قازاقستاننىڭ بارشا جۇرتشىلىعى ەلباسىنىڭ كەزەكتەن تىس پرەزيدەنتتىك سايلاۋعا ءتۇسۋىن قالايدى
وتىندى شاپقانعا جاقتىر
تاۋەلسىز قازاقستان ەلباسىمىزدىڭ ەڭ وركەنيەتتى 30 ەلدىڭ قاتارىنا قوسىلامىز دەگەن ۇلكەن يدەياسىمەن قۋاتتانىپ, العا ادىمداپ, ەركىن ىلگەرىلەپ بارا جاتقان ەل. بىراق ءومىر قالاداعى داڭعىل كوشە ەمەس قوي, ءومىر – كەدەرگىسى, قايشىلىعى مول, كۇردەلى قۇبىلىس. الەمدە ەكونوميكالىق داعدارىس ءجۇرىپ جاتىر, مۇنايدىڭ, گازدىڭ باسقا دا شيكىزاتتاردىڭ باعاسى ءتۇسىپ بارا جاتىر. ۋكرايناداعى كەلەڭسىز جاعدايلارمەن بايلانىستى ەۋروپا, امەريكا رەسەيگە سانكتسيا جاساۋدا. بۇل, ارينە, رەسەيدىڭ ەكونوميكاسىنا, باسقا جاعدايلارىنا ءوزىنىڭ اسەرىن تيگىزەدى. ءبىز رەسەيمەن, بەلارۋس ەلىمەن ءبىر ەكونوميكالىق وداقتا بولعاندىقتان, رەسەيدەگى قيىن جاعداي بىزگە دە اسەر ەتەتىنى ءسوزسىز. وسىلارمەن بىرگە ەلىمىزدىڭ تىنىش, ەركىن دامىپ كەلە جاتقانىن كورە المايتىن جانە ونىڭ تاۋەلسىزدىگىنە, حالقىنىڭ ءبىرلىگىنە كوز الارتىپ قارايتىن توپتار دا دۇنيەدە بارشىلىق. وسىنداي قيىن-قىستاۋ جاعدايدا كوپۇلتتى حالقىمىزدىڭ بىرلىگى, بىرتۇتاستىعى قارقىندى دامۋى اۋاداي قاجەت.
مەملەكەتتى تاجىريبەسى مول ۇلكەن تالانت يەسى دارىندى تۇلعا باسقارعانى كەرەك. ۇلكەن تاريحقا كوز جىبەرسەك ىلعي دا وسىلاي بولعان. بۇعان مىسال – پەتر ءى, ابىلاي حان سياقتى تۇلعالاردىڭ مەملەكەتتى باسقارۋلارى. وسى جاعدايلاردى ەسكەرسەك, بۇگىنگى قيىن-قىستاۋ جاعدايدا, قازاقستان زيالىلارىنىڭ پىكىرىنشە, ءبىزدىڭ ەلىمىزدى, ونىڭ ەكونوميكاسىن ءارى قاراي دامىتۋ نۇرسۇلتان نازارباەۆ سياقتى تۇلعانىڭ عانا قولىنان كەلەدى. ءبىزدىڭ ەلباسىمىز – تاجىريبەسى مول, ۇلكەن تالانت يەسى. پرەزيدەنتىمىزدىڭ باسقارۋىمەن قازاقستان حالقى كوپتەگەن قيىنشىلىقتاردى جەڭدى. سوندىقتان ءبىز نۇرسۇلتان ءابىش ۇلىنىڭ پرەزيدەنتتىك سايلاۋعا قاتىسۋىن شىن نيەتىمىزبەن قالايمىز. ەلباسىنىڭ باسشىلىعىمەن دۇنيەگە «نۇرلى جول» باعدارلاماسى كەلدى. مەملەكەت تاراپىنان بۇل باعدارلاماعا قىرۋار اقشا ءبولىندى. وسى باعدارلامانى ەندى ىسكە اسىرۋ كەرەك. قازاق ايتادى عوي: مالدى تاپقانعا باقتىر, وتىندى شاپقانعا جاقتىر دەپ. سول سياقتى وسى باعدارلامانى ىسكە اسىرۋدى باعدارلامانىڭ اۆتورىنىڭ ءوزى باسقارعانى ءجون دەپ ەسەپتەيمىز.
جابايحان ءابدىلدين,
اكادەميك, فيلوسوفيا عىلىمدارىنىڭ دوكتورى,
پروفەسسور.
اقساقالدار بۋىنى ۇلكەن ءۇمىت ارتادى
ەلباسى «قازاقستان-2050» دەپ اتالاتىن ۇلكەن باعدارلامانىڭ اتقارىلۋ, جۇزەگە اسۋ جولدارىن, ستراتەگيالىق باعدارىن ناقتىلاپ كورسەتىپ بەردى. اتالمىش ستراتەگيالىق باعدارلامادا ەلىمىزدىڭ ەكونوميكالىق الەۋەتىن ارتتىراتىن, الەمدى شارپىعان قارجىلىق داعدارىستاردان قازاقستاندى قازىرگىدەي باقۋاتتى قالپىندا الىپ شىعۋ جولدارى, حالىق بىرلىگى مەن مەملەكەت تۇراقتىلىعى, رۋحاني, مادەني ءوسۋ جولدارى, ءبارى-ءبارى قامتىلعان. جانە بۇل باعدارلامانىڭ ەرەكشەلىگى وسىنداي شەشۋشى ساتتە حالىقتىڭ ىنتاسىن كوتەرىپ, جاڭا زامانعا ساي دامۋ قادامىمىزعا زور ىقپال ەتەتىندىگى انىق.
ەلباسى نۇرسۇلتان نازارباەۆتىڭ ەلىمىزدە كەزەكتەن تىس سايلاۋ وتكىزۋ تۋرالى قازاقستان حالقى اسسامبلەياسى تاراپىنان تۇسكەن ۇسىنىستى ايرىقشا ىنتامەن قابىلداپ, زاڭ جۇزىندە جارلىققا قول قويۋى, بۇگىنگى تاڭدا حالىقتىڭ باسىم بولىگى كەلەشەككە انىق باعداردى تۇسىنە وتىرىپ ءبىراۋىزدى بولۋى, مۇنىڭ ءبارى قازاق ەلىنىڭ ستراتەگيالىق دامۋ جولىندا بىرىگە تۇسكەندىگىن كورسەتىپ وتىر. بۇدان ءبىز نەنى بايقايمىز؟ قازاقستان ءوز الدىنا شاڭىراق كوتەرىپ تاۋەلسىزدىگىن العان كەزەڭنەن باستاپ نۇرسۇلتان نازارباەۆ كوشباسشىسى رەتىندە العاشقى قادامىن جاساۋ الدىندا تۇرعان جاس مەملەكەتتى سونى جولعا سالدى, وزگەگە ۇقسامايتىن ناقتى باعىت ۇستانىپ, الەم الدىنداعى ابىرويىن, وزىندىك بەت-بەينەسىن قالىپتاستىرۋعا ۇلكەن كۇش جۇمسادى. اۋەلى ەكونوميكاعا كوڭىل ءبولىپ, حالىقتىڭ ءال-اۋقاتىن ارتتىرۋ جولىنا تولايىم كۇش جۇمساپ, قازاقستان مەملەكەتىنىڭ جاڭا زامانداعى تاريحي باعدارىن قالىپتاستىردى.
