استانادا ەكى وقۋشى كوپ قاباتتى ۇيدەن سەكىرىپ, ءجانتاسىلىم ەتتى

استانا. 14 مامىر. استانادا ءوز-وزدەرىنە قول جۇمساعان ەكى وقۋشى قىزدىڭ ولىمىنە بايلانىستى پوليتسيا قىزمەتكەرلەرى تەرگەۋ امالدارىن قولعا الدى. بۇل تۋرالى قالالىق ىشكى ىستەر دەپارتامەنتىنىڭ ءباسپاسوز قىزمەتى حابارلادى. وقۋشى قىزدار كوپ قاباتتى تۇرعىن ءۇيدىڭ بالكونىنان سەكىرىپ كەتكەن. استانا قالالىق ىشكى ىستەر دەپارتامەنتى ءباسپاسوز قىزمەتى تاراتقان مالىمەتتەرگە سۇيەنسەك, قايعىلى وقيعا قالانىڭ شاكارىم قۇدايبەردى ۇلى داڭعىلىنداعى ۇيلەردىڭ بىرىندە تىركەلگەن. «قازىرگى تاڭدا ءوزىن-ءوزى ءولتىرۋ دەرەگى بويىنشا پوليتسيا قىزمەتكەرلەرى وقيعانىڭ انىق-قانىعىن تەكسەرۋدە. جاسوسپىرىمدەردىڭ مۇنداي قادامعا نە ءۇشىن بارعاندارى, سەبەپ-سالدارى انىقتالاتىن بولادى», – دەلىنگەن ءباسپاسوز مالىمدەمەسىندە. ءباسپاسوز قىزمەتى تەرگەۋ ىسىنە كەسىرى تيمەس ءۇشىن بۇل جايتقا قاتىستى تولىق مالىمەتتەردى حابارلاعان جوق. ەستەرىڭىزگە سالا كەتەيىك, وسىدان ەكى كۇن بۇرىن اقتوبەدە ءدال وسىعان ۇقساس قايعىلى جايت تىركەلگەن ەدى. قالاداعى №3 ورتا مەكتەپ وقۋشىسىنىڭ ءوز ۇيىندە اسىلىپ ولگەنى ءدۇيىم جۇرتتى دۇرلىكتىردى. ءساۋىر ايىنىڭ سوڭىندا ءدال وسى وقۋ ورنىنىڭ مۇعالىمى دە ءوز-وزىنە قول سالعان بولاتىن. ەلامان قوڭىر. دەرەك: استانا قالالىق ىشكى ىستەر دەپارتامەنتىنىڭ ءباسپاسوز قىزمەتى. سۋرەت: faminta.com.