بالۋان شولاق اتىنداعى مادەنيەت جانە سپورت سارايىندا التى كىلەم توسەلدى. شىنى كەرەك, بۇرىن-سوڭدى ارداگەرلەر اراسىندا وسىنداي اۋقىمدى شارا ۇيىمداستىرىلعانىن كورگەن ەمەسپىز. تىپتەن, ونداي تۋرنيرلەر ەرەسەكتەر اراسىندا سيرەك وتەدى. بيىل ادەتتەگىدەي 35 پەن 70 جاستاعى التى ارداگەرلىك ديۆيزيونىنداعى باسەكەلەردەن بولەك, 18 بەن 34 جاس ارالىعىنداعى سپورتشىلار دا بوزكىلەمدە باق سىنادى. قاتىسۋشىلاردىڭ قاتارىندا كەزىندە حالىقارالىق ارەنادا اتوي سالعان ساڭلاقتارمەن قاتار اۋەسقوي سپورتشىلار دا بولدى. ءبىر قۋانتارلىعى, جاستارى 60-تان اسىپ, 70-كە تاياپ قالعان اقساقالداردىڭ اراسىندا ءالى دە سپورتتى سەرىك ەتىپ, سالاۋاتتى ءومىر سالتىن ۇستانىپ جۇرگەندەر از ەمەس ەكەن. بالا-شاعا بىلاي تۇرسىن, تىپتەن جارىسقا نەمەرەسىمەن كەلگەن قاريالاردى دا كوزىمىز شالدى.
– العاش رەت «ارداگەر الاڭىن» وتكىزگەن كەزدە كەلەشەكتە ول وسىنداي اۋقىمدى شاراعا اينالادى دەپ ەش ويلاعان جوق ەدىك, – دەپ باستادى ءوز اڭگىمەسىن جارىستى ۇيىمداستىرۋشى ءارى جوبا جەتەكشىسى ەرلان مالاەۆ. – وسىدان بىرەر جىل بۇرىن الماتىداعى سپورت مەكتەپتەرىنىڭ بىرىندە تۇساۋى كەسىلگەن تۋرنيردە جەرگىلىكتى بالۋانداردان بولەك, وزبەكستان مەن قىرعىزستاننىڭ عانا وكىلدەرى ونەر كورسەتتى. كەيىننەن قاتارىمىز كوبەيدى. اتالعان جارىس سپورتشىلاردىڭ دا, كورەرمەندەردىڭ دە كوڭىلىنەن شىقتى. سول كەزدە-اق بۇل باستامانى ودان ءارى جالعاستىرۋ جايىندا كەڭىنەن اڭگىمە قوزعادى. كوپشىلىك بۇل يدەيانى قولدادى. سودان ءبىز دە ىسكە بەل شەشە كىرىستىك. ەكىنشى جانە ءۇشىنشى جارىس ء«سادۋ-ارەنادا» ۇيىمداستىرىلدى. بيىل الماتى قالالىق سپورت جانە دەنە شىنىقتىرۋ باسقارماسى قولداۋىمەن بالۋان شولاق اتىنداعى سپورت سارايىن ەكى كۇنگە «مەنشىگىمىزگە» الدىق. سول ءۇشىن دە قامقورلىق كورسەتكەن ازاماتتارعا زور العىسىمدى بىلدىرگىمدى كەلەدى. وزدەرىڭىز بايقاپ وتىرعانداي, ءتۋرنيردىڭ گەوگرافياسى كەڭەيدى, قاتىسۋشىلاردىڭ سانى ارتتى جانە دە ونىڭ دەڭگەيى ءوستى. بۇيىرتسا, كەلەشەكتە ءبىز وسى جوبانى ودان ءارى جەتىلدىرىپ, بۇدان دا جوعارى دارەجەگە كوتەرەمىز.
ە. مالاەۆ مىرزا باستاعان بەلسەندى توپ الداعى ۋاقىتتا اتالعان تۋرنير ەلىمىزدىڭ بىرىڭعاي سپورتتىق كۇنتىزبەسىنە ەنىپ, قاتىسۋشىلارعا ءتۇرلى اتاقتار مەن رازريادتار بەرىلەدى دەپ ۇمىتتەنىپ وتىرعانىندارىن دا جاسىرمادى. ول ءۇشىن تۋريزم جانە سپورت مينيسترلىگىنىڭ قولداۋى قاجەت. جوبا جەتەكشىسىنىڭ ايتۋىنشا, بۇل جاعداي ارداگەرلەر سپورتىنىڭ دامۋىنا ۇلكەن سەپتىگىن تيگىزىپ, سونى سەرپىن بەرەتىنى ءسوزسىز.
