فوتو: senate.parlam.kz
زاڭنامالىق وزگەرىستەر راقىمشىلىقتى جۇزەگە اسىرۋمەن قاتار قىلمىستىق, قىلمىستىق-پروتسەستىك جانە اكىمشىلىك زاڭنامانى جەتىلدىرۋگە باعىتتالعان.
قۇجاتقا سايكەس, قىلمىستىق تەرىس قىلىق جاساعاندار, اۋىر ەمەس قىلمىس ءۇشىن سوتتالعاندار جانە كەلتىرىلگەن زالالدى تولىق وتەگەن جاعدايدا كەيبىر ورتاشا اۋىرلىقتاعى قىلمىس جاساعان ازاماتتار جاۋاپتىلىقتان نەمەسە نەگىزگى جازادان بوساتىلۋى مۇمكىن. سونىمەن قاتار بىرقاتار سوتتالعانداردىڭ وتەلمەگەن جازا مەرزىمىن قىسقارتۋ كوزدەلگەن.
الايدا راقىمشىلىق سىبايلاس جەمقورلىق, تەرروريزم, ەكسترەميزم, كامەلەتكە تولماعاندارعا قارسى جىنىستىق قىلمىستار, زورلاۋ, ازاپتاۋ, كىسى ءولتىرۋ, مەملەكەتتىك ساتقىندىق جانە باسقا دا اسا اۋىر قىلمىستار ءۇشىن سوتتالعاندارعا قولدانىلمايدى.
زاڭداعى باستى جاڭاشىلدىقتاردىڭ ءبىرى – اكىمشىلىك راقىمشىلىق ينستيتۋتىنىڭ ەنگىزىلۋى. قازاقستان تاۋەلسىزدىك العاننان بەرى العاش رەت ازاماتتار مەن كاسىپكەرلەردىڭ, نوتاريۋستاردىڭ, ادۆوكاتتاردىڭ جانە جەكە سوت ورىنداۋشىلارىنىڭ ورىندالماعان اكىمشىلىك ايىپپۇلداردان نەمەسە ولاردىڭ قالعان بولىگىنەن بوساتىلۋى قاراستىرىلىپ وتىر.
سونىمەن قاتار راقىمشىلىق راسىمدەرىن تسيفرلاندىرۋ كوزدەلگەن. بۇل راقىمشىلىققا ىلىنەتىن تۇلعالاردى اۆتوماتتى تۇردە انىقتاۋعا جانە شەشىمدەردى ەلەكتروندى فورماتتا قابىلداۋعا مۇمكىندىك بەرەدى.
ەسكە سالايىق, كەشەندى قىلمىستىق جانە اكىمشىلىك راقىمشىلىق تۋرالى باستامانى مەملەكەت باسشىسى 17 ناۋرىزدا جاڭا كونستيتۋتسيانىڭ قابىلدانۋىنا بايلانىستى جاريالاعان بولاتىن. بۇعان دەيىن زاڭ جوباسى ماجىلىستە تالقىلاۋدان ءوتتى.
