جەلبىرەتۋگە ەل تۋىن, شىعىڭىز تاعى بەل بۋىپ!
قالامگەرلەر قاۋىمىنىڭ ورتاق ويى وسى
اعالىق قولقا سالامىن
ەل تاريحىندا ەل سىنالار كەزەڭدەر دە بولادى, ەر سىنالار كەزەڭدەر دە بولادى. قازىرگى كەزەڭ – سونداي كەزەڭ. دۇنيە اۋمالى-توكپەلى بولىپ تۇر. زامانا جەلى بىرەسە انا جاقتان ۇيىتقيدى, بىرەسە مىنا جاقتان ۇيىتقيدى. بارىنەن قىمتانۋ مۇمكىن ەمەس. ءبىر ەلدىڭ ىشىندە ب ۇلىك شىقسا «باس جارىلسا بورىك ىشىندە» قالاتىن كەز كەلمەسكە كەتكەن. ول ەلگە ءار قيىردان اسەر ەتكىسى كەلەتىندەر تابىلىپ, بارا-بارا سولار ءبىر-بىرىمەن ايتىسىپ-تارتىسىپ جاتاتىن بولعانىنا بۇكىل الەمنىڭ كوزى ۇيرەنىپ بارادى. سونداي-سونداي سويقانداردىڭ سالدارى ەكونوميكاسى الەمدىك ەكونوميكاعا ابدەن كىرىككەن قازاقستاننىڭ جاعدايىنا دا اسەر ەتۋدە. بىلەتىندەردىڭ ايتۋىنا قاراعاندا, بۇل باعىتتاعى قيىنشىلىقتار الداعى كەزدە اسقىنا تۇسپەسە ازايمايتىن سىڭايلى.
مۇندايدا نە ىستەۋ كەرەك؟ ەتەك-جەڭىمىزدى جيناپ, بويىمىزدى بيلەپ, ويىمىزدى جۇيەلەپ, بۇگىن قالاي جۇرەمىز, ەرتەڭ قاي جاققا قادام باسامىز دەگەندى ەرتە باستان ەكشەپ الۋىمىز كەرەك. نۇرسۇلتان نازارباەۆ سولاي ەتتى. تالاي جىل بويى حالىقتىڭ قامى ءۇشىن جيناقتالعان ۇلتتىق قوردىڭ قارجىسىن قيىن كەزدە ەكونوميكانىڭ, الەۋمەتتىك سالانىڭ مۇقتاجىنا ناقتىلاپ ءبولدى. «نۇرلى جول» اتالعان جاڭا ەكونوميكالىق ساياساتتى ايقىندادى. ماڭگىلىك ەل بولۋدىڭ جولدارىن بەلگىلەدى. وسىنداي تۇستا قازاقستان حالقى اسسامبلەياسى سىندى بىرەگەي قۇرىلىمنىڭ دەر كەزىندە كوتەرگەن باستاماسى كوپ كوڭىلىنەن شىقتى.
مەن وتە قۋانىشتىمىن. تار كەزەڭدە تاماشا ۇسىنىس جاسالعانىنا, ونى بارشا جۇرتتىڭ, ساياسي پارتيالاردىڭ, قوعامدىق ۇيىمداردىڭ ءىلىپ الىپ, قولداپ كەتكەنىنە, مۇنىڭ ءبارى اتا زاڭنىڭ تالاپتارى اياسىندا جاسالىپ جاتقانىنا قۋانىشتىمىن. ەلدىگىمىزگە سىن بولاتىنداي ساتتە ءبارىمىزدىڭ ءبىر جەڭنەن قول, ءبىر جاعادان باس شىعارا بىلگەنىمىزگە قۋانىشتىمىن. ەلباسىنىڭ ەل تىلەگىنە قۇلاق اسىپ, جارلىققا قول قويعانىنا, ءسويتىپ كەزەكتەن تىس پرەزيدەنتتىك سايلاۋ وتكىزىلەتىن كۇندى بەلگىلەگەنىنە بەك ريزامىن.
