اۋىل ادامدارىنىڭ قۋانىشىنا وبلىس اكىمى اسحات شاحاروۆ تا ورتاقتاسىپ, سالتاناتتى راسىمگە ارنايى كەلدى. ء«بىز بۇگىن اقكەمەر مەن كەمەر اۋىلدارى تۇرعىندارى كوپتەن كۇتكەن قۋانىشتى وقيعانىڭ كۋاسى بولىپ وتىرمىز. بۇل جوبا «وڭىرلەردى دامىتۋ» باعدارلاماسى اياسىندا جۇزەگە اسىرىلىپ وتىر. ناتيجەسىندە, 378 ادام تۇراتىن 71 ءۇي مەن ءۇش الەۋمەتتىك نىسان تابيعي گازعا قوسىلدى. وسى ماقساتتا وڭىردە جوسپارلانعان جوبالاردى كەزەڭ-كەزەڭىمەن ىسكە اسىرا بەرەمىز», دەيدى ءوڭىر باسشىسى.
ءتورت جۇزگە جۋىق تۇرعىنى بار اقكەمەر اۋىلى وسىدان ەكى جىل بۇرىن سۋ تاسقىنىنىڭ زاردابىن كوردى. ساۋىردە ويىل وزەنى ارناسىنان اسىپ, اۋىل ادامدارىنىڭ ۇيلەرى مەن شارۋاشىلىق قۇرىلىسى, قورا-قوپسىسى ءب ۇلىنىپ, داعدارىپ قالدى. دەگەنمەن, ەلدىڭ بىرلىگى مەن مەملەكەتتىڭ قولداۋى ارقاسىندا اپاتتىڭ زاردابى قىسقا مەرزىم ىشىندە جويىلىپ, 16 جاڭا تۇرعىن ءۇي بوي كوتەردى, جولدار مەن مەكتەپ قالپىنا كەلتىرىلدى. ەندى تۇرعىنداردىڭ تۇرمىسىن جاقسارتۋعا باعىتتالعان تاعى ءبىر ماڭىزدى قادام رەتىندە اۋىلعا كوگىلدىر وتىن جەتتى. گاز قۇبىرىنىڭ اۋىلىشىلىك جەلىسىنە العاشقى بولىپ اقكەمەر اۋىلىنىڭ تۇرعىنى, «دارحان-1» شارۋا قوجالىعىنىڭ جەتەكشىسى وتەمىس قوجاعاليەۆتىڭ ءۇيى قوسىلدى. اۋىلدىڭ وزگە دە تۇرعىندارى كوگىلدىر گازدىڭ يگىلىگىن كورە باستاپ, قۋانىسىپ جاتىر.
«مەن وسى اۋىلدا 35 جىلدان بەرى تۇرامىن. وسىندا تۋىپ-ءوستىم. گازدىڭ كەلۋى بارىمىزگە ۇلكەن قۋانىش بولدى. بۇرىن ەسكى ءۇيىمىزدى تەزەك پەن كومىر جاعىپ جىلىناتىنبىز. وتىندى الدىن الا دايىنداپ, پەشتى ۇنەمى باقىلاپ وتىرۋ كەرەك ەدى. ەكى جىل بۇرىن جاڭا ۇيگە كوشسەك تە, پەش جاعۋدى جالعاستىردىق. ەندى گازدىڭ كەلۋىمەن ءومىرىمىز ايتارلىقتاي جەڭىلدەيدى. ءۇيىمىز جىلى ءارى تازا بولادى, وتىن دايىنداۋعا كەتەتىن ۋاقىت پەن كۇشتەن قۇتىلامىز. بۇل تەك قولايلىلىق قانا ەمەس, وتباسى بيۋدجەتىن ۇنەمدەۋگە دە مۇمكىندىك بەرەدى», دەدى اقكەمەر اۋىلىنىڭ تۇرعىنى سالتانات ساپيەۆا.
جاسى سەكسەنگە تاياعان زەينەتكەر جۇماعۇل نۇرعاليەۆا دا وسىناۋ يگىلىكتى ىسكە ۇلەس قوسقان ازاماتتارعا العىسىن ءبىلدىردى.
