زەرتتەۋ كاسىپكەرلەر مەن مەكەمەلەر اراسىندا جۇرگىزىلگەن ساۋالناما نەگىزىندە ازىرلەنگەن. پالاتا وكىلدەرىنىڭ ايتۋىنشا, ساۋالناما 2 اقپان مەن 20 ناۋرىز ارالىعىندا وتكەن. وعان وڭىردەگى 1471 كاسىپورىن مەن ۇيىم قاتىسقان. سونىڭ 827-ءسى – جەكە كاسىپكەر, 644-ءى – زاڭدى تۇلعا.
ساۋالناماعا نەگىزىنەن شاعىن بيزنەس سۋبەكتىلەرى قامتىلعان. اتاپ ايتقاندا, 10 ادامعا دەيىن جۇمىسكەرى بار 917 ۇيىم زەرتتەلسە, 10-نان 99 ادامعا دەيىن قىزمەتكەرى بار 443 كومپانيا جانە
100-دەن 249 ادامعا دەيىن ەڭبەك ەتەتىن 88 ورتا كاسىپورىن ساۋالناماعا قاتىستىرىلعان. بۇدان بولەك, 250-دەن استام ادامدى جۇمىسپەن قامتىپ وتىرعان 23 ءىرى كاسىپورىننىڭ دا كادرلىق احۋالى سارالانعان.
سالالىق تۇرعىدان العاندا زەرتتەۋ اۋىل شارۋاشىلىعى, ساۋدا, قىزمەت كورسەتۋ, ءبىلىم, كولىك جانە وڭدەۋ ونەركاسىبىن قامتىعان. ونىڭ ىشىندە 444 اۋىل شارۋاشىلىعى كاسىپورنى, 281 ساۋدا نىسانى جانە 110 قىزمەت كورسەتۋ ۇيىمى زەردەلەندى. سونىمەن قاتار ءبىلىم سالاسىنداعى 102 مەكەمە, كولىك سالاسىنداعى 93 ۇيىم جانە 79 وڭدەۋ كاسىپورنىنىڭ كادرلىق قاجەتتىلىگى قاراستىرىلعان.
ساۋالناما قورىتىندىسىن جاريالاعان وڭىرلىك كاسىپكەرلەر پالاتاسىنىڭ ديرەكتورى ەسجان ءورازاليننىڭ ايتۋىنشا, الداعى ءۇش جىلدا وبلىس بويىنشا ناقتى 4894 مامان جەتىسپەيدى.
«كادر تاپشىلىعى اسىرەسە پەتروپاۆل قالاسىندا ايقىن بايقالادى. جالپى قاجەتتىلىكتىڭ 64 پايىزى نەمەسە 3152 مامان وبلىس ورتالىعىنا تيەسىلى. اۋداندار بويىنشا ەسىل اۋدانىندا – 244, اققايىڭدا – 229, عابيت مۇسىرەپوۆ اتىنداعى اۋداندا – 183, ال تيميريازەۆ اۋدانىندا 177 مامان قاجەت», دەدى ول.
سونداي-اق ەكونوميكالىق قىزمەت تۇرلەرى بويىنشا مەملەكەتتىك باسقارۋ سالاسىندا دا كادر جەتىسپەۋشىلىگى بايالعان. بۇل باعىتتا 1114 مامان قاجەت ەكەنى انىقتالعان.
ءوندىرىس سالالارى اراسىندا اۋىل شارۋاشىلىعىندا 822 بوس جۇمىس ورنى تىركەلسە, ساۋدا سالاسىندا – 509, وڭدەۋ سەكتورىندا 416 ۆاكانسيا بار.
زەرتتەۋ ناتيجەسى وڭىردە ەڭ كوپ سۇرانىسقا يە ماماندىقتاردى دا ايقىندادى. قازىرگى تاڭدا كاسىپورىندار مەن مەكەمەلەرگە 330 اسپاز, 220 ەلەكترمونتەر, 178 لوگوپەد, 163 اۆتوسلەسار جانە 132 تراكتوريست-ماشينيست قاجەت.
بۇدان بولەك, ينجەنەر-مەحانيكتەر, مەدبيكەلەر مەن دەنەشىنىقتىرۋ ءپانىنىڭ مۇعالىمدەرىنە سۇرانىس جوعارى. اسىرەسە كاسىبي-تەحنيكالىق ءبىلىمى بار ماماندار تاپشى. بۇگىندە مۇنداي كادرلارعا ارنالعان 2862 بوس جۇمىس ورنى بار.
كاسىپكەرلەر پالاتاسىنىڭ مالىمەتىنشە, ساۋالناما قورىتىندىلارى ءتيىستى مەملەكەتتىك ورگاندارعا جولدانىپ, وقۋ ورىندارىنىڭ ءبىلىم باعدارلامالارى مەن گرانتتار سانىن ناقتى ەڭبەك نارىعىنىڭ سۇرانىسىنا بەيىمدەۋ كەزىندە ەسكەرىلمەك. بۇل وڭىردەگى جوعارى وقۋ ورىندارى مەن كوللەدجدەردىڭ مامان دايارلاۋ جۇيەسىن ەكونوميكانىڭ ناقتى قاجەتتىلىگىنە سايكەستەندىرۋگە مۇمكىندىك بەرەدى دەگەن ءۇمىت بار.
سولتۇستىك قازاقستان وبلىسى