سەبەبى؟ سەبەبى سول, بىزگە ساياساتتاعى ساباقتاستىق كەرەك, بىزگە تۇراقتىلىق كەرەك, بىزگە تاتۋلىق كەرەك. ونىڭ ءبارى تاڭى ارايلاپ اتاتىن, كەشى تىنىش باتاتىن, حالقى ءبىر-بىرىنە جاقسىلىق تىلەپ جاتاتىن ەلدە بولادى. قازاقستان – سونداي ەل. مىڭ تاۋبە! بودان كۇننەن كەتكەنىمىزگە, بوستان كۇنگە جەتكەنىمىزگە, ەلىمىزدى داۋلەتى مىقتى, ساياساتى تۇراقتى, الىس تا, جاقىن دا سىيلايتىن ەل ەتكەنىمىزگە تاۋبە! قۇدايعا شۇكىر, ءبارى رەت-رەتىمەن كەلىپ جاتىر. ەلۋلىككە ەنەمىز دەدىك پە؟ دەدىك. ەندىك پە؟ ەندىك. ويلاعان ۋاقىتىمىزدان دا بۇرىن ەندىك. وتىزدىقتان ورىن الاتىن كۇنىمىز دە كەلەدى ءالى. ول ءۇشىن نە ىستەۋىمىز كەرەك؟ ەڭبەك كەرەك. جالپىعا ورتاق ەڭبەك قوعامىن قۇرۋعا شاقىرىپ وتىرعان ەردىڭ توڭىرەگىنە توپتاسۋىمىز كەرەك. سونداي ءسات كەلدى, اعايىن.
مەن جاسىم سەكسەننىڭ سەڭگىرىنەن اسقانشا تالايدى كوردىم. الەمنىڭ دە تالاي جەرىن ارالادىم. قىزمەتكەرلىگىم دە, قايراتكەرلىگىم دە تالاي اداممەن ارالاستىرىپ-قۇرالاستىردى. سونداعى ءبىر تۇيگەنىم – نۇرسۇلتان نازارباەۆتاي ادامنىڭ سيرەك جاراتىلاتىندىعى. ەكى قوعامنىڭ وت پەن سۋداي شارپىسقان شاعىندا شىڭدالىپ شىققان, قۇرىش قۇيا ءجۇرىپ ءوزى دە قۇرىشتاي قۇيىلعان, ويعا زەرەك, سوزگە شەشەن, مىنەزگە باي, قاي مىنبەردەن دە مەملەكەتىڭنىڭ مەرەيىن اسىرىپ, ابىرويىن تاسىتىپ جارقىلدايتىن مۇنداي جارقىن تۇلعا – حالقىمىزدىڭ باسىنا قونعان باق.
باسىمىزداعى باقتى باعالايتىن حالىق ەكەنىمىزدى دالەلدەۋمەن كەلەمىز. الدا دا دالەلدەي بەرەمىز. سوندىقتان, ەل بىرلىگىن ويلاعاندا, ەل تىرلىگىن ويلاعاندا, ەلدىڭ ىرىلىگىن ويلاعاندا مەن ءوز باسىم اعالىق جولىممەن مىناداي قولقا سالعىم كەلەدى.
نۇرسۇلتان باۋىرىم! سايلاۋعا ءتۇس. ەلدى باسقارۋ جاۋاپكەرشىلىگىن تاعى دا ءوز يىعىڭا جۇكتە. ءوزىڭ قۇرعان مەملەكەتىڭدى مىنا قيىن وتكەلدەن ءوزىڭ وتكىز. كوزدەگەن مەجەلەرىڭە ءوزىڭ جەتكىز. ءبىر سوزىڭدە ابۋباكىر كەردەرى بابامىزدىڭ «جىگىتكە ەرلىك تە وڭاي, ەلدىك تە وڭاي, اگاركي قابىرعالى بولسا حالقى» دەپ ايتقانىن كەلتىرىپ ەدىڭ عوي. قابىرعالى حالقىڭ ساعان تاعى دا ازاماتتىڭ اۋىر جۇگىن ارتقىسى كەلەدى. حالقىڭا سەن. حالقىڭ ساعان سەنەدى. العا تارت, ازاماتىم!
اكىم تارازي,
مەملەكەتتىك سىيلىقتىڭ لاۋرەاتى.
ەل اتىنان سۇرايمىن
بيىل قازاقستان جەرىنە كوكتەم ەرتە كەلەتىن نىشان تانىتتى. وڭتۇستىكتىڭ قىزعالداعى ءدۇر سىلكىنىپ, ارقانىڭ ساعا-ساعاسىنا بۇلاق سۋلارى كۇركىرەي باستادى. وسىناۋ دۇركىرەگەن-كۇركىرەگەن وكتەمىمەن بىرگە جىل قۇسىنداي بولىپ يگىلىكتى جاقسى حابار دا جاقسى ءان, ءتاتتى كۇيدەي كوڭىلىمىزدى باۋراپ الدى.
جاسىراتىنى جوق, دۇنيە ءجۇزىن ورتتەي شارپىعان الەمدىك داعدارىس ءبىزدىڭ دە ءتۇن ۇيقىمىزدى بۇزباي قويمادى. جانە بۇل داعدارىس تازا ەكونوميكالىق تۇرعىدا بولماي, بىرەۋدى بىرەۋ باسىپ الۋ, قارۋ جۇمساۋ, كۇش كورسەتۋ, قاراما-قارسى لاگەرلەرگە توپتالىپ, بىلەك سىبانۋ ارەكەتتەرىمەن ساباقتاس كەلدى ەمەس پە؟ سانكتسيالار سوعىسى دەگەن بالە ۇزاق جىلدارعا بەلگىلەنگەن جوسپارىمەن ىلگەرى باسىپ كەلە جاتقان ءبىزدىڭ ەكونوميكامىزعا ەلەۋلى زيانىن تيگىزدى.
وسىناۋ كۇتپەگەن, توسىنداۋ دۇربەلەڭ باستالعالى بەرى پرەزيدەنتىمىزدىڭ ماڭداي قىرتىسى مولايعانىن بايقاپ ءجۇرمىن. ۇيقىسى دا شالا, ۋايىمى دا باسىم سياقتى. جايشىلىقتا ءتىلىن ساۋعان شەشەن, كوسەم تابىلادى, ال ۇلت جۇگىن ارقالاعان قايراتتى ۇل – قيىن-قىستاۋدا نايزاعايداي جارقىلدايدى. ۋاقىتتىڭ قيىندىعىنا قاراماي, پرەزيدەنتىمىزدىڭ تاپ وسى كەزدە ەلىن, حالقىن سوقتىقپالى سوقپاقتان امان الىپ شىعاتىن «نۇرلى جول» باعدارلاماسىن ۇسىنۋى – حالقى ءۇشىن نەگە بولسا دا باس تىگەتىن وجەت, تاباندى ۇلدىڭ مىنەزىن تانىتادى.
«نۇرلى جول» – عاجاپ باعدارلاما. شاعىن جانە ورتا بيزنەس پرەزيدەنتتىڭ تىكەلەي قامقورلىعىمەن مەملەكەتىمىزدىڭ باستى كاسىپ كوزىنە اينالاتىن بولدى. وسى باعدارلاما باس-اياعى ءتورت-بەس جىلدىڭ ىشىندە ەلىمىزدى گۇلدەندىرىپ جىبەرەتىنىنە كامىل سەنەمىن. وعان ۇلكەندى-كىشىلى يندۋستريالاندىرۋ باعدارلاماسىن قوسىڭىز. ازامات سوعىسىنىڭ ويرانىنان كەيىنگى «شارىق كيگەن» رەسەيدى وسى يندۋستريالاندىرۋ ەل قاتارىنا قوستى. مارتەبەلى باسشىمىز نۇرسۇلتان ءابىش ۇلى ۇسىنىپ, جەر-جەردە جۇزەگە اسۋىن قاداعالاپ وتىرعان يندۋستريالاندىرۋ ءۇردىسى دامىعان 30 ەلدىڭ قاتارىنا قوسىلۋعا سەپتەسەتىن بىردەن-ءبىر ونىكتى جول.
حالىق اسسامبلەياسىنىڭ بيىل پرەزيدەنت سايلاۋىن وتكىزۋ تۋرالى ۇسىنىسى مەن دالەلدەرى كوڭىلگە قونعاندىقتان دا بار-جوعى ەكى اپتانىڭ ىشىندە بۇل ۇسىنىسقا بىزدەگى ساياسي پارتيالار مەن ەلۋدەن استام قوعامدىق بىرلەستىكتەر ءبىراۋىزدان ءۇن قوسىپ, پارلامەنت پالاتالارى, ۇكىمەت, كونستيتۋتسيالىق كەڭەس قولداۋ ءبىلدىردى. ەندى جوعارى مارتەبەلى ەلباسىمىز نۇرسۇلتان ءابىش ۇلىنىڭ پرەزيدەنتتىك سايلاۋعا تۇسۋىنە رەسمي كەلىسىم بەرۋىن ەل اتىنان سۇرايمىن.
انەس ساراي,
جازۋشى, دراماتۋرگ,
قازاقستاننىڭ ەڭبەك سىڭىرگەن قايراتكەرى.