مىنە, وسىنداي از عانا ۋاقىت ارالىعىندا عاسىرلاپ ءجۇرىپ وتەتىن جولدى اسقان اقىلماندىقپەن, جازا باسۋدان ساقتاي وتىرىپ, وزگەمەن تەڭ تەرەزەلى تىرشىلىككە جەتكىزۋ, ارينە, ەرلىك. سونى دۇرىس ءتۇسىنگەن حالقىمىز وسى تۇراقتىلىق پەن تىنىشتىقتى ساقتاپ قالۋ نيەتىندە ءبىر تۋدىڭ استىنا جيىلىپ, ءبىر باسقارۋشىنىڭ نۇسقاعان تۋرا جولىمەن كەمەل كەلەشەككە باتىل قادام جاساي بەرۋدى قالاپ وتىر.
بىزدەر دە, الدىڭعى بۋىن وكىلدەرى, ەلىمىزدىڭ بۇگىنگى «قوي ۇستىنە بوزتورعاي جۇمىرتقالاعان» بەرەكەلى شاعىن كورىپ, جاس ۇرپاعىمىزدىڭ ءبىلىم مەن وركەنيەت جولىندا قول جەتكىزىپ كەلە جاتقان جەتىستىكتەرىنە سۇيسىنۋمەن, الەمنىڭ الدىڭعى قاتارلى مەملەكەتتەرىمەن تەڭ دارەجەدە ساياسي-ەكونوميكالىق قارىم-قاتىناس جاساعان جاڭا قازاقستاننىڭ باعىت-باعدارىنا, كەلەشەگىنە زور سەنىممەن الداعى وتەر سايلاۋدى, ونىڭ ىشىندە بۇگىنگى كوشباسشى نۇرسۇلتان نازارباەۆتىڭ قاتىسۋىنا جانە حالىق سەنىمىنە ساي جەڭىپ شىعۋىنا ۇلكەن ءۇمىت ارتامىز.
دوسمۇحاممەد كىشىبەكوۆ,
اكادەميك, فيلوسوفيا عىلىمدارىنىڭ دوكتورى.
بارشامىزدىڭ ورتاق قالاۋىمىز
قازاقستان رەسپۋبليكاسىنىڭ پرەزيدەنتى ن.نازارباەۆ 25 اقپاندا كەزەكتەن تىس پرەزيدەنتتىك سايلاۋ تاعايىنداۋ تۋرالى جارلىققا قول قويدى.
بۇل ەل تاريحىنداعى ايتۋلى وقيعا. الەم باسىنان ارقيلى ساياسي-يدەولوگيالىق, تىپتەن قانتوگىسكە باستايتىن وقيعالاردى وتكىزىپ وتىرعاندا, پرەزيدەنتتىك سايلاۋدىڭ ءمانى بولەكشە. كورشى رەسەي ەلىندەگى بەلەڭ العان ەكونوميكالىق داعدارىس, ءرۋبلدىڭ قاۋىرت قۇلدىراۋى ءبىر كەڭىستىكتەگى ءبىزدىڭ ەلگە اسەرىن تيگىزبەي قويمايدى. بولاشاقتى بولجاۋ – مۇمكىن ەمەس ءىستىڭ ءبىرى. حاكىم اباي «كوك تۇمان الدىڭداعى كەلەر زامان» دەپ ەدى. الداعى زامان – كوك تۇمان. ءبىز سول زاماننان ءۇمىت ساۋلەسىن ىزدەيمىز. سول ءۇمىت ساۋلەسىن الداعى وتەتىن پرەزيدەنتتىك سايلاۋدان تابامىز دەگەن بۇكىل قازاقستان جۇرتىنىڭ اق نيەتى بار.
ءۇمىت دەگەن انشەيىن ەلەسكە قۇرىلعان سانا ەمەس. مەن پرەزيدەنت نۇرسۇلتان ءابىش ۇلى نازارباەۆقا زور سەنىممەن قاراپ, ونىڭ الداعى پرەزيدەنتتىك سايلاۋعا ءتۇسۋىن قولدايتىن ازاماتتىڭ ءبىرىمىن. مەنىڭ بۇل قولداۋىمنىڭ ەكى ءمانىسى بار:
بىرىنشىدەن, ن.نازارباەۆ 1991 جىلدىڭ 1 جەلتوقسانىنان قولىنا بيلىك العان زاماننان بەرى كسرو كەزىندە تۇرالاپ قالعان ەلدىڭ ەكونوميكاسىنىڭ نەگىزىن قالاپ, قاۋىپسىزدىگىن نىعايتىپ, يادرولىق قارۋدان باس تارتىپ, كورەگەندىك ساياسات جۇرگىزدى. وسى ساياسي ءۇردىستىڭ ناتيجەسىندە نازارباەۆتىڭ ساياسي مەكتەبى قالىپتاستى. ەل باسقارا الاتىن ساياسي شاكىرتتەرى ءوسىپ-ءوندى. ولار كوپ, ولار ساۋاتتى, ولار پرەزيدەنتتىڭ تاجىريبەسىن كورىپ, ءتۇسىنىپ, سانالارىنا سىڭدىرگەن مىقتى ساياسي قايراتكەرلەر. ولار ۇكىمەتتىڭ, پارلامەنتتىڭ, قۇقىق ورىندارىنىڭ ءبارىندە جاۋاپتى جانە ناتيجەلى قىزمەتتەر اتقارۋدا.
ەكىنشىدەن, ەلباسىنىڭ «قازاقستان-2050» ستراتەگيالىق باعدارلاماسى بار. بۇل باعدارلامانىڭ ءمانىسى – ەلىمىزدى يندۋستريالىق-يننوۆاتسيالىق مەملەكەتكە اينالدىرۋ. يندۋستريالىق-يننوۆاتسيالىق باعدارلامانىڭ وزگە بالاماسى جوق. يندۋستريالىق ەلدىڭ مەملەكەتى ليبەرالدىق مەملەكەت بولاتىنى الەمگە ايان.
ليبەرالدىق مەملەكەت جاعدايىندا ازاماتتاردىڭ ساناسى مۇلدەم جاڭا دەڭگەيگە وتپەك. ويلاۋ جۇيەسى وزگەرمەك. ناعىز وركەنيەتتىك قۇندىلىقتار قالىپتاسپاق. دەموكراتيالىق ۇردىستەر قالىپتى جاعدايعا اينالماق.
