فوتو: Getty images
يران قۇراماسى مۋنديالعا قاتىسۋ قۇقىعىن العانىمەن, تۋرنير الدىنداعى دايىندىق كوماندا ءۇشىن قيىندىقپەن باستالدى. قازىرگى تاڭدا يران قۇراماسى مەكسيكانىڭ تيحۋانا قالاسىنا ورنالاسقان. كوماندا الەم چەمپيوناتى كەزىندە ءدال وسى جەردە بازاسىن قۇرماق.
الايدا دەلەگاتسيا مۇشەلەرىنىڭ ءبىر بولىگى اقش ۆيزاسىن ءالى الا المادى. يراندىق باق مالىمەتىنشە, اقش-قا كىرۋگە رۇقسات بەرىلمەگەندەردىڭ قاتارىندا يران فۋتبول فەدەراتسياسىنىڭ پرەزيدەنتى مەن ونىڭ ورىنباسارى دا بار. جالپى سانى15 ادام.
فۋتبولشىلاردىڭ وزدەرى ۆيزا العانىمەن, فەدەراتسيا قازىر فيفا ارقىلى قالعان دەلەگاتسيا مۇشەلەرىن الەم بىرىنشىلىگى وتەتىن ەلگە كىرگىزۋگە تىرىسىپ جاتىر.
فۋتبولدان الەم چەمپيوناتى-2026: ويىنداردىڭ تولىق كەستەسى مەن ۋاقىتى بەلگىلى بولدى
مەكسيكاداعى يران ەلشىسىنىڭ ايتۋىنشا, كوماندا اقش-قا تەك ماتچ وتەتىن كۇنى عانا ۇشىپ بارا الادى. ويىن اياقتالعان سوڭ يراندىق فۋتبولشىلار بىردەن مەكسيكاعا قايتا ورالۋى ءتيىس. اقش اۋماعىندا تۇنەۋگە رۇقسات بەرىلمەيدى. امەريكا تاراپى مۇنداي شەكتەۋلەردى قاۋىپسىزدىك تالاپتارىمەن ءتۇسىندىرىپ وتىر.
ايتا كەتەيىك, يران قۇراماسى توپتىق كەزەڭدەگى بارلىق ويىندارىن اقش-تا وتكىزەدى. كوماندا لوس-اندجەلەستە جاڭا زەلانديا جانە بەلگيامەن كەزدەسسە, سيەتلدە مىسىرعا قارسى وينايدى.
ەسكە سالايىق, الەم چەمپيوناتى-2026 11 ماۋسىم مەن 19 شىلدە ارالىعىندا اقش, كانادا جانە مەكسيكادا وتەدى. تۋرنير تاريحىندا العاش رەت الەم بىرىنشىلىگىنە 48 قۇراما قاتىسادى.
