وليمپيادا جولداماسىن ساراپقا سالادى

استانا ماڭىنداعى ميچۋرينو ەلدى مەكەنىندە تاەكۆوندودان قازاقستان ۇلتتىق قۇراماسىنىڭ وقۋ-جاتتىعۋ جيىندارى ءوتتى. بۇل جيىن كوماندانىڭ الەم چەمپيوناتى الدىنداعى سوڭعى دايىن­دىقتارى. جىل باسىنان بەرى ۇلتتىق قۇراما برازيليا, كورەيا مەن باسقا دا شەتەلدەردە شەبەرلىكتەرىن شىڭداپ, ارنايى دايىندىقتان ءوتتى. سونىمەن قوسا, تاجىريبەنى ارتتىرۋ ماقساتىندا سپورتشىلارىمىز ونشاقتى حالىقارالىق جارىستارعا قاتىسىپ, 19 جۇلدەگە يە بولدى. سونىڭ ناتيجەسىندە الەم چەمپيوناتىندا ونەر كورسەتەتىن 16 سپورتشى ىرىكتەپ الىندى. الەم چەمپيوناتى دۇنيەجۇزىلىك تاەكۆوندو فەدەراتسياسىنىڭ ۇيىم­داستىرۋىمەن ەكى جىلدا ءبىر رەت وتەدى. بيىلعى چەمپيوناتتا 2016 جىلى برازيليانىڭ ريو-دە-جانەيرو قالاسىندا وتەتىن وليمپيادانىڭ جولدامالارى ساراپقا سالىنادى. تاەكۆوندودان قازاقستان ۇلتتىق قۇراماسىنىڭ باس جاتتىقتىرۋشىسى مۇستاحيم قابدراشەۆ ءوز سوزىندە سپورتشىلارىمىزدىڭ كوپتەگەن تۋرنيرلەرگە قاتىسىپ, جۇلدەلى ورىندارعا يە بولعاندارىن, بيىلعى الەم چەمپيوناتىنا نۇرسۇلتان ماماي, دۇيسەنباي سمايىل, ەرجان ابىلقاس, رۋسلان جاپپاروۆ, قىزدار اراسىنان فەرۋزا ەرگەشوۆا, جازيرا ساپاربەك, انارگۇل سابىردىڭ ونەر كورسەتەتىنىن اتاپ ءوتتى. جيىندا وڭتۇستىك كورەيادان كەلگەن تاەكۆوندو شەبەرى, قازاقستان ۇلتتىق قۇراماسىنىڭ جاتتىقتىرۋشىسى يۋ ەنگ دجين رەسەيدىڭ چەليابى قالا­سىندا وتەتىن الەم چەمپيوناتىندا وليمپياداعا ليتسەنزيا الىپ, ءجۇل­دەلى ورىنداردان كورىنەمىز دەپ نىق سەنىممەن ايتتى. بيىلعى چەمپيوناتقا 150 ەلدەن 1 مىڭنان استام سپورتشى قاتىسىپ, ۇزدىكتەردى انىقتايتىن بولادى. ايجۇلدىز ەربولاتقىزى, ل.ن.گۋميلەۆ اتىنداعى ەۇۋ ستۋدەنتى.