وسى يندۋستريالىق-يننوۆاتسيالىق باعدارلامانىڭ ورەلى سالاسىنىڭ ءبىرى – «نۇرلى جول». جول – ەكونوميكالىق ءۇردىستى جاڭا دەڭگەيگە الىپ شىعاتىن لوگيستيكالىق-اقپاراتتىق-كوممۋنيكاتيۆتىك-وركەنيەتتىك ءىس-شارا. جول – بارلىق قازاقستاندىقتارعا ولاردىڭ سان قيلى ءمۇمكىنشىلىكتەرىن ىسكە اسىراتىن اسا قاجەتتى جاعداي. مۇنى بارشا قازاقستاندىقتار سەزىپ, ءبىلىپ وتىر. سوندىقتان مەن الداعى پرەزيدەنتتىك سايلاۋعا نۇرسۇلتان ءابىش ۇلىنىڭ كانديداتۋراسى ۇسىنىلۋى بارشامىزدىڭ ورتاق قالاۋىمىز بولاتىنىن باسىن اشا ايتۋدى پارىزىم سانايمىن.
عاريفوللا ەسىم,
اكادەميك, جازۋشى.
سەرتكە سوعار سەمسەرىمىز
بۇگىن بۇكىل الەم كوز تىگىپ وتىرعان كەزەكتەن تىس پرەزيدەنتتىك سايلاۋ – ەل ومىرىندەگى ەلەۋلى وقيعا, حالىق تاريحىنداعى تاعدىرلى كەزەڭ. وسىنداي شەشۋشى ساتتە ويىمىزعا ەڭ الدىمەن ەلباسى نۇرسۇلتان نازارباەۆ ەسىمى ورالادى. ول ورىندى دا. سەبەبى, ۆولتەر ايتقانداي: «مەملەكەتتى قۇتقارۋ ءۇشىن ءبىر عانا ۇلى ادام جەتكىلىكتى». «مەملەكەتتى قۇتقارۋ» دەيتىن ءسوز قالام ۇشىنا تەكتەن تەك ورالعان جوق. ونىڭ تەرەڭ سىرى مىنادا – دۇنيە دوڭبەكشىگەن مىنا الاساپىران الماعايىپ عاسىردا ءارتۇرلى الەمدىك اپاتتار ادامزاتتى ۇرەيلەندىرىپ تۇر. جەر شارىن تۇگەل قامتىپ, تىم ءجيى بولىپ جاتقان تابيعي اپاتتار ازداي-اق, تەرروريزم, دىندەر اراسىنداعى الاۋىزدىق, ۇلتتار اراسىنداعى ارازدىقتان تۋعان قارۋلى قاقتىعىستار, تاعى باسقا دا تولىپ جاتقان كەساپات كەسەلدەر دۇنيەجۇزىنىڭ ورتاق پروبلەماسى بولىپ وتىر. ءالى تولىق شەشىم تاپپاعان رەسەي – ۋكراينا شيەلەنىسى دە الاڭداتادى الەمدى. بۇكىل دۇنيەجۇزىن شارپىعان ەكونوميكالىق داعدارىس كۇن سايىن كۇشەيە تۇسۋدە. بۇگىندە كارى قۇرلىق ەۋروپانىڭ ءوزى ەسەڭگىرەپ تۇر. كۇنى كەشەگە دەيىن ەكونوميكاسى گۇلدەنگەن, تاريحي تامىرىن تەرەڭگە جايعان گرەكيا دا كۇيى كەتىپ, كۇيرەۋدىڭ از-اق الدىندا.
پرەزيدەنت ن.ءا.نازارباەۆ وتكەن جىلى جەلتوقسان ايىنىڭ 14-جۇلدىزىندا تاۋەلسىزدىك مەرەكەسىنە وراي جاساعان بايانداماسىندا بىلاي دەدى: «تۇتاس دۇنيەنى شارپىعان داعدارىستار بۇگىنگى كۇننىڭ باستى سيپاتىنا اينالۋدا. جاھاندىق ەكونوميكا كەزەكتى رەت سوقتىقپالى, سوقپاقسىز جولعا اياق باستى. سوندىقتان, ءبىز الداعى سىن-قاتەرلەرگە دايىن بولۋعا ءتيىسپىز. ءبىز جاعداي شيرىققان سايىن شىنىعۋعا, كەدەرگىگە كەزدەسكەن سايىن كەلەسى سەرپىلىسكە قۋات جيناۋعا داعدىلاندىق. الىستى كوزدەگەن دامۋ جولىندا كەزدەسەتىن ۋاقىتشا كەدەرگىلەرگە مويىمايمىز. ەڭسەنى تۇسىرمەي, ەرتەڭگە سەنىممەن قارايمىز».
سەرىنىڭ سەرتكە سوققان سەمسەرىندەي وسى ءسوز حالىقتىڭ جىگەرىن جانىدى. سوعان وراي:
قيىندىق دەگەن قامال بار,
قايسارلار جارىپ وتەتىن.
ەڭبەك دەگەن باقىت بار,
ەرىنبەگەن جەتەتىن.
جالقاۋعا باقىت جولاماس,
قايىرىلماي وعان كەتەتىن, – دەپ جازعانبىز.
دۇنيە دوڭبەكشىگەن وسىنداي الماعايىپ الاساپىران ۋاقىتتا قازاقستان حالقى اسسامبلەياسى كەزەكتەن تىس سايلاۋ وتكىزۋ جايلى باستاما كوتەرىپ, ونى قازاقستاننىڭ كوپۇلتتى, ءبىر ماقساتتاعى حالقى قىزۋ قولدادى. وسىعان وراي ەلباسى ن.ءا.نازارباەۆ قازاقستان حالقىنا ۇندەۋ جولدادى.
ەلباسىنىڭ ۇندەۋىندە ايتىلعان «بىرلىك پەن بەرەكە, شاڭىراقتاعى شاتتىق» كۇلتەگىن ايتقان: «حالقىنا – بەگى, بەگىنە – حالقى سەنگەن ەلدە» عانا بولادى. قۇدايعا شۇكىر, قازاقستان ءدال وسىنداي ەل!
بيىل وتكەلى وتىرعان پرەزيدەنتتىك سايلاۋدىڭ تيىمدىلىگى ايدان انىق. كەلەر جىلدىڭ كۇنتىزبەسىندە پارلامەنتتىك سايلاۋ تۇر. ەكى سايلاۋدىڭ قاتار ءوتۋىنىڭ قيىندىعى ءوز الدىنا, تيىمسىزدىگى تاعى بار. بۇل – ءبىر. ەكىنشىدەن – قازىرگىدەي كۇرمەۋى قاتتى اسا كۇردەلى كەزەڭدە سىننان وتكەن, الەم الدەقاشان مويىنداعان, ەل باعىنا تۋعان تۇلعا نۇرسۇلتان ءابىش ۇلى نازارباەۆقا سەنىم ءبىلدىرىپ, «سايلاۋعا ءتۇس, ەلىڭدى باقىتقا باستاۋدىڭ اۋىر جۇگىن تاعى دا ءوزىڭ ارقالا» دەسەك, ول بۇل تىلەكتى قابىل الىپ, قايتا سايلانسا, ەل سەنگەن تۇلعاعا الەم دە سەنەدى. «بىرلىك پەن بەرەكەنىڭ, شاڭىراقتاعى شاتتىقتىڭ» بەرىك كەپىلى سول! سەبەبى, ارقالى اقىن عافۋ قايىربەكوۆتىڭ سوزىمەن ايتساق:
سىنعا تۇسكەن ەكىۇداي تۇستا مىنا,
قارامايدى ول باقىتقا,
باس قامىنا,
لايىق ول بايقاساق قازاق تۇگىل
الەمدى دە ادەمى باسقارۋعا.
