كەڭەس بارىسىندا پرەمەر-ءمينيستردىڭ ورىنباسارى قاتىسۋشىلاردىڭ باياندامالارىن تىڭدادى. مادەنيەت جانە اقپارات ۆيتسە-ءمينيسترى رۋستام ءالي كەشەندى جوسپاردىڭ نەگىزگى باعىتتارىن تانىستىردى. ونىڭ ىشىندە كىتاپحانا جانە كىتاپ ءىسىن دامىتۋ, وقۋدى ناسيحاتتاۋ, سونداي-اق زاماناۋي تسيفرلىق ينفراقۇرىلىم قالىپتاستىرۋ جونىندەگى شارالار قامتىلعان.
قۇجات 9 نەگىزگى باعىت بويىنشا 50-گە تارتا ءىس-شارانى كوزدەيدى. سولاردىڭ قاتارىندا كىتاپ سالاسىن قۇقىقتىق تۇرعىدان جۇيەلەۋ ماسەلەسى دە بار. سونىمەن قاتار مادەنيەت جانە اقپارات مينيسترلىگى كىتاپحانا سالاسىن جاڭعىرتۋعا ەرەكشە كوڭىل ءبولىپ وتىر. بۇگىندە رەسپۋبليكادا 3 887 كوپشىلىك كىتاپحانا جۇمىس ىستەيدى. ولاردىڭ جيىنتىق قورى 72,5 ملن-نان استام ساقتاۋ بىرلىگىن قۇرايدى. 2025 جىلى كىتاپحانالارعا كەلۋشىلەر سانى رەكوردتىق كورسەتكىشكە جەتىپ, 57 ملن-نان استى. بيىل 4 كىتاپحانا جاڭعىرتىلىپ, 6 جاڭا كىتاپحانا اشىلدى. جىل سوڭىنا دەيىن ەلىمىزدىڭ بەس وڭىرىندە تاعى 24 كىتاپحانانى جاڭعىرتۋ جوسپارلانىپ وتىر.
اسكەردەگى جاڭا تالاپ: ەندى سارباز قىزمەت بارىسىندا كەمىندە 5 كىتاپ وقۋعا مىندەتتى
ايدا بالاەۆا كىتاپحانالاردىڭ قىزمەتىنە جان-جاقتى تالداۋ جۇرگىزۋدى تاپسىردى. بۇل جۇمىس كىتاپحانا ينفراقۇرىلىمى مەن عيماراتتارىنىڭ جاي-كۇيىن, كىتاپ قورىمەن قامتاماسىز ەتىلۋ دەڭگەيىن, سونداي-اق ونداعى ادەبيەتتەرگە سۇرانىستى قامتۋعا ءتيىس. تالداۋ قورىتىندىسى بويىنشا, اسىرەسە بالالار مەن جاستارعا ارنالعان ادەبيەت باعىتىنداعى تاپشىلىقتاردى ايقىنداپ, كىتاپحانا قورىن ودان ءارى دامىتۋ جانە جاڭارتۋ جونىندە ناقتى ۇسىنىستار ازىرلەۋ قاجەت. بالالار مەن جاستار اراسىندا وقۋ مادەنيەتىن دامىتۋعا باعىتتالعان شارالار تۋرالى وقۋ-اعارتۋ ءمينيسترى جۇلدىز سۇلەيمەنوۆا باياندادى. مينيسترلىك وقۋشىلاردىڭ ادەبيەتكە جانە زاماناۋي وقىرمان سەرۆيستەرىنە قولجەتىمدىلىگىن كەڭەيتەتىن «بالالار كىتاپحاناسى» جانە «وقىرمان» پلاتفورمالارىن ىسكە قوستى. بۇل باعىتتاعى ماڭىزدى جۇمىستىڭ ءبىرى – ءبىلىم بەرۋ ۇيىمدارىندا وقىرمان كلۋبتارىنىڭ قىزمەتىن دامىتۋ. سونىڭ نەگىزىندە تۇراقتى وقۋ مادەنيەتىن قالىپتاستىرۋعا باعىتتالعان «كىتاپ وقيتىن مەكتەپ» بىرىڭعاي مودەلى ەنگىزىلەدى. اتالعان مودەل اياسىندا بالالاردىڭ كىتاپ وقۋعا قىزىعۋشىلىعىن اتا-انالار مەن پەداگوگتەردىڭ جەكە ونەگەسى ارقىلى ارتتىرۋدى كوزدەيتىن «بىرگە وقيىق» جوباسى جۇزەگە اسىرىلادى.
ءوز كەزەگىندە عىلىم جانە جوعارى ءبىلىم ۆيتسە-ءمينيسترى گۇلزات كوبەنوۆا ستۋدەنت جاستار اراسىندا كىتاپ وقۋ مادەنيەتىن ىلگەرىلەتۋ تاسىلدەرى تۋرالى ايتتى. بۇل باعىتتا جوعارى وقۋ ورىندارى كىتاپحانالارىن دامىتۋ جانە ستۋدەنتتىك وقىرمان كلۋبتارىنىڭ جۇمىسىن جانداندىرۋ ماسەلەلەرى قامتىلعان. كەڭەس قورىتىندىسى بويىنشا عىلىم جانە جوعارى ءبىلىم مينيسترلىگىنە سالالىق ادەبيەتتەرمەن قامتاماسىز ەتۋ دەڭگەيىنە تالداۋ جۇرگىزۋ, سونداي-اق پەداگوگ كادرلاردى دايارلاۋدا قولدانىلاتىن وقۋ ادەبيەتتەرىنىڭ مازمۇنىن زەردەلەۋ تاپسىرىلدى.
ايدا بالاەۆا: كىتاپ وقۋعا قىزىعۋشىلىق تۇراقتى تۇردە ارتىپ كەلەدى
قورعانىس جانە ىشكى ىستەر مينيسترلىكتەرىنە قاراستى ۇيىمداردىڭ كىتاپحانا قورلارىن زەرتتەۋ جانە تالداۋ ماسەلەسىنە دە ەرەكشە نازار اۋدارۋ قاجەت. اسكەري بولىمدەر مەن ۆەدومستۆولىق مەكەمەلەردى زاماناۋي, مازمۇندى ءارى كاسىبي ادەبيەتتەرمەن قامتاماسىز ەتۋ ماڭىزدى. تالداۋ ناتيجەسىندە ناقتى قاجەتتىلىكتەر ايقىندالىپ, كىتاپحانا قورلارىن تولىقتىرۋ جانە جاڭارتۋ جونىندە ۇسىنىستار ازىرلەنۋى كەرەك.
