كوكتوبەگە كوتەرىلەتىن اسپالى جولدىڭ اشىلۋى كەيىنگە شەگەرىلدى

الماتى. 14 مامىر. قالا تۇرعىندارى مەن قوناقتارىن كوكتوبەگە الىپ باراتىن اسپالى جولدى كۇردەلى جوندەۋ 2014 جىلدىڭ كۇزىندە باستالىپ, 2015 جىلدىڭ ماۋسىم ايىنا دەيىن اياقتالۋى كەرەك ەدى. بىراق, بەلگىلى سەبەپتەرگە بايلانىستى, تەمىر ارقانعا تارتىلعان جولدىڭ اشىلۋى شىلدە ايىنا شەگەرىلدى.بۇل تۋرالى tengrinews.kz حابارلادى. الماتىنىڭ اتاقتى اسپالى جولى– سوڭعى رەت وسىدان 9 جىل بۇرىن كۇردەلى جوندەۋدەن وتكەن. جولدىڭ ۇزىندىعى ادەتتەگىدەي – 1727 مەتر, بيىكتىگى – 80 مەتر, اراقاشىقتىقتى 6 مينۋتتا ءجۇرىپ وتۋگە بولادى. بۇگىنگى كۇنى ەسكى جولدىڭ قۇرىلىمى تۇگەلدەي قايتادان كۇردەلى جوندەۋدەن ءوتۋى ءتيىس. وسىعان وراي, بۇل ىسپەن اسپالى جول سالۋدا جانە جوندەۋدە مول تاجىربيەسى بار رەسەيلىك “سنوۋپروم سەرۆيس” كومپانياسى اينالىسۋدا. مونتاجداۋ جۇمىسىن ۋادەلى مەرزىمدە ورىنداپ ۇلگەرمەگەن شەتەلدىك كومپانيا سوعان قاراماستان, ماگيسترالدىڭ تولىقتاي جاڭالانىپ, جاڭا قوندىرعىلارمەن جابدىقتالىپ, جاز ايىنىڭ ورتاسىندا قالايدا ىسكە قوسىلاتىنىنا سەنىمدى. تالعات ءسۇيىنباي. دەرەك, سۋرەت:tengrinews.kz.