رەسەيدىڭ چەليابى قالاسىندا ىنتىماقتاستىق فورۋمى اياقتالدى

قوستاناي. 1 ناۋرىز. چەليابى وبلىسىنىڭ گۋبەرناتورى بوريس دۋبروۆسكي مەن قوستاناي وبلىسىنىڭ اكىمى نۇرالى سادۋاقاسوۆ 2018 ىلعا دەيىنگى ىنتىماقتاستىق كەلىسىمىنە قول قويدى. قۇجات ساۋدا-ونەركاسىپ, عىلىمي-تەحنيكالىق جانە مادەني سالالارداعى جوبالاردى بىرلەسىپ جۇزەگە اسىرۋدى كوزدەيدى. بۇل تۋرالى ng.kz حابارلادى. وتكەن جىلى چەليابى وبلىسىنىڭ دەلەگاتسياسى قوستانايدا بولعان ەدى. ەندى قوستانايلىقتار چەليابى وبلىسىندا بولدى. قوناقتاردى كۇتىپ العان گۋبەرناتور بوريس دۋبروۆسكي: «اتىراۋ قالاسىندا وتكەن فورۋمدا دا قازاقستان مەن رەسەي پرەزيدەنتتەرى ايماقارالىق ىنتىماقتاستىقتا ەكى جاقتى تاۋار اينالىمى 50 پايىزعا دەيىن جەتەتىنىن ايتقان بولاتىن. بۇل ءبىزدىڭ كوپجىلدىق ارىپتەستىگىمىز جالپى مەملەكەتتىك كولەمدە ناتيجە بەردى دەگەن ءسوز» دەدى. گۋبەرناتور بۇل ارىپتەستىك قاتىناستاردى ەۋرازيالىق ەكونوميكالىق وداق شەڭبەرىندە پىسىقتاي تۇسەتىندىكتەرىن ايتتى. شەكارالاس وڭىرلەردىڭ قاتىسۋىنا, كاپيتال, تاۋار, قىزمەت پەن جۇمىسشى كۇشىن الماسۋىنا ەشقانداي كەدەرگى بولماۋى ءتيىس. گۋبەرناتوردىڭ ءسوزىن قوستاناي وبلىسىنىڭ اكىمى نۇرالى سادۋاقاسوۆ جانداندىرا ءتۇستى: «قوستاناي وبلىستىق اۋرۋحاناسى مەن چەليابى وبلىستىق مەديتسينالىق ورتالىقتارى اراسىندا مەديتسينالىق كەڭەستەر الۋدى ۇيىمداستىرۋعا قول جەتكىزگەن ەدىك. بۇل ناۋقاستاردىڭ مەديتسينالىق كومەك الۋ مۇمكىندىگىن كەڭەيتە ءتۇستى. چەليابى وبلىسىنداعى جۇرەك قان اينالىسمى, ونكولوگيا سالاسىنداعى كادرلاردىڭ جوعارى بىلىكتىلىگىن, عىلىمي پوتەنتسيالىن ەسكەرە وتىرىپ, قوستاناي وبلىسى دارىگەرلەرىنىڭ كەڭەس الۋىنا سەنىممەن قارايمىز» دەدى. وتكەن ىلدىڭ العاشقى جارتىسىندا قازاقستان مەن وڭتۇستىك ۋرالدىڭ تاۋار اينالىمى 1 182,7 ميلليون دوللار بولعان. چەليابى وبلىسىندا قازاقستاندىق كاسىپكەرلەر قۇرىلتايشىسى بولىپ سانالاتىن 129 كاسىپورىن جۇمىس ىستەيدى. قوستاناي وبلىسىنىڭ اكىمى نۇرالى سادۋاقاسوۆ جاڭا ەكونوميكالىق كەڭىستىكتە كورشىلەردىڭ جەڭىل ءجۇرىپ-تۇرۋى كەرەكتىگىن ايتتى. شەگارالىق بەكەتتەردە ماشينالار 6-7 ساعات كۇتىپ تۇرىپ قالادى. سوندىقتان, قازاق جاعى شەكارادان وتكىزۋ بەكەتىن ۇلعايتۋ جوباسىن جاساپ وتىر. فورۋم اياسىندا ساۋدا-ەكونوميۋكالىق, عىلىمي-تەحنيكالىق جانە مادەني ىنتىماقتاستىق جونىندە بىرنەشە مەموراندۋمعا قول قويىلدى. چەليابى وبلىستىق ەكونوميالىق دامۋ ءمينيسترى تاتيانا كۋزنەتسوۆا وڭتۇستىك ۋرالعا كەلگەن ينۆەستورلار ءۇشىن ارنايى قولداۋ باعدارلاماسى بار ەكەندىگىنەن حاباردار ەتتى. قوستانايلىق دەلەگاتسيا چەليابى وبلىسىنداعى جاڭا تەحنولوگيامەن ىستەيتىن كاسىپورىنداردى ارالادى. ءنازيرا جارىمبەتوۆا. دەرەك, سۋرەت: ng.kz