لينگۆيستيكالىق كوميسسيانىڭ قۇرامى بەكىتىلدى

ورتالىق سايلاۋ كوميسسياسىنىڭ توراعاسى قۋاندىق تۇرعانقۇلوۆتىڭ توراعالىعىمەن وتكەن كوميسسيانىڭ كەشەگى وتىرىسىندا 2015 جىلعى 26 ساۋىرگە تاعايىندالعان قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىن ۇيىمداستىرۋ مەن وتكىزۋگە قاتىستى ءتورت قاۋلى قابىلداندى. اتاپ ايتقاندا, قازاق­ستان رەسپۋبليكاسىنىڭ پرەزيدەنت­تىگىنە كانديداتتاردىڭ مەملە­كەتتىك ءتىلدى ەركىن مەڭگەرگەندىگىن انىقتاۋ جونىندەگى لينگۆيس­تيكالىق كوميسسيا قۇرۋ تۋرالى شەشىم قابىلداندى جانە ونىڭ قۇرامى بەكىتىلدى. كوميس­سيا قۇرامىندا فيلولوگيا عىلىمدارىنىڭ دوكتورلارى مىر­زاتاي جولداسبەكوۆ (توراعا), سەيىت قاسقاباسوۆ, فاۋزيا وراز­باەۆا, ديحان قامزابەك ۇلى جانە گۇلتاس قۇرمانباي بار. كوميسسيا مۇشەلەرىنىڭ بارلىعى قازاق ءتىلى مەن قازاق ادەبيەتىنىڭ بىلگىر ماماندارى. وسك مۇشەسى ءلاززات سۇلەي­مەن­نىڭ اتاپ وتۋىنشە, قازاقستان رەسپۋبليكاسىنىڭ پرەزيدەنت­تىگىنە كانديداتتاردىڭ مەملە­كەتتىك ءتىلدى ەركىن مەڭگەرگەندىگىن انىقتاۋ ءراسىمى ەش وزگەرگەن جوق, ول 2005 جىلعى 31 تامىزداعى «قازاقستان رەسپۋبليكاسىنىڭ پرەزيدەنتتىگىنە كانديداتتىڭ مەملەكەتتىك ءتىلدى ەركىن مەڭ­گەر­گەندىگىن انىقتاۋ ءراسىمى تۋرالى» ورتسايلاۋكومنىڭ قاۋلىسىمەن ايقىندالادى. وتىرىستا, سونداي-اق, ورت­ساي­لاۋكوم قازاقستان رەسپۋب­ليكاسىنىڭ پرەزيدەنتتىگىنە كانديداتتى قولدايتىن ساي­لاۋ­شىلاردىڭ دۇرىس قولدارىنىڭ سانى كەمىندە 93 مىڭ 012 قول­دى قۇراۋى تيىستىگىن بەل­گىلەدى. قولداردى جيناۋدى سەنىم بىلدىرگەن ادامدار ۇيىم­داس­تىرادى. قولداردى جينايتىن توپتاردىڭ سانى مەن مولشەرى شەكتەلمەيدى. سونىمەن قاتار,  ورتالىق سايلاۋ كوميسسياسى قول قويۋ پاراقتارىن بەرۋ جانە قازاقستان رەسپۋبليكاسىنىڭ پرەزيدەنتتىگىنە كانديداتتى قولداپ جينالعان قولداردىڭ راستىعىن تەكسەرۋ مەرزىمدەرىن قىسقارتۋ تۋرالى شەشىم قابىلدادى. قول قويۋ پاراقتارىن ورتسايلاۋكوم كانديداتتىڭ كونستيتۋتسيا مەن «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭدا بەلگىلەنگەن تالاپتارعا سايكەستىگى تەكسەرىلگەننەن كەيىن ەكى كۇنتىزبەلىك كۇن ىشىندە بەرەدى. بۇعان دەيىن بۇل راسىمگە بەس كۇن جۇمسالاتىن. ال اۋماقتىق سايلاۋ كوميسسيالارىنىڭ كانديداتتى قولداپ جينالعان قولداردىڭ راستىعىن تەكسەرۋ مەرزىمى كۇنتىزبەلىك ون كۇننەن بەس كۇنگە دەيىن قىسقارتىلدى. وتىرىستا اتالىپ وتىلگەندەي, ورتسايلاۋكوم 2015 جىلعى 26 ساۋىرگە تاعايىندالعان قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىندا شەتەل­دىك بۇقارالىق اقپارات قۇرال­دارىنىڭ وكىلدەرى, قازاقستان رەس­پۋب­ليكاسى سىرتقى ىستەر مينيسترلىگى بەرگەن اككرەديتتەۋ تۋرالى كۋالىگى بولعان جاعداي­دا, سايلاۋدى بايقاۋدى جۇزەگە اسىرۋعا قۇقىلى ەكەنىن بەلگىلەدى. بۇل رەتتە حالىق­ارالىق بايقاۋشىعا, سونداي-اق شەتەلدىك بۇقارالىق اقپارات قۇرالىنىڭ وكىلىنە جەكە باسىن كۋالاندىراتىن قۇجاتى بولعان جاعدايدا, ءبىر اۋدارماشى ىلەسىپ جۇرە الادى. اتالعان قاۋلىمەن حالىقارالىق بايقاۋشى ساۋالداماسىنىڭ ءماتىنى بەكىتىلىپ, حالىقارالىق بايقاۋشىلاردى اككرەديتتەۋ 2015 جىلعى 20 ساۋىردە اياقتالاتىنى بەلگىلەندى. وتىرىسى اياقتالعان سوڭ, ورتالىق سايلاۋ كوميسسياسىنىڭ بۇقارالىق اقپارات قۇرالدارىمەن ءتيىمدى ءوزارا ءىس-قيمىل جاساۋىن, ونىڭ قىزمەتىنىڭ جانە سايلاۋ ۇدەرىسىنىڭ بارلىق كەزەڭدەرىنىڭ اشىقتىعىن ارتتىرۋدى, سونداي-اق, ەلدىڭ سايلاۋ زاڭناماسىنىڭ ەرەجەلەرىن كوپشىلىككە تاراتۋ مەن تۇسىندىرۋدە ماڭىزدى ءرول اتقارۋدى قامتاماسىز ەتۋگە نەگىزدەلگەن ءباسپاسوز ورتالىعى اشىلدى. ورتالىق سايلاۋ كوميس­سياسىنىڭ ءباسپاسوز حاتشىسى ۆەنەرا جەكسەمبەكوۆا حاباردار ەتكەندەي, ءباسپاسوز ورتالىعىندا جۋرناليستەردىڭ جۇمىس ىستەپ, اقپارات الۋلارىنا بارلىق جاع­داي جاسالعان. ينتەرنەت, فاكس, تەلەفون, تاعى باسقا دا قۇرال­دارمەن جابدىقتالعان. ءباسپاسوز ورتالىعىنىڭ ال­عاش­قى قوناعى لينگۆيستيكالىق كوميسسيانىڭ توراعاسى مىر­زاتاي جولداسبەكوۆ بولدى. «ءبىز كەزەكتەن تىس پرەزي­دەنتتىك سايلاۋدىڭ الدىندا تۇرمىز. پرەزيدەنتتىك سايلاۋ­دىڭ ءوتۋىن ساياسي پارتيالار, قوعامدىق ۇيىمدار, ۇكىمەت­ت­ىك ەمەس ۇيىمدار, ەڭبەك ۇجىم­دارى, ستۋدەنتتەر مەن وقىتۋ­شىلار قولدادى, – دەدى ول. – ەلى­مىزدىڭ كونستيتۋتسياسىندا كورسە­تىلگەندەي, پرەزيدەنتتىكتەن ۇمىتكەرلەر بىرقاتار تالاپتارعا ساي بولۋى كەرەك. ولار بىرنەشە سىناقتان وتەدى. سونىڭ ءبىرى – بولاشاق پرەزيدەنت مەملەكەتتىك ءتىلدى ەركىن مەڭگەرۋى ءتيىس. ال كوميسسيا ءتيىستى زاڭنامالار شەڭبەرىندە جۇمىس ىستەيتىن بولادى». ءاليسۇلتان قۇلانباي, «ەگەمەن قازاقستان». سۋرەت: http://qamshy.kz