پاۆلوداردا حالىقتار دوستىعى جايىندا جيىن ءوتتى

پاۆلودار. 1 ناۋرىز. پاۆلوداردا «قازاقستان حالقى اسسامبلەياسى –جاھاندانۋ ۇردىسىندەگى دوستىق ۇلگىسى» اتتى عىلىمي-تاجىريبەلىك كونفەرەنتسيا ءوتتى. بۇل تۋرالى egemen.kz ءتىلشىسى حابارلادى. وبلىس ورتالىعىنداعى س.تورايعىروۆ اتىنداعى ۋنيۆەرسيتەتتە وتكەن كونفەرەنتسيادا «سلاۆيان مادەني ورتالىعى» قوعامدىق بىرلەستىگىنىڭ ءتورايىمى تاتيانا كۋزينا بايانداما جاسادى. ول ءسوزىنىڭ سوڭىندا ستۋدەنتتەردى 26 ءساۋىر كۇنى وتەتىن پرەزيدەنتتىك سايلاۋعا بەلسەندى تۇردە قاتىسۋعا شاقىردى. پەداگوگيكالىق ينستيتۋتتىڭ ەۋرازيالىق ينتەگراتسيا جانە ستۋدەنتتىك اسسامبلەيا ورتالىعىنىڭ ديرەكتورى ساۋلە مامىتوۆا جانە «ەلپيدا وبلىستىق گرەك ۇلتتىق مادەني ورتالىعى» قوعامدىق بىرلەستىگىنىڭ ءتورايىمى ليۋدميلا يفاندوپۋلو ءسوز الىپ, «قازاقستان حالقى اسسامبلەياسى-20 ىزگى ءىس» رەسپۋبليكالىق ءىس-شاراسىنىڭ قوعام ءۇشىن ماڭىزدىلىعىن اتاپ ءوتتى. جيىن بارىسىندا جاھاندانۋ ۇردىسىندە ەلىمىزدەگى حالىقتاردىڭ قوعامدىق كەلىسىم مەن ۇلتتىق بىرلىكتى ساقتاۋعا باعىتتالعان جۇمىستارىنىڭ ستراتەگياسى ماڭگىلىك ەكەنى ايتىلدى. سونداي-اق, كونفەرەنتسياعا قاتىسقان ستۋدەنتتەر دە ەل تۇراقتىلىعىن نىعايتۋداعى ەلباسىنىڭ پاراساتتى ساياسي باعىت-باعدارىن قولدايتىندارىن تانىتتى. فاريدا بىقاي. دەرەك, سۋرەت: egemen.kz.