احماد ابۋزياروۆ,
قازاقستان رەسپۋبليكاسىنىڭ مەملەكەتتىك رامىزدەرى جونىندەگى مامان:
– مەن قازاقستان حالقى اسسامبلەياسى كەڭەسىنىڭ كەزەكتەن تىس پرەزيدەنتتىك سايلاۋ وتكىزۋ تۋرالى باستاماسىن قولداعان بولاتىنمىن. قازىرگى جاعدايلاردا قازاقستاندىقتارعا ءبىرىنشى كەزەكتە جۇدىرىقتاي جۇمىلىپ, ەكونوميكالىق پروبلەمالاردى شەشۋ قاجەت. بىزدە «نۇرلى جول» باعدارلاماسىندا مازمۇندالعان داعدارىسقا قارسى ناقتى ءىس-قيمىل جوسپارى بار. ول ەلدەگى كولىكتىك ينفراقۇرىلىمداردى دامىتىپ قانا قويماي, سونداي-اق, ەكونوميكانىڭ بارلىق سالاسىندا جاڭا جۇمىس ورىندارىن قۇرۋعا مۇمكىندىك بەرەدى.
وسى ورايدا ايتارىم, ءبىزدىڭ پرەزيدەنت – ءوز ەلىندە عانا لايىقتى كوشباسشى ەمەس, حالىقارالىق ارەنادا قۇرمەتكە يە ساياساتكەر. ول الداعى كەزدە دە ەڭ كۇردەلى ماسەلەلەردى شەشۋگە قابىلەتتى. سوندىقتان ءبىز ەلباسىنا سەنىم ارتىپ, ءوزىمىزدىڭ بولاشاعىمىزدى, بالالارىمىز بەن نەمەرەلەرىمىزدىڭ بولاشاعىن ونىمەن تىكەلەي بايلانىستىرايىق.
ءزامزا قودار,
فيلوسوفيا عىلىمدارىنىڭ دوكتورى, پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ ساراپشىلار كەڭەسىنىڭ مۇشەسى:
– مەن مەملەكەت باسشىسىنىڭ پرەزيدەنتتىك سايلاۋ وتكىزۋ تۋرالى باستامانى قولداعانى ءۇشىن قۋانىشتىمىن, ارينە. ەندى ەلباسى نۇرسۇلتان نازارباەۆ ءوزىنىڭ كانديداتۋراسىن ۇسىنادى عوي دەگەن ۇمىتتەمىن. مەملەكەت باسشىسى ەلدىڭ دامۋى ءۇشىن كوپ نارسە ىستەپ جاتىر. اتاپ ايتقاندا, كوپ جاعدايدا نۇرسۇلتان ءابىش ۇلىنىڭ كۇش-جىگەرىنىڭ ناتيجەسىندە گەندەرلىك ساياسات جۇزەگە اسىرىلىپ كەلەدى.
ەلباسىنىڭ باستاماسىمەن 1995 جىلى وتباسى, ايەلدەر ىستەرى جانە دەموگرافيالىق ساياسات جونىندەگى كەڭەس قۇرىلدى. كەيىن ول پرەزيدەنت جانىنداعى ۇلتتىق كوميسسيا بولىپ قايتا قالىپتاستىرىلدى. بۇگىن ول ايەلدەردىڭ, بالالار مەن وتباسىلاردىڭ جاعدايلارىن جاقسارتۋ بويىنشا ءتيىمدى شارالار قابىلدايتىن كونسۋلتاتيۆتى-كەڭەسۋ ورگانى رەتىندە جۇمىس ىستەيدى. قازاقستان بۇگىندە ادام قۇقى جونىندەگى 60-تان استام حالىقارالىق قۇجاتقا قول قويسا, ولاردىڭ اراسىندا ماڭىزدى گەندەرلىك ساياساتقا قاتىستى دا قۇجاتتار بار. انا مەن ايەلدەر كاسىپكەرلىگىن قولداۋ بويىنشا دا كوپ ءىس اتقارىلۋدا. مەنى پرەزيدەنت تاراپىنان وتباسى ينستيتۋتىنا ۇلكەن كوڭىل بولىنەتىنى قۋانتادى.