بەرەكە-بىرلىك تۇتقاسى
قازاق ەلىنىڭ ءتاۋ ەتەر تاۋەلسىزدىگىنە قول جەتكىزگەنىنە دە شيرەك عاسىرعا تايادى. وسى ۋاقىت ىشىندە مەملەكەتىمىزدىڭ مەرەيى ءوسىپ, تورتكۇل دۇنيەگە تانىلدى. مەن مۇنى ەلباسى نۇرسۇلتان نازارباەۆتىڭ سىندارلى ساياساتىنىڭ جەمىسى دەپ بىلەمىن. ءبىر زاماندارى الاش ارىسى ءاليحان بوكەيحانوۆ: «مەملەكەتتىگى جوق حالىق – جەتىم, جەتەكشىل حالىق» دەگەن ەدى. تاۋبە, ءبىز قازىر جەتىم دە, جەتەكشىل دە حالىق ەمەسپىز. ءوز الدىنا تۇعىرىن مىقتاپ تۋ تىككەن, ەلتاڭباسىن بيىككە ءىلىپ, ءانۇرانىن شىرقاتا ايتقان جۇرتپىز. ءبىرازدان بەرى قازاقستان حالقى اسسامبلەياسى كەڭەسىنىڭ كەزەكتەن تىس پرەزيدەنتتىك سايلاۋ وتكىزۋ تۋرالى باستاماسى جۇرتشىلىقتىڭ اراسىندا كەڭ تالقىلانىپ جاتقان ەدى.
وتكەن سارسەنبىنىڭ ساتىندە مەملەكەت باسشىسى نۇرسۇلتان نازارباەۆ قازاقستان حالقىنا ۇندەۋ جولداپ, سايلاۋ ەل ومىرىندەگى ۇلكەن وقيعا ەكەنىن ايتتى, وعان جاۋاپكەرشىلىكپەن قاراپ, بەلسەندىلىكپەن قاتىسۋعا شاقىردى. شىنىندا ازاتتىق العان ۋاقىتتان بەرى ەلىمىزدىڭ بەرەكە-بىرلىگىنە, ىنتىماقتى تىرلىگىنە, سان ءتۇرلى ۇلىستىڭ بەرىك دوستىققا نەگىزدەلگەن دامۋىنا ۇيىتقى دا تۇتقا بولىپ كەلە جاتقان پرەزيدەنت ءوزىنىڭ ۇندەۋىندە مىنانداي ءبىر ەلدىك ءسوزدى العا تارتىپتى. «مەن جەتكەن ابىروي, مارتەبە – بارشا قازاقستاننىڭ مەرەيى», دەپ وزىنە تىلەك بىلدىرگەن ازاماتتارعا شىنايى ىقىلاسىن تانىتتى.
قازاق جۇرتىنىڭ توڭىرەگىنە توپتاسقان قازاقستان مەملەكەتىنىڭ بۇكىل ادال نيەتتى ۇلكەن-كىشىسى سايلاۋ جايلى اڭگىمە قوزعالعاننان باستاپ, وزدەرىنىڭ شىنايى ىقىلاستارىن ءبىلدىرىپ كەلەدى. مەن دە سول قالىڭ قاۋىمنىڭ اراسىندا جۇرگەن قالامگەرمىن. الەكساندر پۋشكيننەن قالعان ءبىر قاعيدا بار. قوعامداعى بارلىق وزگەرىس اقىن جۇرەگىنەن وتەدى دەپ كەلەدى ول. شىنىندا, قازىر تورتكۇل دۇنيەدەگى ساپىرىلىس, قاقتىعىستار ءبىزدىڭ دە كوڭىلىمىزدى الاڭ ەتىپ جۇرگەنى انىق. ونىڭ ۇستىنە دۇنيە ءجۇزىن شارلاعان داعدارىس تا ارقانى ايازداي قاريدى. وسىنداي تارازى باسى تەڭسەلىپ تۇرعاندا بىراۋىزدىلىق تانىتىپ, پرەزيدەنت سايلاۋىن بيىل وتكىزسەك ۇتىلمايمىز, ۇتارىمىز كوپ بولادى. سەبەبى, نۇرسۇلتان ءابىش ۇلىنىڭ «قازاقستان-2050» ستراتەگياسىنداعى ايتىلعان كەلەلى ىستەر مەن «نۇرلى جول – بولاشاققا باستار جول» جولداۋىنداعى مىندەتتەردى مۇلتىكسىز ورىنداۋ – باستاعان ءىستى اياعىنا جەتكىزۋ كەرەكتىگىن ءبارىمىز دە تۇسىنەمىز.
