گرۋزيادا احالكالاكي تەمىرجول ستانساسىندا وتكەن اشىلۋ راسىمىندە كولىك ۆيتسە-ءمينيسترى جانىبەك تايجانوۆ قازاقستاننىڭ ەۋرازيا ترانزيتتىك جانە لوگيستيكالىق جەلىلەرىندەگى ءوسىپ كەلە جاتقان ءرولىن اتاپ ءوتتى. «باكۋ – تبيليسي – كارس» تەمىرجولى – ترانسكاسپي حالىقارالىق كولىك باعىتىنىڭ (تحكب) ماڭىزدى بولىكتەرىنىڭ ءبىرى. باعىت ازەربايجان, گرۋزيا, تۇركيا تەمىرجول جەلىلەرى اراسىنداعى كولىك بايلانىسىن قامتاماسىز ەتىپ, قازاقستاننان جۇكتەردى كاسپي تەڭىزى ارقىلى تۇركيا مەن ەۋروپا ەلدەرىنە تاسىمالداۋعا قوسىمشا مۇمكىندىك اشادى.
بتك ينفراقۇرىلىمىن دامىتۋ قازاقستاننىڭ ترانزيتتىك الەۋەتىن ودان ءارى نىعايتىپ, حالىقارالىق تاسىمالداۋ كولەمىن ۇلعايتۋعا, سونداي-اق ەۋرازيالىق ايماقتاعى لوگيستيكالىق تىزبەكتەردىڭ تيىمدىلىگىن ارتتىرۋعا مۇمكىندىك بەرەدى. قايتا قۇرۋدان كەيىن «باكۋ – تبيليسي – كارس» تەمىرجولىنىڭ جىلدىق وتكىزۋ قابىلەتى 1 ملن توننادان 5 ملن تونناعا دەيىن ارتتى. بۇل سونىمەن قاتار قازاقستاننىڭ كولىك ينفراقۇرىلىمىن جاڭعىرتۋ, ايماقتىق بايلانىستى تەرەڭدەتۋگە نەگىزدەلگەن كەڭ اۋقىمدى كۇش-جىگەرىمەن ۇيلەسەدى. جاقىندا ەل ازەربايجان, تۇركيا, قىرعىزستانمەن حالىقارالىق اۆتوموبيل كولىگى بويىنشا جاڭا تسيفرلىق جۇيەسىن جاريالادى, بۇل نەگىزگى ترانزيتتىك دالىزدەر ارقىلى ساۋدانى ودان ءارى جەڭىلدەتەدى.
ميگرانتتار ورتالىعى تۋرالى كەلىسسوز جوققا شىعارىلدى
ەۋروپالىق وداققا مۇشە مەملەكەتتەردىڭ بىرقاتارى باسپانا بەرۋ تۋرالى وتىنىشتەرى قابىلدانباعان ميگرانتتارعا ارنالعان ورتالىقتار قۇرۋ باستاماسىن كوتەردى. وسى ماقساتتا ولار ەو-عا كىرمەيتىن بىرنەشە ەلمەن كەلىسسوز جۇرگىزبەك. وندا قازاقستان مەن وزبەكستان الەۋەتتى سەرىكتەستەر رەتىندە قاراستىرىلىپ وتىر.
قازىر نيدەرلاند, اۋستريا, دانيا, گەرمانيا مەن گرەكيا ەو اۋماعىنان تىس باسپانا بەرۋ ورتالىقتارىن قۇرۋ بويىنشا جۇمىس ىستەپ جاتىر. وسىعان وراي, قازاقستان سىرتقى ىستەر مينيسترلىگىنىڭ وكىلى ەرلان جەتىباەۆ ميگرانتتار ورتالىقتارىن قۇرۋ بويىنشا كەز كەلگەن كەلىسسوزدەردىڭ جۇرگىزىلىپ جاتقانىن جوققا شىعاردى. ول مۇنداي نىسانداردى قۇرۋ تۋرالى ەۋروپالىق وداقپەن ەشقانداي كەلىسسوز جۇرگىزىلمەگەنىن مالىمدەدى. ءسىم رەسمي وكىلى قازىر قازاقستان ەو-مەن ۆيزانى جەڭىلدەتۋ, ەلدەن زاڭسىز كەتكەن ازاماتتاردىڭ ورالۋىن قامتيتىن قايتا قابىلداۋ تۋرالى كەلىسىم بويىنشا كەلىسسوز جۇرگىزىپ جاتقانىن ايتتى.
وزبەكستان سىرتقى ىستەر مينيسترلىگى دە مۇنداي كەلىسسوزدەردىڭ بولماعانىن مالىمدەدى.
«گونكونگ – الماتى» تىكەلەي اۋە رەيسى قالپىنا كەلتىرىلەدى
گونكونگ ارنايى اكىمشىلىك ايماعى 2027 جىلدىڭ ءبىرىنشى توقسانىندا قازاقستاننىڭ ەڭ ءىرى قالاسى الماتىمەن تىكەلەي رەيستى قايتا باستايدى, سونداي-اق مەديتسينالىق ونىمدەر ءوندىرىسىنىڭ بازاسىن قۇرادى.