نازىم قىزايباي,
بوكستان ايەلدەر اراسىنداعى الەم چەمپيونى:
– اركىمنىڭ ومىرىندە ونى شەشۋدەن بۇكىل بولاشاعى تاۋەلدى بولاتىن ماڭىزدى سىناقتار, جاۋاپتى جارىستار كەزدەسەتىنى انىق. سونداي ساتتەردە جيناقىلىق, جەڭىسكە دەگەن ەرىك-جىگەر مەن جاقىندارىنىڭ قولداۋى اسا ماڭىزدى. مەن سونداي ءسات قازاقستان ومىرىندە دە تۋىپ تۇر دەپ ويلايمىن.
ءبىز پرەزيدەنتىمىزدىڭ جانىنا توپتاسىپ, وعان جان-جاقتى قولداۋ كورسەتۋىمىز كەرەك. سوندا قازاقستاننىڭ كەز كەلگەن قيىندىقتاردى ەڭسەرۋگە قاۋقارى جەتەتىنىن دالەلدەپ قانا قويماي, الەمدەگى اسا دامىعان 30 مەملەكەتتىڭ قاتارىنان تابىلۋعا دا كەڭ جول اشىلاتىن بولادى.
بۇگىندە ءبىز الەمدەگى كوشباسشى 50 ەلدىڭ قاتارىندامىز. الدا جاڭا ماقساتتار تۇر, وعان جەتۋ ءۇشىن قازاقستاندىقتاردىڭ ورتاق مىندەتتەرى بار ءبىرتۇتاس حالىق ەكەنىن دالەلدەۋىمىز قاجەت. سوندىقتان مەن قحا كەڭەسىنىڭ كەزەكتەن تىس پرەزيدەنتتىك سايلاۋ وتكىزۋ تۋرالى ورىندى باستاماسىن قوس قولداپ قولداعان ەدىم. ەندىگى تىلەگىم – ەلباسىنىڭ سايلاۋعا ءتۇسۋى.
جۇماباي بايناتوۆ,
ق.ي. ساتباەۆ اتىنداعى قازاق ۇلتتىق تەحنيكالىق ۋنيۆەرسيتەتىنىڭ پروفەسسورى, «قۇرمەت» وردەنىنىڭ يەگەرى:
– جوعارى وقۋ ورنىندا ماگيسترانتتارعا ءدارىس وقيتىن بولعان سوڭ, ولارعا مىندەتتى تۇردە بيىلعى كەزەكتەن تىس پرەزيدەنتتىك سايلاۋ تۋرالى, ونىڭ ستراتەگيالىق تا, تاكتيكالىق تا جاعىنان بەيبىت ومىرىمىزگە وتە ءتيىمدى ەكەنىن جان-جاقتى بايانداپ بەردىم. ولاردى قازىرگى پرەزيدەنتىمىز سايلاۋعا ءتۇسىپ جاتقان جاعدايدا جاپپاي داۋىس بەرۋگە شاقىردىم. ماگيسترانتتاردىڭ دا وسى سايلاۋدىڭ ءتيىمدى شەشىلەتىنىنە سەنىمدەرى مول. بارلىعىمىز دا «اسۋ ۇستىندە ات اۋىستىرمايدى» دەگەن پىكىردەمىز.
ونىڭ ۇستىنە, ەلباسىنىڭ حالىققا جولداۋىندا وتە مازمۇندى جوبالار كۇن تارتىبىنە قويىلدى. وسى ىستەردى جۇزەگە اسىرۋ, ەلدىڭ اماندىعىن ساقتاۋ, شەتەلدەرمەن تاتۋ-ءتاتتى قارىم-قاتىناستا بولۋ تەك قانا قازىرگى پرەزيدەنتىمىزدىڭ قولىنان كەلەتىن ءىس دەپ بىلەمىن. سوندىقتان, ەرتەڭگى كۇنىمىزدىڭ جارىق بولۋى ءۇشىن, ۇل-قىزدارىمىزدىڭ جارقىن بولاشاعى ءۇشىن كەزەكتەن تىس وتەتىن پرەزيدەنتتىك سايلاۋعا ەلباسىنىڭ قاتىسقانىن قالايتىنىمدى اشىق بىلدىرەمىن.