حاديستە ايتىلعانداي: «جەر بەتىندەگى عۇلاما دانىشپاندار اسپانداعى جۇلدىزدارعا ۇقسايدى. جەردە دە, سۋدا دا جۇلدىزدارعا قاراپ جول تابۋعا بولادى. جۇلدىزدار بولماسا اداسۋى مۇمكىن». الەمدەگى ءار ەل, ءار حالىقتىڭ اداستىرماس ءوز جۇلدىزدارى بار. قازاقستاننىڭ اداستىرماس اق جۇلدىزى, باق جۇلدىزى – نۇرسۇلتان ءابىش ۇلى نازارباەۆ!
ولاي بولسا نۇرەكەڭە:
تۋعان ەرسىز قازاعىمنىڭ باعىنا,
قۇت-بەرەكە داري بەرسىن تاعىڭا.
ەلىمىزدى باقىتقا ءوزىڭ باستاي بەر,
جەڭىسىڭمەن قۋانتا بەر تاعى دا! –
دەپ تىلەك ايتامىز.
ءسابيت دوسانوۆ,
جازۋشى, مەملەكەتتىك سىيلىقتىڭ لاۋرەاتى.
بەكەم بەل بۋعانى كەرەك
قازاقستان حالقى اسسامبلەياسىنىڭ كەڭەسى باستاماشىلىق تانىتىپ ايتقان بيىل كەزەكتەن تىس پرەزيدەنتتىك سايلاۋ وتكىزۋ جونىندەگى ۇسىنىسى حالىقتىڭ قولداۋىنا يە بولدى. وتانىمىزدىڭ بارلىق وڭىرىنەن ۇلكەن-كىشى مەملەكەت باسشىسىنا ءوز تىلەكتەرىن ءبىلدىردى. سوعان وراي, نۇرسۇلتان ءابىش ۇلى ءوز ۇندەۋىن جاريالادى. مەن ۇندەۋدى وقىپ وتىرىپ, بۇكىل الەم, ونىڭ ىشىندە قازاق ەلىنىڭ بۇكىل تىنىس-تىرشىلىگىمەن تانىسقانداي بولدىم.
مەن, ۇندەۋدى وقىعان سوڭ, الەمدىك ىستەردىڭ ۇيىتقىسى بولىپ, سونىڭ وڭ شەشىلۋىنە كەلەلى ۇلەس قوسىپ جۇرگەن نۇرسۇلتان نازارباەۆتىڭ كەزەكتەن تىس پرەزيدەنتتىك سايلاۋعا ءتۇسۋى قاجەت دەگەن بەرىك بايلامعا كەلىپ وتىرمىن. وسىنداي اۋمالى-توكپەلى زاماندا بۇل جۇمىستى تەك نۇرسۇلتان ءابىش ۇلى عانا اياعىنا جەتكىزىپ, قازىرگى بەرەكە-بىرلىككە ۇيىعان باقىتتى ءومىرىمىزدى, تورتكۇل دۇنيەگە تانىلعان ابىروي-بەدەلىمىزدى جالعاستىرادى دەپ ويلايمىن.
ويتكەنى, الەمدە قانشاما داعدارىستار, قيىندىقتار بولىپ جاتقانمەن, وعان قازاقستان جۇرتىن ۇرىندىرماي, كەمەل وي, اقىل-پاراساتىمەن بيىكتەن بيىككە كوتەرىپ كەلە جاتقان تەك قازىرگى ەلباسى ەكەنىن ءبىز عانا ەمەس, باسقالار دا جاقسى سەزىپ وتىر. ءتورت قۇبىلاسىن تۇگەندەپ, جۇرتىن جۇمىلدىرعان مۇنداي باسشى ءوزىنىڭ العا قويعان اسۋلارىن, ياعني «قازاقستان-2050» ستراتەگياسىن, «نۇرلى جول – بولاشاققا باستار جول» اتتى جولداۋىن دىتتەگەن جەرىنە جەتكىزۋىن قالايمىز.
پرەزيدەنت بۇل سايلاۋعا قاتىسۋى جايلى شەشىمدى كەيىنىرەك ايتاتىنىن ۇندەۋدە بىلدىرگەن ەكەن. ءبىز, اۋىل شارۋاشىلىعى سالاسىن زەرتتەپ, زەردەلەپ, وتانىمىزدىڭ بولاشاعىنا قاجەت ماماندار دايىنداپ جۇرگەن عالىمدار ورتاق ەلىمىزدىڭ بولاشاعى ءۇشىن, مەملەكەتىمىزدىڭ كوك تۋىن بيىكتە جەلبىرەتە بەرۋ جولىندا نۇرسۇلتان ءابىش ۇلىنىڭ بەكەم بەل بۋىپ سايلاۋعا ءتۇسۋىن قالايمىز.
راحىمجان ەلەشەۆ,
اكادەميك.
سايلاۋعا تۇسكەنىن قالايمىن
ەلباسى نۇرسۇلتان نازارباەۆ سەكىلدى اسا بيىك تۇلعالى قايراتكەرمەن تانىس بولۋ كەز كەلگەن ادامنىڭ تاعدىرىنا جازىلا بەرمەگەن بولار. سوناۋ وتكەن عاسىردىڭ 70-ءشى جىلدارى وسىنداي مۇمكىندىك ماعان تۋعان بولاتىن. ول كەزدە مەن قازاقستان تەمىرجولى قوستاناي ءبولىمشەسىنىڭ باستىعى ەدىم. ءبىز سوكولوۆ-سارىباي كەن ءوندىرۋ بىرلەستىگىنەن ىستىق تەمىر جەنتەگىن قاراعاندى مەتاللۋرگيا كومبيناتىنا جەتكىزەتىن ەدىك. نۇرسۇلتان ءابىش ۇلىنىڭ ارالاسۋىمەن, سول كىسىنىڭ ارقاسىندا سول كۇردەلى ۋاقىتتا كومبيناتقا شيكىزاتتى ىرعاقتى جەتكىزۋ ماسەلەسىن شەشكەن ەدىك.
