باسىلىم الەمگە ايگىلى National Geographic Society برەندىمەن تىعىز بايلانىستا سوڭعى ون جىل ىشىندە وقىرمان قاۋىمعا ساپالى ءبىلىم بەرۋ باعىتىندا ەلەۋلى ۇلەس قوسىپ كەلەدى.
بۇگىندە اتالعان جۋرنال كوپتەگەن وقىرمان ءۇشىن الەمدى تانۋدىڭ سەنىمدى كوزىنە اينالىپ وتىر. وسىلايشا باسىلىم تابيعاتتى قورعاۋ, ەكولوگيالىق سانانى قالىپتاستىرۋ جانە بىلىمگە ۇمتىلۋ سياقتى ماڭىزدى قۇندىلىقتاردى ناسيحاتتاۋدى جالعاستىرىپ ءجۇر.ء ىس-شارا بارىسىندا National Geographic Qazaqstan جۋرنالىنىڭ جاۋاپتى رەداكتورى ايبىن شاعالاق الەمدىك National Geographic جۋرنالىنىڭ National Geographic 33 جوباسىن تانىستىردى.
«سوڭعى ون جىل ىشىندە باسىلىم قازاق ءتىلىنىڭ دامۋىنا دا ءوز ۇلەسىن قوستى. وسىلايشا, National Geographic Qazaqstan تەك اقپارات تاراتۋشى عانا ەمەس, ءبىلىم مەن مادەنيەتتى دامىتۋشى ماڭىزدى پلاتفورماعا اينالدى. بۇل جوبا الەم بويىنشا قوعامعا وڭ وزگەرىس اكەلىپ جۇرگەن تۇلعالاردى تانىتۋدى ماقسات ەتكەن باستاما. سوندىقتان National Geographic قوعامى بيىل ەكىنشى جىل قاتارىنان ءساۋىر ايىنداعى سانىن وسى باستاماعا ارناپ, الەمنىڭ ءار تۇكپىرىندە ىزگى ىستەرمەن اينالىسىپ جۇرگەن ازاماتتاردى تانىستىرىپ كەلەدى. National Geographic Qazaqstan ەلشىسى ءدال وسى جوبادان شابىت الىپ, ەلىمىزدەگى عىلىمدى دامىتۋعا, تابيعاتتى قورعاۋعا جانە قوعامدى جاقسارتۋعا ۇلەس قوسىپ جۇرگەن, ىستەگەن ءىسى مەن قىزمەتى جاھاندىق National Geographic 33 رۋحىمەن ۇندەسەتىن ازاماتتاردى ماراپاتتاۋعا ارنالىپ وتىر», دەدى جيىندا National Geographic Qazaqstan جۋرنالىنىڭ شەف-رەداكتورى ايبىن شاعالاق.
شەف-رەداكتوردىڭ سوزىنشە, باسىلىم بۇگىندە ءتۇرلى جوبالارمەن سەرىكتەستىك ورناتقان. بۇل جوبالار جاستاردىڭ عىلىم مەن زەرتتەۋگە دەگەن قىزىعۋشىلىعىن وياتۋدا ماڭىزدى ءرول اتقارادى.
جيىندا كاسپي يتبالىعىن قورعاۋ باعىتىندا ەلەۋلى قىزمەتى مەن ەرەكشەلەنگەن اسەل تاسماعامبەتوۆا مەن ينكليۋزيۆتى كوممۋنيكاتسيانى دامىتۋداعى ەرەن ەڭبەگى ءۇشىن نۇرزادا امانگەلدىگە سالتاناتتى تۇردە «National Geographic Qazaqstan ەلشىسى» قۇرمەتتى اتاعى بەرىلدى.
«كاسپي يتبالىعى تەك كاسپي تەڭىزى ايماعىندا عانا تىرشىلىك ەتەتىن بىرەگەي تەڭىز سۇتقورەكتىسى بولىپ سانالادى. ونىڭ سانىنىڭ ازايۋى بۇكىل تەڭىز ەكوجۇيەسىنىڭ تابيعي تەپە-تەڭدىگىن بۇزۋى مۇمكىن. سونىمەن قاتار, يتبالىقتاردىڭ ازايۋىنا مۇنايمەن لاستانۋ, بالىق اۋلاۋ قۇرالدارىنا ءتۇسىپ قالۋ جانە كليماتتىڭ وزگەرۋى سياقتى فاكتورلار اسەر ەتەدى, سوندىقتان بۇل ءتۇردى ساقتاۋ تابيعاتتى قورعاۋدىڭ جانە بيولوگيالىق ارتۇرلىلىكتى ساقتاۋدىڭ ماڭىزدى بولىگى», دەدى اسەل تاسماعامبەتوۆا.
سونداي-اق ءىس-شارا بارىسىندا نۇرزادا امانگەلدى ءوزىنىڭ ينكليۋزيا باعىتىنداعى بىرەگەي جوباسىن تانىستىردى.
«الەمدە 120 ىم-يشارا ءتىلى بار. سوعان سايكەس ۇعىنىسۋ تەك قول ارقىلى عانا ەمەس, بەت پەن ەرىنگە تىكەلەي بايلانىستى. ال ەلىمىزدە بىرىڭعاي ىم-يشارا ءتىلى ءالى قالىپتاسپاعان. قازاق ءتىلى ورتاق بولعانىمەن, ىم-يشارا تۇرىندە ىشكى بارەرلەردىڭ اسەرىنەن ونىڭ سان الۋان ءتۇرى قالىپتاسقان. سوندىقتان ءبىز وسى باعىتتاعى جۇمىستارىمىزدى جەتىلدىرە ءتۇسۋدى ماقسات ەتەمىز», دەدى نۇرزادا امانگەلدى.
نۇربولات امانبەك