پرەزيدەنت «سايلاۋ – اسا ماڭىزدى كونستيتۋتسيالىق جانە پاتريوتتىق اكت» دەي كەلىپ, «الداعى سايلاۋعا ءوزىمنىڭ قاتىساتىنىما وراي شەشىمدى مەن كەيىنىرەك, ەلىمىزدىڭ كونستيتۋتسياسى مەن زاڭدارىنا تولىق سايكەس قابىلدايتىن بولامىن» دەگەن ەكەن. ەلىمىز ازاتتىعىن العان كۇننەن باستاپ ىرگەسىن قالاپ, كەرەگەسىن مىقتاپ, شاڭىراعىن بيىككە كوتەرگەن, قازاق حالقى مەن قازاقستاندىقتاردىڭ مارتەبەسىن اسقاقتاتقان ەل تۇتقاسى – تۇلعا تاعى دا حالىق تىلەگىن قابىل الىپ, جۇرت جۇكتەگەن سەنىم بيىگىنەن كورىنەدى دەگەن ويدامىن.
قاجىعالي مۇحانبەتقالي ۇلى,
مەملەكەتتىك سىيلىقتىڭ
لاۋرەاتى.
«ەل بولىپ بىرىگۋدەن اسقان باقىت جوق»
نە ىقىلىم زاماندار بۇرىن وسى ءسوزدى تاۋىپ ايتقان بىلگە قاعان بابامىز نەتكەن كەمەڭگەر ەدى! ءتىپتى, ارىعا بارماي-اق, سوڭعى شيرەك عاسىردا حالقىمىزدىڭ باسىنان وتكەن وقيعالارعا كوز سالساق تا ونىڭ ماندىلىگى مەن زارۋلىگىنە ءتانتى بولاسىڭ.
ءيا, ەل بولىپ بىرىگۋدەن اسقان باقىت جوق! بۇگىنگىنىڭ تىلىمەن ايتقاندا, بۇل –تاۋەلسىز مەملەكەت اياسىندا توپتاسۋ دەگەن ءسوز. بۇعان قوسا ءوزىڭدى ءوزىڭ بيلەۋ, ءوز تاريحىڭدى ءوزىڭ جاساپ, ءوز تاعدىرىڭدى ءوزىڭ شەشۋ, اتادان قالعان مۇراعا – جەرىڭ مەن بايلىعىڭا, ءتىلىڭ مەن دىلىڭە, ونەرىڭ مەن دىنىڭە يە بولىپ, ادامزات باعىت العان ۇلى كوشتە ءوز باعدارىڭدى, ءوز ورنىڭدى دۇرىس تابۋ. بۇل وڭاي ما؟! ارينە, وڭاي ەمەس, دۇنيەنىڭ ءتورت بۇرىشىندا بولىپ جاتقان دۇربەلەڭدەر مەن قانتوگىستەردى كورەسىڭ دە ەلىڭنىڭ اماندىعىنا الاڭدايسىڭ. ەل باسقارعان ازاماتىڭنىڭ تۇعىرى بيىك, تۇلعاسى زور, كەمەل ويلى كورەگەن بولعانىن قالايسىڭ.
قازىر حالقىمىز تاعى دا جاۋاپتى كەزەڭدە تۇر. الداعى از ۋاقىتتا ەل پرەزيدەنتىن سايلاۋىمىز كەرەك. بۇل – ءبىر كىسىنىڭ مانساپ بيىگىنە كوتەرىلۋى ەمەس, تۇتاس حالىقتىڭ, قازاق ەلىنىڭ تاعدىرى بەزبەنگە ءتۇستى دەگەن ءسوز. سوندىقتان كىمدى تاڭدايمىز؟! قۇدايعا شۇكىر, تالاي جايساڭدارىمىز بار. بىراق سولاردىڭ ىشىندە دە اباي ايتاتىن كەمەل تۇلعا – نۇرسۇلتان ءابىش ۇلى مەنىڭ كوزىمە ءتاڭىرتاۋدىڭ بيىك شىڭىنداي دارا كورىنەدى. ول – بارلىق سىننان وتكەن, ءومىردىڭ داۋىلى مەن جاۋىنىنا, ىستىعى مەن سۋىعىنا شىنىققان, مىناۋ بەيمەزگىل زاماننىڭ سىرىن ۇققان, الەمدىك ساياساتتى جاساۋشىلاردىڭ قاي-قايسىسىمەن دە تەرەزەسى تەڭ سويلەسەتىن قايراتكەر. وسى كۇندەردە ەل حالقى پرەزيدەنتتىككە كانديدات رەتىندە ەڭ الدىمەن ەلباسىنىڭ ەسىمىن ايتاتىنى – شىعار كۇندەي شىندىق. ەگەر ەلباسى, ءوزىنىڭ كانديداتۋراسىن ۇسىنۋشى كوپشىلىكتىڭ تىلەگىن قابىل السا, ءبارىمىز دە ۇتار ەدىك.
