مۇسا جالەل ولەڭدەرى ءۇش تىلدە وقىلدى

اتىراۋداعى «دوستىق ۇيىندە» تاتار اقىنى, كەڭەس وداعىنىڭ باتىرى مۇسا جالەلدىڭ شىعارماشىلىعى­نا ارنالعان ەسكە الۋ كەشى ءوتتى. بەلگى­لى تاتار اقىنى ەكىنشى دۇنيەجۇزىلىك سوعىستا جاۋ قولىنا تۇسكەنىنە قاراماستان, وتانى تۋرالى جىر جازۋدان جالىقپاعان. وعان 1956 جىلى قايتىس بولعاننان كەيىن كەڭەس وداعىنىڭ باتىرى اتاعى بەرىلىپ, كەزىندە لەنيندىك سىيلىقپەن دە ماراپاتتالدى. تۇركى الەمىنە تانىلعان اقىن شىعارماشىلىعى جايلى شارانى ۇيىمداستىرۋعا ۇيىتقى بولعان «تاتۋلىك» تاتار-باشقۇرت ەتنومادەني بىرلەستىگى مۇسا جالەلدىڭ سۇراپىل سوعىستاعى باتىرلىعى مەن تۇتقىندا جۇرسە دە وتانىنا سۇيىسپەنشىلىگىن جىرىنا ارقاۋ ەتكەن اقىندىعىن جاس ۇرپاقتىڭ جادىنا ءسىڭىرۋدى كوزدەپتى. – بۇل شارا ۇلى جەڭىستىڭ 70 جىلدىعى مەن قازاقستان حالقى اسسامبلەياسىنىڭ 20 جىلدىق مەرەيتويى اياسىندا وتكىزىلىپ وتىر. ويتكەنى, بۇگىنگى ۇرپاق قيىن-قىستاۋ كەزدەگى اعا ۇرپاقتىڭ جانقيارلىق ەرلىگىن ۇمىتپاۋى قاجەت. سونىمەن بىرگە, تاۋەلسىز ەلىمىزدەگى ۇلتارالىق تاتۋلىقتىڭ قادىرىن جەتە سەزىنگەنى دۇرىس قوي, – دەيدى «تاتۋلىك» تاتار-باشقۇرت ەتنومادەني بىرلەستىگىنىڭ جەتەكشىسى گۇلسينا بايكەنوۆا. شارادا مەكتەپ وقۋشىلارى سوعىس جانە تىل ارداگەرلەرى مەن وزگە ەتنومادەني بىرلەستىكتەر وكىل­دەرىنە مۇسا جالەلدىڭ پوەزيالىق شىعارمالارىن قازاق, تاتار جانە ورىس تىلدەرىندە وقىپ بەردى. اردا­گەرلەر مەن زەينەتكەرلەرگە ەستەلىك سىيلىقتار تابىستالدى. جولداسبەك شوپەعۇل, «ەگەمەن قازاقستان». اتىراۋ وبلىسى. سۋرەتتى تۇسىرگەن راحىم قويلىباەۆ.