«بارىس» پلەي-وففتى جەڭىلىسپەن باستادى

استانا. 1 ناۋرىز. قۇرلىقتىق حوككەي ليگاسىنىڭ پلەي-وفف كەزەڭىن «بارىس» جەڭىلىسپەن باستادى. ومبىدا وتكەن ويىندا استانالىقتار جەرگىلىكتى «اۆانگاردقا» 2:5 ەسەبىمەن ەسە جىبەردى. بۇل تۋرالى egemen.kz حابارلادى. ءبىزدىڭ كوماندا ويىندى وتە جوعارى قارقىنمەن باستاعان ەدى. ءتىپتى 6-مينۋتتا كونستانتين پۋشكارەۆ مەرگەندىگىمەن كوزگە ءتۇسىپ, «بارىس» ەسەپتە العا شىقتى. دەگەنمەن, ويىننىڭ 15 جانە 16-مينۋتتارىندا ەكى بىردەي ويىنشىمىز ايدىننان قۋىلدى. الدىمەن, كونستانتين رۋدەنكو 4 مينۋتقا (2+2) ايدىننان الاستاتىلسا, ارتىنشا كەۆين داللمەن 12 مينۋتتىق (2+10) ايىپ ۋاقىتىن ەنشىلەدى. بەرىلگەن مۇمكىندىكتى ءمۇلت جىبەرمەگەن ومبىلىقتار داللمەننىڭ ايدىننان قۋىلعانىنا 5 سەكۋند وتپەي جاتىپ, تارازى باسىن تەڭەستىرىپ كەتتى. ناتيجەلى سوققىنىڭ اۆتورى – دەنيس كۋلياش. ەكىنشى كەزەڭ ايدىن يەلەرىنىڭ ءتارتىپ بۇزۋىمەن باستالدى. ويىننىڭ 22-مينۋتىندا الەكساندر پەرەجوگين كىشى ايىپپەن جازالانىپ, «بارىس» ويىنشى باسىمدىعىنا يە بولعان. سوعان قاراماستان, استانالىقتار ءوز قاقپالارىنا شايبا جىبەرىپ الدى. كومانداسىن ەسەپتە العا شىعارعان گەرمانيالىق لەگيونەر فەليكس شيۋتتس. شەشۋشى كەزەڭدە جانكۇيەرلەر ءتورت گولدىڭ كۋاسى بولدى. اۋەلى تارتىستىڭ 47-مينۋتىندا «اۆانگارد» ويىنشىلارى ەسەپتى 3:1-گە جەتكىزدى. ال ويىننىڭ سوڭعى مينۋتىندا «بارىستىڭ» باس جاتتىقتىرۋشىسى اندرەي نازاروۆ تاۋەكەلگە بارىپ, قاقپاشى يان لاتسونىڭ ورنىنا التىنشى ويىنشىنى شىعاردى. دەگەنمەن, ايدىن يەلەرى بوس قاقپانى ەكى رەت ءدال كوزدەپ, ويىن بارىسىندا سوققان شايبالارىن بەسەۋگە دەيىن جەتكىزسە, ءبىزدىڭ حوككەيشىلەر ءبىر شايبا سوعىپ, ەسەپتى قىسقارتۋعا عانا مۇمكىندىك تاپتى. قوس كوماندا اراسىنداعى ايقاس 1 ناۋرىز كۇنى جالعاسادى. بۇل ويىندى دا ومبىدا وتكىزەتىن «بارىس» 3-4 ناۋرىز كۇندەرى «اۆانگاردتى» ءوز ايدىنىندا قابىلدايدى. پلەي-وفف كەزەڭىنىڭ كەلەسى ساتىسىنا ءتورت رەت جەڭىسكە جەتكەن كوماندا شىعاتىنى بەلگىلى. ازىرگە جالپى ەسەپ ومبىلىقتاردىڭ پايداسىنا 1:0. ەلامان قوڭىر. دەرەك: egemen.kz. سۋرەت: hawk.ru