اتىنداعى مەملەكەتتىك ۋنيۆەرسيتەتتىڭ گەوگرافيا, تۋريزم كافەدراسىنىڭ وقىتۋشىسى گۇلمارجان قاسەنوۆا «پرەزەنتاتسيالار جانە ولاردىڭ وقۋ پروتسەسسىندەگى ءرولى» نوميناتسياسى بويىنشا جۇمىسىن تانىستىرعان بولاتىن. جوعارى ءبىلىم بەرۋ جۇيەسىندەگى اقپاراتتىق تەحنولوگيالاردىڭ ادىستەمەلىك جۇمىسىن, ستۋدەنتتەردىڭ ءبىلىم بەرۋ ستاندارتتارىنىڭ تالاپتارىنا ساي قازىرگى زامانعى اقپاراتتىق-كوممۋنيكاتسيالىق تەحنولوگيالاردى يگەرگەندەرىن جەتكىزدى. بولاشاقتا تۋريزم سالاسىندا قىزمەت جاسايتىن ستۋدەنتتەردىڭ ىزدەنىستەرىن, جاڭاشىلدىقتارىن ارنايى بەينەسيۋجتتەر ارقىلى تانىستىردى. بايقاۋدىڭ باستى ماقساتى – زامان تالابىنا ساي ءبىلىم بەرۋدە جاڭاشىل, شىعارماشىلىقپەن جۇمىس ىستەپ, وقىتۋدىڭ وزىق تەحنولوگيالارى مەن يننوۆاتسيالىق ادىستەردى ساباق ۇردىسىندە ءتيىمدى پايدالانا الاتىن بىلىگى مەن ءبىلىمى جوعارى ۇلاعاتتى ۇستازداردىڭ تاجىريبەسىن كەڭىنەن ناسيحاتتاۋ. فاريدا بىقاي. دەرەك, سۋرەت: egemen.kz