فوتو: Getty
سالىستىرمالى تۇردە ايتساق, كوپتەگەن حالىقارالىق اۋەجايدىڭ ۇشۋ-قونۋ جولاعىنىڭ ۇزىندىعى 3 مىڭ مەتردەن اسادى. لۋكلا اۋەجايىنىڭ تاعى ءبىر ەرەكشەلىگى – ۇشۋ-قونۋ جولاعىنىڭ 12 پايىزدىق ەڭىسى. بۇل ۇشاقتاردىڭ قونۋ كەزىندە جىلدامدىعىن ازايتۋعا كومەكتەسەدى. دەگەنمەن مۇندا قاتەلىككە ورىن جوق. ۇشاق تىم ۇزاپ كەتسە, تاۋ بەتكەيىنە سوعىلادى, ال قونۋعا ەرتە تومەندەسە, تەرەڭ جارتاستان قۇلاپ كەتۋ قاۋپى بار.
ستاتيستيكالىق مالىمەتتەرگە سۇيەنسەك, اۋەجاي اشىلعاننان بەرى مۇندا 7 ءىرى اپات تىركەلىپ, 56 ادام قازا تاپقان. قاۋىپتى جاعداي تەك قىسقا ۇشۋ جولاعىمەن شەكتەلمەيدى. بيىك تاۋلى ايماقتا اۋا تىعىزدىعىنىڭ تومەن بولۋى ۇشاق قوزعالتقىشتارىنىڭ جۇمىسىنا اسەر ەتەدى. سونىڭ سالدارىنان ۇشاقتاردىڭ كوتەرىلۋى مەن تەجەلۋى كۇردەلەنە تۇسەدى.
سونىمەن قاتار گيمالاي وڭىرىندەگى اۋا رايى قۇبىلمالى كەلەدى. اسپان اشىق بولىپ تۇرىپ بىرنەشە مينۋتتىڭ ىشىندە قالىڭ تۇمان ءتۇسىپ نەمەسە قار جاۋىپ كەتۋى مۇمكىن. مۇنداي جاعدايلاردا ۇشاقتار كەرى بۇرىلىپ, نەپال استاناسى كاتماندۋعا قايتۋعا ءماجبۇر بولادى. مامانداردىڭ ايتۋىنشا, مۋسسون ماۋسىمىندا جوسپارلانعان رەيستەردىڭ شامامەن جارتىسى اۋا رايىنىڭ قولايسىزدىعىنا بايلانىستى كەيىنگە شەگەرىلەدى نەمەسە توقتاتىلادى. سوعان قاراماستان تۋريستىك ماۋسىم كەزىندە اۋەجايدا كۇنىنە 50-گە دەيىن رەيس ورىندالادى. مۇنداي باعىتتا تاجىريبەسىز ۇشقىشتاردىڭ جۇمىس ىستەۋىنە رۇقسات بەرىلمەيدى.
نەپالدىڭ اۆياتسيالىق تالاپتارىنا سايكەس, لۋكلاعا ۇشاتىن ۇشقىشتاردىڭ كەمىندە ءبىر جىلدىق جەرگىلىكتى تاجىريبەسى بولۋى كەرەك. سونىمەن قاتار ولار 100-دەن استام قىسقا قاشىقتىقتاعى ۇشۋ مەن قونۋدى ورىنداپ, نۇسقاۋشىمەن بىرگە 10 ءساتتى جاتتىعۋ رەيسىنەن وتۋگە مىندەتتى.
جاناسىل زايتيمحان,
ەۇۋ ستۋدەنتى