كۇلاش مامىروۆا,
قازاق قىزدار پەداگوگيكالىق ۋنيۆەرسيتەتى گەوگرافيا كافەدراسىنىڭ مەڭگەرۋشىسى:
– پەداگوگ جانە ازامات رەتىندە قازاقستان حالقى اسسامبلەياسى كەڭەسىنىڭ كەزەكتەن تىس پرەزيدەنتتىك سايلاۋ وتكىزۋ تۋرالى باستاماسىنا قولداۋ بىلدىرگەن ەدىم. بۇل تاقىرىپ قوعامدا كەڭىنەن تالقىلاندى. ول دا كەزدەيسوق ەمەس. بارلىق قازاقستاندىقتار ءۇشىن, ءتۇرلى ۇرپاق پەن ءتۇرلى سالالاردا جۇمىس ىستەيتىن ادامدار ءۇشىن ەلىمىزدىڭ تۇراقتى دامىعانى, بەيبىتشىلىك پەن تىنىشتىقتىڭ سالتانات قۇرعانى ماڭىزدى.
بۇل ءۇشىن مەملەكەت بيلىگىندە قازىرگى ەلباسى قالۋ كەرەك. سوندا ەل الدىندا تۇرعان ەكونوميكالىق مىندەتتەردى شەشۋگە مۇمكىندىك تۋادى. ال بۇل الەۋمەتتىك سالاداعى جاعدايدىڭ جاقسارۋىنا تىكەلەي اسەر ەتەدى. تاۋەلسىزدىكتىڭ العاشقى كۇندەرىنەن باستاپ قازاقستان پرەزيدەنتى ءبىلىم بەرۋ مەن دەنساۋلىق ساقتاۋ سالالارىنا باسا نازار اۋدارىپ كەلەدى. مۇنى ءوز ازاماتتارىنا دەگەن تۇراقتى قامقورلىق دەپ قابىلداۋ كەرەك. كەزەكتەن تىس وتەتىن پرەزيدەنتتىك سايلاۋ حالقىمىزدى ەلباسى توڭىرەگىنە كەزەكتى مارتە توپتاستىرادى دەپ ەسەپتەيمىن.
ەلدوس سمەتوۆ,
دزيۋدو كۇرەسىنەن ازيا ويىندارىنىڭ جەڭىمپازى:
– قازاقستان حالقى اسسامبلەياسى كەڭەسىنىڭ كەزەكتەن تىس پرەزيدەنتتىك سايلاۋ وتكىزۋ باستاماسى تۋرالى اقپارات قۇرالدارىنان ەستىدىم. ءبىز قازىر ەلىمىزدە تۇراقتىلىق پەن قوعامدىق كەلىسىمدى, دوستىقتى سەزىنەمىز. باسقا ەلدەردە بولىپ جاتقان قاقتىعىستاردى, داۋ-جانجالدار مەن كەلىسپەۋشىلىكتەردى تەلەارنالاردان ءجيى كورەمىز.
ءبىر قۋانىشتىسى, قازاق ەلى وسىنداي كەلەڭسىزدىكتەردەن اۋلاق. بۇگىندە ەلىمىزدىڭ ۇستانعان ساياساتى بەرىك, بارلىق مەملەكەتتىك باعدارلامالار ويداعىداي جۇزەگە اسىپ كەلەدى. ەلىمىزدە سپورتتىڭ دامۋىنا دا ۇلكەن كوڭىل ءبولىنىپ جاتىر. سوندىقتان مەن سپورتشىلار قاۋىمى جانە دزيۋدو كۇرەسىنەن قازاق قۇراماسى اتىنان ەلباسى نۇرسۇلتان نازارباەۆتىڭ ۇستىمىزدەگى جىلدىڭ 26 ساۋىرىنە بەلگىلەنگەن سايلاۋعا ءتۇسۋىن قالايتىنىمدى اتاپ كورسەتكىم كەلەدى. قازاقستاندىق بارشا سپورتشى سايلاۋدا قازىرگى مەملەكەت باسشىسىنا داۋىس بەرەتىنى كۇمانسىز.
