«تايماس» – ۇلتتىق قاۋىپسىزدىك كوميتەتى شەكارا قىزمەتىنىڭ قاجىرلى ەڭبەگىنە ارنالعان تۇڭعىش وتاندىق كوركەم فيلم. كارتينانى «i1team» كينوكومپانياسى مادەنيەت جانە اقپارات مينيسترلىگىنىڭ تاپسىرىسىمەن ۇلتتىق كينونى قولداۋ مەملەكەتتىك ورتالىعىنىڭ قولداۋىمەن ءتۇسىرىپ جاتىر. ءفيلمنىڭ رەجيسسەرى – عالىم اسىلوۆ.
كينو ورتالىعىنىڭ باسقارما توراعاسى قۇرمانبەك جۇماعالي ديماش قۇدايبەرگەنگە جوباعا كورسەتكەن قولداۋى مەن وتاندىق كينوعا دەگەن ىقىلاسى ءۇشىن العىس
ءبىلدىردى.
«ەلىمىزدى الەمگە تانىتىپ جۇرگەن ونەر يەسىنىڭ قولداۋى شىعارماشىلىق ۇجىمعا ەرەكشە سەرپىن بەرەدى. وتانعا قىزمەت ەتۋ, جاۋاپكەرشىلىك پەن شىنايى دوستىق سەكىلدى ماڭىزدى قۇندىلىقتاردى ارقاۋ ەتكەن جوباعا قولداۋ كورسەتكەنى ءۇشىن ديماش قۇدايبەرگەنگە ريزاشىلىق بىلدىرەمىز. فيلم كورەرمەن جۇرەگىنەن ورىن الىپ, وتاندىق كينونىڭ دامۋىنا ەلەۋلى ۇلەس قوسادى دەپ سەنەمىن», دەدى قۇرمانبەك جۇماعالي.
ايتا كەتەيىك, «تايماس» جوباسىنىڭ ءتۇسىرىلىم جۇمىسى جۋىردا باستالدى. ءداستۇر بويىنشا العاشقى ءتۇسىرىلىم كۇنى «تارەلكە شاعۋ» راسىمىمەن بەلگىلەندى. فيلم وقيعاسى شەكارا قىزمەتىنىڭ وفيتسەرى مەن تاي ەسىمدى قىزمەتتىك ءيتتىڭ توڭىرەگىندە ءوربيدى. باسىنان وتكەن اۋىر سىناقتى بىرگە ەڭسەرگەن ولار ۋاقىت وتە كەلە كونترابانداشىلارعا قارسى كۇرەستە ءبىر-بىرىنە ارقا سۇيەيتىن سەنىمدى سەرىكتەرگە اينالادى.
جوباعا ارنايى دايىندىقتان وتكەن قىزمەتتىك يتتەر قاتىسىپ, ال فيلم كەڭەسشىلەرى رەتىندە كاسىبي كينولوگتەر تارتىلعان. سونىمەن قاتار كارتيناعا 2025 جىلى كينو ورتالىعى ۇيىمداستىرعان رەسپۋبليكالىق «JARQYRA» كاستينگىنىڭ ناتيجەسىندە ىرىكتەلگەن اكتەرلەر دە قاتىسىپ جاتىر.
