فوتو: اشىق دەرەككوز
جىل باسىنان بەرى تۇركىستان وبلىسىنىڭ اۋىل شارۋاشىلىعى قاجەتتىلىكتەرىنە 1 ميلليارد تەكشە مەتردەن استام سۋ بەرىلدى. ونىڭ 307 ميلليون تەكشە مەترى جەتىساي اۋدانىنا تيەسىلى.
سۋمەن تولىق قامتاماسىز ەتىلگەندىكتەن, بيىل ءونىم دە مولىنان شىققان. «باحارام» شارۋا قوجالىعى ەگىستىك القاپتارىن ك-30 كانالى ارقىلى كەلەتىن سۋمەن قامتاماسىز ەتىپ وتىر.
«بيىل 10 گەكتار جەرگە قاربىز ەكتىك. قازىر العاشقى ءونىمدى جيناۋ جۇمىستارى قارقىندى ءجۇرىپ جاتىر. سۋ ماسەلەسى بولعان جوق. بۇل ءۇشىن سۋ رەسۋرستارى جانە يرريگاتسيا مينيسترلىگىنە ريزاشىلىعىمىزدى بىلدىرەمىز», دەدى شارۋا قوجالىقتىڭ توراعاسى شاكيربوي رادجاپوۆ.
اۋدان بويىنشا باقشا داقىلدارىن سۋارۋعا 53,8 ميلليون تەكشە مەتر سۋ جىبەرىلگەن. قازىرگى ۋاقىتتا جەتىساي اۋدانىندا باقشا ونىمدەرىن, كوكونىس پەن جوڭىشقا القاپتارىن سۋارۋ جۇمىستارى جالعاسىپ جاتىر.
ايتا كەتەيىك, مامىردىڭ ەكىنشى ون كۇندىگىندە جەتىسايلىق شارۋالار بيىلعى العاشقى قاۋىن ءونىمىن جيناي باستاعان ەدى.
