باتىس قازاقستاندا سۋارمالى جەرلەرگە قاتىستى جونسىزدىك كوپ

ورال. 2 ناۋرىز. باتىس قازاقستان وبلىسىندا سۋارمالى جەرلەر ءتيىمدى پايدالانىلماۋدا. بۇل تۋرالى egemen.kz ءتىلشىسى حابارلادى. «قازسۋشار» رمك باتىس قازاقستان فيليالىنىڭ ديرەكتورى قازىبەك كەنجەعاليەۆتىڭ ايتۋىنشا, وڭىردەگى 255 مىڭ گەكتار سۋارمالى القاپتىڭ تەڭ جارتىسىنا جۋىعىن قالپىنا كەلتىرۋ قاجەت. بۇل ءۇشىن ەڭ الدىمەن تەحنيكالىق-ەكونوميكالىق نەگىزدەمەلەر مەن جوبالاۋ-سمەتالىق قۇجاتتار جاسالۋى ءتيىس. مۇنسىز قاراجات قاراستىرىلمايدى. الايدا, بۇل ءىستىڭ دەڭگەيى ورال وڭىرىندە تومەن ەكەنى قىنجىلتادى. سونداي-اق, تۇراقتى سۋارمالى جەرلەردىڭ كولەمى 55 مىڭ گەكتاردان اسپايدى. مۇنىڭ تەك 5 مىڭ گەكتارى عانا پايدالانىلادى. نەگە؟ بۇل ساۋالعا جاۋاپ بەرگەن وبلىس اكىمىنىڭ ءبىرىنشى ورىنباسارى ارمان وتەعۇلوۆ قازىر بۇل جەرلەر شارۋالاردىڭ قولىندا ەكەنىن ايتتى. دەگەنمەن, ولاردىڭ تاراپىنان ەنجارلىق ەتەك العان. ءتىپتى وزگەسىن ايتپاعاندا, سۋارمالى جەرگە يەلىك ەتۋشىلەر ونىڭ ءجاي-كۇيىن جاقسارتۋ ءۇشىن وزدەرىنە بەرىلگەن دەمەۋقارجىنى يگەرۋگە دە ق ۇلىقسىزدىق تانىتىپ كەلەدى. ونىڭ كولەمى 29 ميلليون تەڭگەنى قۇرايدى. تۇتاستاي العاندا وڭىردە شالعاي اۋداندارداعى سۋ نىساندارىن تۇگەندەۋ جۇمىستارىنىڭ دا بۇگىنگى دەڭگەيى ءماز ەمەس. ودان بولەك, اپاتتى جاعدايداعى سۋ نىساندارىنا كۇردەلى جوندەۋ جۇرگىزۋ جۇمىستارى ءوز كەزەگىن كۇتىپ تۇر. قازىر وڭىردە ءبىرىنشى كەزەكتە ورال قالاسى ماڭىندا «جاسىل بەلدەۋدى» قۇرۋ جۇمىستارىن جالعاستىرۋ جانە وبلىس ورتالىعىمەن ىرگەلەس زەلەنوۆ, تەرەكتى اۋداندارىنداعى سۋارمالى جەرلەردى قالپىنا كەلتىرۋ قاجەت بولىپ تۇر. تەمىر قۇسايىن. دەرەك: egemen.kz. سۋرەت: abai.kz.