مەنىڭ جاسىم بۇگىندە توقساننان استى. ادامي تىرلىكتە مەن نۇرسۇلتان ءابىش ۇلىنان ءبىر مۇشەلدەن اسا ۇلكەن اداممىن, ومىرلىك تاجىريبەم دە بار. سول كەزدەسۋدە-اق جاس جىگىتتىڭ كوشباسشىلىق قاسيەتىن تانىعان ەدىم. جىلدار ءوتتى, كەيىن نۇرسۇلتان ءابىش ۇلى قازاقستاندى باسقارۋ تىزگىنىن قولىنا الدى. ەندى تاۋەلسىزدىگىن العان ەلگە اۋىرتپالىق اكەلگەن جىلدارعا تاعى دا كۋا بولدىق. سونىڭ بارلىعىنان ەلباسىمىزدىڭ سارا ساياساتى ارقاسىندا جۇگىمىز اۋماي ءوتىپ كەلەمىز. قازىر دامۋدىڭ جولىنا تۇستىك. مەنىڭ سوناۋ ءبىر جىلدارعى ىشكى تۇيسىگىمنىڭ الداماعانىن ءوزىم ماقتانىش ەتەمىن.
ەلباسى نۇرسۇلتان نازارباەۆتىڭ قازاقستان حالقىنا ۇندەۋىن تىڭدادىم. تاعى دا قاداۋ-قاداۋ ماسەلەلەردى ورتاعا سالدى. سونىڭ ەڭ باستىسى – تىنىشتىق. الەمدى ءدۇرلىكتىرگەن قارجى-ەكونوميكالىق داعدارىسقا بايلانىستى بيۋدجەتتى وڭتايلاندىرۋ جۇمىسى دا ءتۇسىنىستىكپەن جۇرگىزىلىپ وتىر. «قويىپ ىشسەڭ قوي قالادى, تارتىپ جەسەڭ تاي قالادى» دەيدى مەنىڭ قازاق دوستارىم. قازاق دالاسى تالاي قۇقايدى كورگەن. ايتەۋىر اينالاداعى سەكىلدى قان توگىلمەسە بولدى.
قالعان قيىندىقتىڭ بارلىعى دا ەر موينىنا امانات, ونىڭ ەسەبى تابىلادى. داعدارىس قايىرلاپ تۇرىپ قالاتىن كەمە ەمەس, ول دا وتكىنشى قۇبىلىس. ءار ەلگە سىن بولۋى دا ىقتيمال. ال مۇنداي كەزەڭدە ەلدىڭ تىزگىنىن سىندارلى ساياساتكەر, تاجىريبەسى دە مول, حالىقارالىق بەدەلى دە جوعارى ادامنىڭ ۇستاعانى ماقۇل.
بەرتران رۋبينشتەين,
ۇلى وتان سوعىسىنىڭ ارداگەرى,
قوستاناي وبلىسىنىڭ قۇرمەتتى ازاماتى.
قوستاناي.
كەمەل كەلەشەگىمىزدىڭ كەپىلى
مەن ءوز باسىم ءومىرىمىزدىڭ كوكتەمى سياقتى جاس كەزىمىزدە, سول ۋاقىتتاعى اتاعى بۇكىل وداققا جايىلعان قازاقستان ماگنيتكاسىندا, كومىر شايناپ, وت بۇرىككەن دومنا پەشىنىڭ جانىندا حالقىمىزدىڭ بولاشاق ەلباسى نۇرسۇلتان نازارباەۆپەن كەزدەسىپ, تانىسىپ, اڭگىمەلەسكەنىمدى, ول تۋرالى قازاق باسپاسوزىندە العاشقى بولىپ وچەرك جازعانىمدى ءاردايىم ماقتانىش تۇتامىن.
توقسانىنشى جىلداردىڭ باسىنداعى حالقىمىزدىڭ عاسىرلار بويعى ارمانى ورىندالىپ, تاۋەلسىزدىككە قولىمىز جەتكەنى, بىراق سونىمەن بىرگە بۇرىنعى وداق ىدىراپ, ەكونوميكامىز كۇيرەپ, كۇيزەلىپ, تۇرمىس شاتقاياقتاپ, جۇمىسسىزدىق, بەرەكەسىزدىك جايلاپ, بولاشاعىمىز ب ۇلىڭعىر تارتىپ, اسا اۋىر كۇندەر تۋعانى ەسىمىزدە. تاريحىمىزدىڭ سونداي قيىن, الماعايىپ ساتىندە حالقىمىز ءوزىنىڭ تاڭداۋىن جاساپ, ەل تىزگىنىن نۇرسۇلتان ءابىش ۇلى نازارباەۆقا ۇستاتتى. بۇل تاڭداۋدىڭ قانشالىقتى دۇرىس بولعانىن سودان بەرگى ۋاقىت تولىعىنان دالەلدەدى. ەلباسىنىڭ كۇنى كەشەگى قازاقستان حالقىنا ۇندەۋىندە ايتىلعانداي, وتكەن 23 جىل عاسىرعا بەرگىسىز جىلدار بولدى. پرەزيدەنتىمىزدىڭ كەمەل باسشىلىعىنىڭ ارقاسىندا رەسپۋبليكامىز بارلىق قيىنشىلىقتاردان, سىنداردان ءمۇدىرمەي ءوتتى. شەكارالارى ايقىندالعان, ەكونوميكاسى دامىعان, كوك بايراعى كوككە جەلبىرەگەن, الەم تانىعان, حالىقارالىق بەدەلى زور, تاۋەلسىز, قۋاتتى مەملەكەتكە اينالدى. حالىقتىڭ تۇرمىسى تۇزەلدى. مۇنى باقىت دەمەگەندە نە دەيسىز. الايدا, باقىت باعالاي بىلگەننىڭ عانا باسىندا تۇرادى دەگەن دە ءسوز بار. مۇنى ۇمىتپاعان ءجون. بۇگىن ءبىز ءوز كەلەشەگىمىزگە ۇلكەن ۇمىتپەن, سەنىممەن قارايمىز.
وسى عاسىردىڭ باسىندا, رەسەيدە شىعاتىن ۇلكەن گازەتتەردىڭ بىرىندە جازىلعان مىناداي پىكىر جادىمدا قالىپتى. ونداعى ايتىلعان وي مىناداي: ءبىز, رەسەي, جاڭا رەفورما دەپ, ونى ءويتۋ كەرەك, مۇنى ءبۇيتۋ كەرەك دەپ, جامىراي پىكىر ايتىپ, جانتالاسا قيمىلداپ جاتقانداي كۇي كەشەمىز. قازاقستان ول كەزدە تىنىش. ارادا ءبىراز ۋاقىت وتەدى. قازاقستان ەشقانداي دابىراسىز, داۋ-دامايسىز, ءوز پرەزيدەنتىنىڭ باسشىلىعىمەن الدەقانداي ۇتىمدى تەتىكتى ىسكە قوسادى دا, ەندى ءبىر قاراساق, بىزدەن وزىپ, الدىمىزدا كەتىپ بارا جاتادى دەگەن پىكىر. گازەت مۇنى سول كەزدە «فەنومەن نازارباەۆا» دەپ اتاعان ەدى. مۇندايعا قالاي قۋانىپ, ماساتتانبايسىز. ەلىمىزدىڭ بۇگىنگى قول جەتكىزگەن كەرەمەت تابىستارى تۇپتەپ كەلگەندە ەلباسىمىزدىڭ كەمەل اقىل-ويىنىڭ, ءوز ەلىن تەك قانا دۇرىس جولمەن باستاپ كەلە جاتقان كورەگەندىگىنىڭ, كەمەڭگەرلىگىنىڭ, جانقيارلىق ەڭبەگىنىڭ ارقاسى ەكەنى كۇمانسىز.
