كابۋلدەگى لاڭكەستىك قۇرباندارى اراسىندا قازاقستان ازاماتى دا بار

استانا. 14 مامىر. اۋعانستان استاناسى – كابۋلدە بولعان لاڭكەستىك وقيعا سالدارىنان قازا تاپقاندار اراسىندا قازاقستان ازاماتى دا بار. بۇل تۋرالى سىرتقى ىستەر مينيسترلىگىنىڭ ءباسپاسوز قىزمەتى حابارلادى. حابارلامادا: «وسى جىلدىڭ 13 مامىرىندا لاڭكەستەردىڭ كابۋلدەگى Park Palace Hotel قوناق ۇيىنە جاساعان قارۋلى شابۋىلى سالدارىنان سول كەشەنگە توقتاعان قازاقستان ازاماتى, 1987 جىلى تۋعان ايگەرىم ابدۋللاەۆانىڭ قازا تاپقانىن راستايمىز. سوعان بايلانىستى مارقۇمنىڭ تۋعان-تۋىستارى مەن جاقىندارىنا قايعىرىپ كوڭىل ايتامىز», – دەلىنگەن. قازاقستاننىڭ كابۋلدەگى ەلشىلىگى بولعان جايتقا بايلانىستى قاجەتتى كونسۋلدىق-قۇقىقتىق ارەكەتتەردى قولعا الدى. سونداي-اق, مارقۇمنىڭ دەنەسىن وتانىنا جەتكىزۋ ءۇشىن كومەك كورسەتۋگە دايىن ەكەنىن حابارلادى. ايتا كەتەيىك, قايعىلى جاعداي كەشە كەشكىسىن بولعان. اتالعان قوناق ۇيدە تۇراتىن شەتەلدىكتەر ءۇشىن جەرگىلىكتى ۋاقىت بويىنشا ساعات 18:00-دە كونتسەرت ۇيىمداستىرىلادى. سول كەزدە قارۋلانعان لاڭكەستەر كەشەنگە باسىپ كىرىپ, شاراعا قاتىسۋشىلارعا شابۋىل جاساعان. پوليتسەيلەر كەلگەنشە لاڭكەستەر قوناق ءۇي كۇزەتىنىڭ قىزمەتكەرلەرىن ءولتىرىپ, شەتەل ازاماتتارىن كەپىلدىككە الىپ ۇلگەرگەن. ناتيجەسىندە ءتارتىپ ساقشىلارى بىردەن ىشكە ەنىپ كەتە المادى. 7 ساعاتقا سوزىلعان ۇرىس كەزىندە بارلىق لاڭكەستىڭ كوزى جويىلدى. قارۋلى شابۋىل سالدارىنان قازاقستاننان بولەك, اقش, يتاليا, ۇلىبريتانيا جانە ءۇندىستان ازاماتتارى دا قۇربان بولدى. ەلامان قوڭىر. دەرەك, سۋرەت: سىرتقى ىستەر مينيسترلىگىنىڭ ءباسپاسوز قىزمەتى.