«ارداگەرلەر الاڭىنا» قاتىسۋشىلار اراسىنان كەزىندە قازاقستاننىڭ ۇلتتىق قۇراماسى ساپىندا بولىپ, حالىقارالىق ارەنادا ەل نامىسىن ابىرويلى قورعاعان ەربول قوڭىراتوۆ, ايبەك ەڭسەحانوۆ, اندرەي ساموحين, داۋرەن باياحمەتوۆ, قايسار بورانباەۆ, اڭساعان قۇسايىنوۆ جانە تاعى باسقا تانىمال بالۋانداردى كوزىمىز شالدى. ولاردىڭ دەنى ءوز سالماق دارەجەلەرىندە توپ جاردى. سونىمەن قاتار, ارداگەرلەر دوداسىندا اتوي سالىپ, الەم جانە ازيا چەمپيوناتىندا ءبىر ەمەس, بىرنەشە مارتە باس جۇلدەنى ولجالاعان وعلاندار دا ءوز ونەرلەرىن ورتاعا سالدى.
قازاقستاننىڭ ەكى دزيۋدوشىسى Grand Slam ءتۋرنيرىنىڭ جارتىلاي فينالىنا شىقتى
بالۋان شولاق اتىنداعى سپورت سارايىندا ءبىز بەيبىت زاماننىڭ باتىرلارىن دا جولىقتىردىق. سولاردىڭ ءبىرى – ەرجان ءامىرحانوۆ. بۇل ازاماتتىڭ گرەك-ريم كۇرەسىنەن سپورت شەبەرى دەگەن اتاعى بار. قازىرگى كەزدە سەمەيدە جاستاردى جاتتىقتىرادى. 2017 جىلدىڭ جازىندا ەرجان كولىك ساتىپ الۋ ءۇشىن نوۆوسىبىرگە ساپار شەگەدى. اۆتوبۋس تۇنگى ساعات 3:20-دا الەيسك قالاسىنا تايادى. ول كەزدە بارلىق ادام ۇيقى قۇشاعىندا جاتتى. بارلىعى – 42 جولاۋشى. ونىڭ 12-ءسى بالالار. كەنەت قوعامدىق كولىكتەن ءورت شىعىپ, جالىن جان-جاقتى شارپي باستايدى. مۇنى جالعىز ءامىرحانوۆ بايقايدى. كەيىپكەرىمىز جاعدايدى جۇرگىزۋشىگە ايتىپ, دەرەۋ كولىكتى توقتاتادى. «ورتەنىپ جاتىرمىز, تەزدەتىپ اۆتوبۋستان شىعىڭىزدار» دەپ ايقايلادى. بىراق جولاۋشىلار ورىندارىنان قوزعالمادى. سويتسە ءبىراز ادام كوك تۇتىنگە ۋلانىپ تا ۇلگەرگەن ەكەن. ال كەيبىرەۋلەرى نە بولعانىن تۇسىنبەي, مەڭ-زەڭ بولىپ تۇر. ەندى ەش كىدىرۋگە بولمايدى. ەرجان ەكى ەسىكتى تەۋىپ اشىپ, بارلىق جولاۋشىلاردى كەزەك-كەزەگىمەن سىرتقا شىعارا باستايدى. سوڭعى ادام شىققانشا سپورتشى ءورتتىڭ ورتاسىندا بولدى. باس-اياعى 1 مينۋت 45 سەكۋندتا ول بارلىق جولاۋشىنى قۇتقاردى. وسى وقيعادان قۇلاعدار بولعان بەتتە جۋرناليستەر ەرجاننىڭ ەرلىگى جايىندا جارىسا جازادى. ارنايى سيۋجەتتەر ءتۇسىرىلدى. ءسويتىپ, سەمەي قالاسىنىڭ شەتقارا جاعىندا بالعىن بالۋاندارى باپتاپ جۇرگەن قاراپايىم عانا ازاماتتىڭ اتاعى الىسقا جايىلادى. مىنە, سول ەرجۇرەك ەرجان دا «ارداگەرلەر الاڭىندا» كۇش سىناسۋدى قۇپ كورگەن ەكەن...
Qazaqstan Barysy Grand Slam ءتۋرنيرىن قازاقستان قۇراماسى 8 جۇلدەمەن اياقتادى
اتالعان تۋرنير اياسىندا بالۋان شولاق اتىنداعى مادەنيەت جانە سپورت سارايىندا قاجىمۇقان مۇڭايتپاسوۆتىڭ ءومىرى مەن جەتىستىكتەرىنە ارنالعان كورمە ۇيىمداستىرىلادى. وندا «كۇش اتاسىنىڭ» ءىرى حالىقارالىق جارىستاردا جەڭىپ العان وردەندەرى مەن مەدالدارى, بەلبەۋلەرى, تۇتىنعان زاتتارى جانە باسقا دا قۇندى جادىگەرلەرى كوپشىلىك نازارىنا ۇسىنىلدى. ەكسپوناتتاردىڭ ءبىر بولىگى تۇركىستان وبلىسىنداعى بالۋاننىڭ تۋعان جەرىنەن ارنايى اكەلىنگەنىن دە ايتا كەتكەن ابزال.