گونكونگ ارنايى اكىمشىلىك اۋدانىنىڭ باسشىسى دجون لي باستاعان دەلەگاتسيا العاش رەت قازاقستانعا كەلگەن ەدى. باق وكىلدەرىنە بەرگەن سۇحباتىندا لي 43 ءوزارا تۇسىنىستىك تۋرالى مەموراندۋم ەكونوميكا مەن ساۋدا, ينۆەستيتسيا, قارجىلىق قىزمەت, تەحنولوگيا, ءبىلىم, اۆياتسيا سالالارىن قامتيدى دەپ مالىمدەدى. ال كەلىسسوزدەردىڭ نەگىزگى ناتيجەلەرىنىڭ ءبىرى گونكونگ پەن الماتى اراسىنداعى تىكەلەي رەيستەردىڭ قايتا اشىلۋى بولدى. لي رەيستەردىڭ قايتا باستالۋى گونكونگ جولاۋشىلارىنىڭ ورتالىق ازيا, كاۆكاز ايماعى مەن شىعىس ەۋروپا قالالارىنا الماتى ارقىلى ساياحاتتاۋى جەڭىلدەتەتىنىن ايتتى. ونىڭ مالىمدەمەسىنەن كەيىن گونكونگتىڭ «Cathay Pacific» اۋە كومپانياسى كەلەسى جىلدىڭ ءبىرىنشى توقسانىندا الماتىعا اپتاسىنا ءۇش رەيس اشۋدى جوسپارلاپ وتىرعانىن جەتكىزدى.
پرەمەر-ءمينيستردىڭ ورىنباسارى-ۇلتتىق ەكونوميكا ءمينيسترى سەرىك جۇمانعارين قول قويىلعان قۇجاتتار قازاقستان مەن گونكونگ اراسىنداعى ىنتىماقتاستىقتى ودان ءارى دامىتۋعا ماڭىزدى نەگىز بولعانىن مالىمدەدى.
دجون لي, سونداي-اق, ەلدىڭ ۇلتتىق مۇراجايى مەن نازارباەۆ ۋنيۆەرسيتەتىنە باردى. وندا نازارباەۆ ۋنيۆەرسيتەتى گونكونگتىڭ ەكى جوعارى وقۋ ورنىمەن ءوزارا تۇسىنىستىك تۋرالى مەموراندۋمعا قول قويدى.
الاتاۋ – قازاقستاننىڭ كريپتو قالاسى
قازاقستان پارلامەنتى الاتاۋ قالاسىنا ەرەكشە مارتەبە بەرۋ تۋرالى زاڭ جوباسىن قارادى. سەسسيا بارىسىندا ۆيتسە-پرەمەر قانات بوزىمباەۆ زاڭ شىعارۋشىلاردى جوبا باي شەتەلدىكتەر ءۇشىن سالىق جۇماعىنا اينالمايتىنىنا سەندىرۋگە تىرىستى.
ق.بوزىمباەۆتىڭ ايتۋىنشا, ەكى-ءۇش جىل ىشىندە ۇشاتىن تاكسي جۇمىس ىستەپ, بەسجۇلدىزدى قوناقۇي سالىنادى. الاتاۋعا ەرەكشە مارتەبە بەرۋ تۋرالى زاڭ جوباسى ناۋرىز ايىندا قابىلداندى. جاڭا قۇرىلىم بويىنشا پرەمەر-مينيستر باسقارىپ, پرەزيدەنت بەكىتەتىن «الاتاۋ قالالىق كەڭەسى» قۇرىلادى. بۇل ورگان ستراتەگيالىق شەشىمدەردى باقىلايتىن بولسا, الەۋمەتتىك جانە مەملەكەتتىك قىزمەتتەردى بولەك مۋنيتسيپالدىق اكىمشىلىك باسقارادى.
ال قازىر شەنەۋنىكتەر الاتاۋدىڭ ەلدەگى تەحنولوگيالىق يننوۆاتسيالار ورتالىعى رەتىندەگى ءرولىن ەرەكشە اتاپ ءوتىپ وتىر. استانا حالىقارالىق فورۋمىندا ولار درونعا نەگىزدەلگەن جەتكىزۋ جۇيەلەرى مەن اۋە موبيلدىلىگىنە باعىتتالعان «تومەن تاۋلى ەكونوميكا» تۇجىرىمداماسىن ۇسىندى. قازاقستان اقش-تا ورنالاسقان «Joby Aviation» كومپانياسىمەن اۋە تاكسيلەرىن ساتىپ الۋ تۋرالى 250 ملن دوللاردى قۇرايتىن مەموراندۋمعا قول قويعان ەدى. كولىكتەن باسقا, الاتاۋ تسيفرلىق قارجى سالاسىنداعى جەتەكشى ايماق رەتىندە تانىلدى. ەل پرەزيدەنتى قاسىم-جومارت توقاەۆ قالانىڭ كريپتوۆاليۋتا ينتەگراتسياسىن قوسا العاندا, جاڭا تەحنولوگيالاردى سىناقتان وتكىزۋ الاڭى رەتىندەگى ءرولىن بىرنەشە رەت اتاپ وتكەن ەدى.
دايىنداعان –
گۇلنار جولجان,
«Egemen Qazaqstan»