نۇرسۇلتان ءابىش ۇلىنىڭ ازاماتتىق, قايراتكەرلىك قاسيەتتەرى تۋرالى كوپ جازىلدى. ول مەملەكەت باسىندا وتىرعان جىلداردا, ارينە, كوپ نارسەنى كوردى, ۇيرەندى, جيرەندى, دوستىق پەن قاستىقتى, مەيىرباندىق پەن ساتقىندىقتى – ءبارى-ءبارىن كوردى. ءار نارسەدەن تۇڭىلگەن دە كەزى بولعان شىعار. بىراق مەن تۇڭعىش تىلدەسكەن كەزدەن بۇگىنگە دەيىن اينىماعان ءبىر مىنەزى – ول دوستىق پەن باۋىرلاستىققا نەگىزدەلگەن ۇلى دالا زاڭدارىن بويىنا تەرەڭ ءسىڭىرىپ, سودان اينىماي كەلە جاتقانى.
قىسقا ءبىر دەرەك ايتايىن. وتكەن عاسىردىڭ 90-شى جىلدارى بولاتىن. تۇركيا پرەزيدەنتى تۇرعىت وزالدىڭ شاقىرۋىمەن نۇرەكەڭ تۇركياعا تۇڭعىش رەسمي ساپارىمەن بارارىندا, قاسىنا ءبىر توپ زيالى قاۋىم وكىلدەرىن ەرتىپ الدى. تۇرىكتىڭ انكارا, ءىزمىر, ىستامبۇل قالالارىندا ەستەن كەتپەس قابىلداۋلاردى كوردىك. سولاردىڭ بىرىندە ءبىز وتىرعان ۇستەلگە نۇرەكەڭ كەلدى. شەرحان مۇرتازا ءبارىمىزدى تانىستىرا باستادى. كامال سمايىلوۆ, قالداربەك نايمانباەۆ, دۋلات يسابەكوۆ, تولەن ابدىكوۆ, ت.ب. اتىمىزدى اتاعان سايىن نۇرسۇلتان ءابىش ۇلى ارقايسىمىزعا ءبىر جىلى ءسوز تاۋىپ, ەڭبەكتەرىمىزدى جاڭىلماي ايتىپ, كوڭىلىمىزدى كوتەرىپ تاستادى. سوڭىنان: «– ءجىگىتتەر! – دەدى. – بۇل تاۋەلسىز مەملەكەتىمىزدىڭ ەلدىگىن تانىتقان تۇڭعىش تاريحي ساپار بولدى. جاقسى اياقتالدى. ەندى وسىلايشا, ازات ەل ەكەنىمىزدى جەر دۇنيەگە جاريالاپ, جالعاستىرا بەرەمىز!». ءبارىمىزدى قۇشاعىنا الىپ: – «بىرلىگىمىز, باۋىرلاستىعىمىز ارتا بەرسىن. بىرگە بولايىق. حالقىمىز سەنگەن ازاماتتار ءبىر بولساق, تاتۋ بولساق, تاۋەلسىزدىگىمىز باياندى بولادى», دەدى. بىلەك پەن بىلەك, قۇشاق پەن قۇشاق ايقاستى.
تاۋەلسىزدىكتىڭ ەلەڭ-الاڭىندا ايتىلعان وسى سوزدەردەن ول ەشقاشان جاڭىلعان ەمەس. كەرىسىنشە, ونى حالىقارالىق دارەجەگە كوتەردى. مىنە, وسى تاتۋ-ءتاتتى باۋىرلاستىقتىڭ ارقاسىندا تۋعان ەلىن تاريح كەمەسىندە امان-ەسەن باسقارىپ كەلەدى. سولاي بولا بەرۋىنىڭ باستى كەپىلى – ەلباسىنىڭ اقبوز اتقا قايتا قونۋى. ال بۇل ءبىزدىڭ ءوز قولىمىزدا.
سۇلتان ورازالى,
جازۋشى, قازاقستاننىڭ ەڭبەك سىڭىرگەن قايراتكەرى.