«مەنىڭ بار عۇمىرىم وسى اۋىلدا ءوتتى. بالالارىمدى ءوسىرىپ, 2002 جىلى زەينەتكە شىقتىم. بۇرىن قىستا وتە قيىن بولاتىن. ۇيدەگى پەشكە تۇندە دە تۇرىپ, وتىن نەمەسە كومىر سالۋعا تۋرا كەلەتىن. قىس مەزگىلىندە وتىنعا شامامەن 180 مىڭ تەڭگە جۇمسايتىنبىز. سونىمەن قاتار كۇل شىعارىپ, وتتى ۇنەمى باقىلاۋدا ۇستاۋ قاجەت ەدى. سوندىقتان گازدىڭ كەلۋى – ءبىز ءۇشىن ۇلكەن جەڭىلدىك. ەندى ءۇيىمىز جىلى ءارى جايلى بولادى. وسى ارمانىمىزدىڭ ورىندالۋىنا ۇلەس قوسقان بارلىق ازاماتقا العىس بىلدىرەمىن», دەدى اۋىل تۇرعىنى.
وسى كۇنى اقكەمەرگە جاقىن 770 تۇرعىنى بار كەمەر اۋىلىندا دا گاز قۇبىرىن قوسۋ ءراسىمى بولدى. كوگىلدىر وتىن اۋىلدىڭ 159 ءۇيى مەن الەۋمەتتىك نىسانىنا جەتكىزىلدى. «اسك–7 نس» جشس 207,3 ملن تەڭگەگە اقكەمەردەن كەمەرگە گاز قۇبىرىن تارتتى. بۇل اۋىلدا گاز جەلىسى ەڭ ءبىرىنشى بولىپ وبلىستىق «مەرەيلى وتباسى» بايقاۋىنىڭ جەڭىمپازى, «سپارتاك» شارۋا قوجالىعىنىڭ باسشىسى سپارتاك تورەمۇراتوۆتىڭ شاڭىراعىنا قوسىلدى. اۋىلدىڭ بۇگىنگى جاڭا تىنىسىنا كەمەر تۇرعىنى كەنجەباي قازماعامبەتوۆ جوعارى باعا بەردى.
ء«بىز باسقا اۋىلداردىڭ گازعا قوسىلىپ جاتقانىن كورىپ, «شىركىن-اي, بىزگە گاز قاشان كەلەر ەكەن؟» دەپ ارماندايتىنبىز. مىنە, سول ارمانىمىز ورىندالدى. قازىر ءبىزدىڭ جاعدايىمىز قالادان كەم ەمەس. جولىمىز بار, اۋىزسۋ مەن ەلەكتر جارىعى ۇزدىكسىز بەرىلەدى. ينتەرنەت تۇراقتى جۇمىس ىستەيدى. قالاعا نەبارى ەكى ساعاتتا جەتە الامىز. بولىپ جاتقان وڭ وزگەرىستەرگە وتە ريزامىز. ەل پرەزيدەنتىنە جانە وبلىس اكىمىنە اۋىل تۇرعىندارىنا كورسەتىپ وتىرعان قامقورلىعى مەن قولداۋى ءۇشىن العىس ايتامىز», دەيدى اۋىل تۇرعىنى.
اۋىل ىشىنە ورناتىلعان گاز ينفراقۇرىلىمىنىڭ ساپاسىن وبلىس باسشىسى اسحات شاحاروۆ پەن اۋىل اقساقالدارى بىرگە ارالاپ كوردى. كوگىلدىر وتىننىڭ كەلۋى تۇرمىستىق جەڭىلدىك قانا ەمەس, سونىمەن قاتار كاسىپكەرلىكتىڭ, اسىرەسە شارۋا قوجالىقتارىنىڭ جۇمىسىن جانداندىرۋعا ۇلكەن سەرپىن بەرمەك. جالپى, اقتوبە وڭىرىندەگى ەلدى مەكەندەردى گازداندىرۋ جۇمىسى مۇنىمەن توقتاپ قالمايدى. وبلىس اكىمدىگىنىڭ مالىمەتىنشە, جىل سوڭىنا دەيىن جوسپارلانعان اۋىلدارعا دا كەزەڭ-كەزەڭىمەن تابيعي گاز جەتكىزىلەدى. بۇل – «اۋىل – ەل بەسىگى» مەن وڭىرلەردى دامىتۋ باعدارلاماسى بويىنشا ىسكە اسىرىلعان جوبا.
اقتوبە وبلىسى
