اقتوبەدە مۇگەدەك جاندارعا كومەك كورسەتىلدى

اقتوبە. 15 مامىر. اقتوبەدە «اقتوبە قالالىق سال اۋرۋىنا شالدىققان ازاماتتاردى قولداۋ ورتالىعى» قوعامدىق بىرلەستىگىنىڭ عيماراتىندا «پارىز» قايىرىمدىلىق اكتسياسى ءوتتى. اكتسيا بارىسىندا مۇمكىندىگى شەكتەۋل  ءۇش ادامعا كومەك كورسەتىلدى. بۇل تۋرالى egemen.kz ءتىلشىسى حابارلادى. قۇرالاي بايمەنوۆا جەتەكشىلىك ەتەتىن بىرلەستىك 16 جىلدان بەرى كوپتەگەن مۇگەدەك جاندارعا ءتۇرلى باعىتتا قولداۋ جاساپ, «پارىز» قايىرىمدىلىق شاراسىن ءداستۇرلى وتكىزىپ كەلەدى. سول ءداستۇر بويىنشا بيىل I توپ مۇگەدەگى جانار ەسەتوۆاعا وڭتۇستىك كورەيا ەلىندە وپەراتسيا جاساتۋ ءۇشىن 10 مىڭ اقش دوللارى تابىستالدى. بۇل قوماقتى قارجىنى ۇلتى كارىس ەرىكتىلەر جيناپ بەرگەن. سونداي-اق, اكتسيا اياسىندا III توپ مۇگەدەگى جانارگۇل يزماتوۆاعا ماسكەۋدە ەم-دوم قابىلداۋ ءۇشىن بەيتانىس جەكە تۇلعادان 400 مىڭ تەڭگە بولىنگەن. شارا بارىسىندا تاعدىرلاستارىنا تارتىنباي قول ۇشىن سوزاتىن قۇرالاي بايمەنوۆا دا ەلەۋسىز قالمادى. مەرەيلى جاسقا تولىپ وتىرعان وعان «حابار-سەرۆيس» جشس-ءنىڭ ديرەكتورى مۇحتار ابىلقايىروۆ كوپفۋنكتسيونالدى-ۆەرتيكاليزاتورلى, ەلەكترلى مۇگەدەك اربا سىيلادى. اتالعان بىرلەستىكتىڭ اتقارۋشى ديرەكتورى گۇلميرام سراجوۆانىڭ ايتۋىنشا, ورتالىقتا 1 200-دەن اسا مۇمكىندىگى شەكتەۋلى ازامات بار. ۇيىمدا 30 ادام قىزمەت ەتەدى. قازىرگى تاڭدا شەتەلدە وتا جاساتقالى وتىرعان جاناردىڭ جول شىعىنىنا قاجەتتى اقشا جينالۋدا. اقتوبە قالاسىندا وتەتىن الامان ايتىستان تۇسەتىن قارجى I توپ مۇگەدەگى الىبەك ەلەۋسىزوۆتىڭ قىتايدا ارنايى ەم الۋى ءۇشىن جۇمسالماق. جالپى, بىرلەستىكتىڭ مۇمكىندىگى شەكتەۋلى جاندارعا وزدەرىن قوعامنىڭ تولىققاندى مۇشەسى رەتىندە سەزىنۋى جولىندا كوپتەگەن يگى ىستەرگە ۇيتقى بولىپ كەلە جاتقانىن ايتۋ ءلازىم. ساتىبالدى ءساۋىرباي. دەرەك, سۋرەت: egemen.kz.