سايلاۋ كۇنى بەلگىلەندى. ەندىگى ماسەلە – سايلاۋعا كىمدەردىڭ تۇسەتىنىندە. بارشا جۇرت ءۇشىن ءبىر جايدىڭ باسى اشىق – ەلدەگى پرەزيدەنتتىك سايلاۋعا ەلباسىمىزدىڭ ءتۇسۋى كەرەك. كەشە الماتى جاقتان جاقسى حابار ەستىدىم. جازۋشىلار قاۋىمى الداعى سايلاۋعا نۇرسۇلتان نازارباەۆتىڭ ءتۇسۋىن سۇراعان شەشىم قابىلداپتى. مەن دە وسى ۇسىنىسقا قوسىلامىن. مۇنى حالقىمىزدىڭ ارمانداعان بيىكتەرىنە قول جەتكىزۋىنىڭ, كەمەل كەلەشەگىمىزدىڭ كەپىلى دەپ بىلەمىن.
بولات بوداۋباي,
جازۋشى, قازاقستاننىڭ ەڭبەك سىڭىرگەن قايراتكەرى, حالىقارالىق «الاش» سىيلىعىنىڭ يەگەرى.
ءبىز قازاق حالقىمەن, ەلباسىمەن بىرگەمىز!
2015 جىلدىڭ 14 اقپانىندا قازاقستان حالقى اسسامبلەياسىنىڭ كەڭەسى ەلىمىزدە كەزەكتەن تىس پرەزيدەنتتىك سايلاۋ وتكىزۋ تۋرالى باستاما كوتەرگەنى ءمالىم. بۇل باستاما بارشا قازاقستاندىقتار تاراپىنان جانە دەموكراتيالىق كۇشتەردىڭ «قازاقستان-2050» جالپىحالىقتىق كواليتسياسى تاراپىنان قولداۋ تاپتى.
وزگە ۇلت وكىلدەرىن وزەككە تەپپەي, باۋىرىنا العان قازىنالى قازاق ەلىن مەكەن ەتىپ وتىرعان بارشا ۇلت وكىلدەرى وزدەرىنىڭ بالالارى مەن كەلەر ۇرپاقتارىنىڭ بەيبىت تە بەرەكەلى, تىنىشتىق پەن تۇراقتىلىقتىڭ تۋى جەلبىرەگەن قازاقستانداي ەلدە جاقسى ءومىر سۇرگەنىن قالايدى. بولاشاق ءومىر بارشامىزدى الاڭداتادى. ەل ىشىندە تاتۋلىق پەن دوستىق قاتىناس نىعايا بەرۋ ءۇشىن ءبىزدىڭ بارشامىز ۇلكەن جاۋاپكەرشىلىكپەن اتسالىسامىز.
ءبىز قازاقستاننىڭ ىشكى-سىرتقى ساياسي ۇستانىمىن تولىقتاي قولدايمىز. بۇل – ءبىرىنشى كەزەكتە ەلىمىزدىڭ قاۋىپسىزدىگى دەگەن ءسوز. وسىنداي جاھاندىق كۇردەلى ماسەلەدە اسا جوعارى جەتىستىكتەرگە قول جەتكىزۋ ءۇشىن ءبارىمىز ەلباسىنىڭ توڭىرەگىنە توپتاسا ءبىلۋىمىز كەرەك.
مەملەكەت باسشىسىنىڭ ۇستانعان باعدارى مەن كورەگەن ساياساتىنىڭ ارقاسىندا بۇگىندە قازاقستان الەمدىك دارەجەدە ەڭ تۇراقتى قوعام مەن دامۋشى ەل رەتىندە ءوز بەينەسىن ايقىنداپ ءۇلگەردى. قازاق ەلىن مەكەن ەتكەن ءاربىر شاڭىراقتا شات كۇلكى مەن بەرەكەلى ءومىر, تەڭدىك پەن تەڭ قۇقىقتىق, اشىق اسپان مەن مەرەكەلى كۇندەر جەتەرلىك. بۇل – ءبىزدىڭ ورتاق قۋانىشىمىز!
مەملەكەت باسشىسى نۇرسۇلتان نازارباەۆتىڭ ەلىمىزدە كەزەكتەن تىس پرەزيدەنتتىك سايلاۋ وتكىزۋ تۋرالى جارلىققا قول قويعانىنا شىن كوڭىلدەن ريزاشىلىعىمىزدى بىلدىرە وتىرىپ, ءبىز ول كىسىدەن ءوز كانديداتۋراسىن وسى سايلاۋعا ۇسىنۋىن سۇراعىمىز كەلەدى. ويتكەنى, بىزدەر, كيەلى دە قاستەرلى قازاق ەلىن مەكەن ەتۋشى وزگە ۇلت پەن ۇلىس وكىلدەرى, ءوز تاعدىرىمىزدى ەلباسىنا سەنىپ تاپسىرا الامىز.
كنياز ميرزوەۆ,
قازاقستانداعى كۇردتەردىڭ «باربانگ» اسسوتسياتسياسىنىڭ پرەزيدەنتى.
الماتى.
سايلاۋ ۇدەرىسى
جوعارى دەموكراتيالىق ستاندارتتارعا ساي ۇيىمداستىرىلاتىن بولادى
سىرتقى ىستەر مينيسترلىگىندە ەرلان ىدىرىسوۆ قازاقستاندا اككرەديتتەلگەن ديپلوماتيالىق وكىلدىكتەردىڭ باسشىلارىنا ەلىمىزدە جوسپارلانىپ وتىرعان پرەزيدەنتتىك سايلاۋعا بايلانىستى بريفينگ وتكىزدى. ديپلوماتيالىق كورپۋس وكىلدەرى الدىندا ءسوز سويلەگەن ە.ىدىرىسوۆ, قازاقستاننىڭ جاڭا سىندارلى دامۋ كەزەڭىنە كىرگەنىن اتاپ ءوتتى. «ماسەلە مۇناي باعاسىنىڭ قۇلدىراۋى, رەسەيگە سالىنعان سانكتسيالار ىقپالى سەكىلدى ەكونوميكالىق فاكتورلاردىڭ قىسىمىندا, ۋكرايندىق داعدارىس پەن حالىقارالىق كواليتسيا كۇشتەرىنىڭ اۋعانستاننان شىعارىلۋىمەن بايلانىستى وڭىردەگى تۇراقسىزدىقتا. ءبىزدىڭ ەلىمىزدى جانە جالپى العاندا ءبىزدىڭ ءوڭىرىمىزدى سىناقتار كەزەڭى كۇتىپ تۇر», دەدى مينيستر. سونىمەن قاتار, ول قازاقستاندا زاماناۋي قاۋىپ-قاتەرلەر تۋرالى تولىق تۇسىنىك بار ەكەنىن جانە ولاردى ەڭسەرۋگە انىق جوسپار مەن قورلار بار ەكەنىن جەتكىزە وتىرىپ, ورتا مەرزىمدى جانە ۇزاق مەرزىمدى دامۋ باعدارلامالارى تۇراقتىلىقتى, گۇلدەنۋ مەن ەلىمىزدەگى ءومىر ءسۇرۋ ساپاسىن ارتتىرۋعا باعىتتالعانىن ەرەكشە اتاپ ءوتتى. «پرەزيدەنت ۇسىنعان «نۇرلى جول» باعدارلاماسىن, سونىمەن قاتار, «قازاقستان-2050» ستراتەگياسى مەن الەمنىڭ ەڭ دامىعان وتىز ەلى قاتارىنا كىرۋ سەكىلدى ۇزاق مەرزىمدى باسىمدىقتاردى ىسكە اسىرۋ بەلسەندى جۇمىس پەن باسىمدىقتارعا ايقىن نازاردى شوعىرلاندىرۋدى تالاپ ەتەدى. قازىر ۇكىمەتتەن ءبىرىزدى, ءتيىمدى, كەيبىر كەزدەرى ەرىك-جىگەرلى ءىس-ارەكەتتەر تالاپ ەتىلەدى», دەپ قوستى قر ءسىم باسشىسى. 26 ساۋىردە وتەتىن كەزەكتەن تىس پرەزيدەنتتىك سايلاۋ تۋرالى ايتا كەلە, قر ءسىم باسشىسى شەتەلدىك ديپلوماتتاردىڭ نازارىن جاڭا ماندات مەملەكەت پەن ونىڭ باسشىلىعىنا العا قويىلعان تاپسىرمالاردى جۇزەگە اسىرۋعا تەز ارادا كىرىسۋگە جانە الداعى كەزەڭدە سىرتقى فاكتورلاردىڭ تەرىس اسەرلەرىنە توتەپ بەرۋ ءۇشىن بەلسەندى جۇمىس اتقارۋعا, العا قويىلعان ماقساتتاردى اتقارۋدى جانە ەلىمىزدەگى حالىقتىڭ ءومىر ءسۇرۋ ساپاسىن ارتتىرۋدى قامتاماسىز ەتۋگە مۇمكىندىك بەرەتىنىنە اۋداردى. پرەزيدەنتتىك سايلاۋدىڭ ۇيىمداستىرۋ ماسەلەلەرىنە توقتالا كەلە, ول قازاقستاندىق تاراپ سايلاۋ ۇدەرىسىن جوعارى دەموكراتيالىق ستاندارتتارعا ساي ۇيىمداستىرۋدى قامتاماسىز ەتۋ ءۇشىن بارلىق مۇمكىن شارالاردى قابىلدايتىنىن ەرەكشە ايتىپ ءوتتى. «ورتالىق سايلاۋ كوميسسياسى ەقىۇ جانە باسقا دا بەدەلدى حالىقارالىق ۇيىمداردىڭ بۇدان بۇرىن جاساعان ۇسىنىستارىن ەسكەرە وتىرىپ, سايلاۋدى وتكىزۋدىڭ جوعارى ۇيىمداستىرۋ دارەجەسىن قامتاماسىز ەتەتىندىگىنە سەنەمىن, ال باسقا مۇددەلى ورگاندار ولاردان قازاقستان زاڭناماسى تالاپ ەتەتىن شارالاردى جۇزەگە اسىرۋ ءۇشىن بار كۇش-جىگەرىن سالادى», دەپ مالىمدەدى ە.ىدىرىسوۆ. سونىمەن بىرگە, ول سىرتقى ىستەر مينيسترلىگى ديپلوماتيالىق كورپۋس وكىلدەرىن, حالىقارالىق ۇيىمداردى, شەتەلدىك بايقاۋشىلار مەن بۇقارالىق اقپارات قۇرالدارىن سايلاۋعا باقىلاۋ جۇرگىزۋلەرى ءۇشىن شاقىراتىنى تۋرالى حاباردار ەتتى. «ءبىز سايلاۋ ۇدەرىسىنىڭ اشىقتىق, ادىلەتتىلىك جانە باسەكەلەستىك قاعيدالارىنا, ازاماتتاردىڭ ىشكى زاڭناما نورمالارىنا جانە حالىقارالىق ستاندارتتارعا ساي ءوز ويلارىن ەركىن ءبىلدىرۋىن قامتاماسىز ەتۋگە بەيىمدىلىگىمىزدى راستايمىز», دەپ قازاقستان سىرتقى ساياسات ۆەدومستۆوسىنىڭ باسشىسى ءسوزىن تۇيىندەدى. «ەگەمەن-اقپارات».
ءبىراۋىزدان قولدادى
«نۇر وتان» پارتياسى «مادەنيەت» باستاۋىش ۇيىمىنىڭ جينالىسى بولدى. وندا «نۇر وتان» پارتياسى «بىرلىك» فيليالى «مادەنيەت» باستاۋىش پارتيا ۇيىمى قۇرامىنداعى مادەنيەت جانە ونەر قايراتكەرلەرى, سپورت وكىلدەرى قازاقستان حالقى اسسامبلەياسى كەڭەسىنىڭ كەزەكتەن تىس پرەزيدەنتتىك سايلاۋ وتكىزۋ تۋرالى باستاماسىن قولدادى. ۇلتتىق اكادەميالىق كىتاپحانا ديرەكتورى ءۇمىتحان مۇڭالباەۆا كەزەكتەن تىس وتەتىن پرەزيدەنتتىك سايلاۋعا پارتيا توراعاسى ن.ءا.نازارباەۆتىڭ كانديداتۋراسىن ۇسىنىپ, ءسوز سويلەدى. – تاريحي ولشەم تۇرعىسىنان العاندا, اسا قىسقا ۋاقىتتا ەلباسى نۇرسۇلتان نازارباەۆتىڭ باسشىلىعىمەن ەلىمىزدە ەكونوميكالىق جانە ساياسي تۇرعىدا عانا ەمەس, الەۋمەتتىك سالالاردا دا ەداۋىر جۇمىستار جۇزەگە اسىرىلۋدا. قاراپايىم ادامدار ەشقاشان نازاردان تىس قالىپ كورگەن جوق. الەمدەگى ءتۇرلى جاعىمسىز قۇبىلىستارعا, ەكونوميكالىق كەلەڭسىز جاعدايلارعا قاراماستان, ەلباسى مەملەكەتىمىزدىڭ الەۋمەتتىك ءمىندەتتەرىن قورعاپ, ءوزىنىڭ نىق ۇستانىمىن كورسەتتى, – دەدى ۇلتتىق اكادەميالىق كىتاپحانانىڭ ديرەكتورى. ول ەلباسىنىڭ مەملەكەتتىك ساياساتىن قازاقستاندىقتاردىڭ قولدايتىنىنا سەنىم ءبىلدىردى. بۇل ۇسىنىسقا بەلگىلى قوعام قايراتكەرى, فيلوسوفيا عىلىمدارىنىڭ دوكتورى, پروفەسسور عاريفوللا ەسىم دە قوسىلا وتىرىپ, كەزەكتەن تىس پرەزيدەنتتىك سايلاۋدا پارتيا توراعاسىنىڭ كانديداتۋراسىن قولداۋ ءاربىر نۇروتاندىقتىڭ پاتريوتتىق بورىشى ەكەنىن تىلگە تيەك ەتتى. «بولاشاق» باعدارلاماسىنىڭ تۇلەگى (City Univercity London), ونەرتانۋ ماگيسترى ەرمەك راقىموۆتىڭ پىكىرىنشە, ەلىمىزدىڭ, پارتيامىزدىڭ تاريحى كورسەتىپ وتىرعانداي, قازاقستان پرەزيدەنتى – مەملەكەتىمىزدىڭ ودان ءارى دامۋىنىڭ سەنىمدى كەپىلى. ءبىزدىڭ ۇجىمدا جۇمىس جاسايتىن بولاشاقتىقتاردىڭ اتىنان «بولاشاق» پرەزيدەنتتىك باعدارلاماسى بويىنشا الەمنىڭ ەڭ ۇزدىك جوعارى وقۋ ورىندارىندا ءبىلىم الۋعا مۇمكىندىك بەرگەنى ءۇشىن العىس ايتا وتىرىپ, ءوزىن ۇسىنعان جاعدايدا پرەزيدەنتتىك سايلاۋدا نۇرسۇلتان ءابىش ۇلىنىڭ كانديداتۋراسىن قولدايتىنىمدى ايتقىم كەلەدى دەدى ول. سپورت وكىلدەرى – «استانا ارەنا» ستاديونىنىڭ ديرەكتورى باۋىرجان مۇقاشەۆ, 2014 جىلعى ازيا ويىندارىنىڭ جۇلدەگەرى دانابەك سۋجانوۆ تا سايلاۋعا تۇسكەن جاعدايدا ن.ءا.نازارباەۆتىڭ كانديداتۋراسىن قولدايتىنىن ءبىلدىردى. – ەلىمىزدىڭ بارلىق سپورتشىلارى اتىنان ءبىز الداعى بولاتىن پرەزيدەنتتىك سايلاۋدا, ەگەر ەلباسى سايلاۋعا تۇسكەن جاعدايدا, نۇرسۇلتان نازارباەۆتىڭ كانديداتۋراسىن قولدايمىز, – دەپ مالىمدەدى. «نۇر وتان» پارتياسى «بىرلىك» فيليالى «مادەنيەت» باستاۋىش پارتيا ۇيىمىنىڭ مۇشەلەرى الداعى بولاتىن قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىنا قاتىسۋ ءۇشىن نۇرسۇلتان نازارباەۆتىڭ كانديداتۋراسىن ۇسىنۋعا ءبىراۋىزدان داۋىس بەردى. «ەگەمەن-اقپارات».دامۋدىڭ باستى باعدارى
قازاقستان رەسپۋبليكاسى ۇلتتىق ينجەنەرلىك اكادەمياسىندا كەزەكتى سەسسيا بولىپ ءوتتى. سەسسيا قاتىسۋشىلارى 2015 جىلدىڭ 26 ساۋىرىنە بەلگىلەنگەن كەزەكتەن تىس پرەزيدەنتتىك سايلاۋ وتكىزۋ تۋرالى ەلباسى ن.ءا.نازارباەۆتىڭ شەشىمىن ءبىراۋىزدان قولدادى. اكادەميا پرەزيدەنتى باقىتجان جۇماعۇلوۆ ءوزىنىڭ سەسسيانى اشار العى سوزىندە مەملەكەت باسشىسىنىڭ سايلاۋدى وتكىزۋ ءجونىندەگى قازاقستان حالقىنا ءۇندەۋىنىڭ مانىنە كەڭىرەك توقتالىپ ءوتتى. – گەوساياسي قاراما-قايشىلىقتار اسقىنىپ تۇرعان جاعدايدا قازاقستاندىقتاردى ۇلتتىق قاۋىپسىزدىگىمىز الاڭداتادى, حالقىمىز پرەزيدەنت نۇرسۇلتان نازارباەۆ جۇرگىزىپ وتىرعان ىشكى جانە سىرتقى ساياساتىمىزدىڭ تۇراقتىلىعىن قولدايدى, – دەدى شەشەن ءوز سوزىندە. سەسسيا قاتىسۋشىلارى – عالىمدار, ينجەنەرلەر, ءوندىرىستىڭ بەلگىلى ماماندارى, ءىرى كومپانيالار مەن ۇيىمداردىڭ جەتەكشىلەرى وزدەرىنىڭ سوزىندە بەيبىتشىلىك پەن كەلىسىم – جالپىحالىقتىق باستى جەتىستىك ەكەنىن ايتىپ, ونى قورعاپ, كۇندەلىكتى ەڭبەگىمىزبەن نىعايتىپ وتىرۋىمىزدىڭ قاجەتتىگىنە باسا نازار اۋداردى. ەلباسى ايتقانداي, «بىرلىك جانە تۇراقتىلىق – بۇل ءبىزدىڭ جاۋاپتى تاڭداۋىمىز! بۇل – وتانىمىز دامۋىنىڭ باستى فورمۋلاسى». سەسسيا جۇمىسىندا عىلىمي-زەرتتەۋلەردى جۇزەگە اسىرۋ بويىنشا بىرقاتار اكادەميك – ءۋاليحان بيشىمباەۆ, ۇزاقباي قارابالين, اسقار ق ۇلىباەۆ, ءنادىر ءنادىروۆ سياقتى عالىمدار شىعىپ سويلەپ, ءوز ويلارىمەن ورتاقتاستى. سەسسيا جۇمىسىنىڭ سوڭىندا پروفەسسور تۇرلىبەك ىسقاقوۆقا ءو.جولداسبەكوۆ اتىنداعى سىيلىق, پروفەسسور الەكساندر تروفيموۆكە ش.شوكين اتىنداعى سىيلىق, جاس عالىم ديلنارا زاكيروۆاعا ق.تۇرىسوۆ اتىنداعى سىيلىق تاپسىرىلدى. شارافاددين ءامىروۆ, «ەگەمەن قازاقستان». الماتى.
