ۇلىبريتانيا ۇكىمەتى چارلز حانزادانىڭ جەكە حاتتارىن جاريالادى

استانا. 14 مامىر. ۇلىبريتانيانىڭ بۇقارالىق اقپارات قۇرالدارى 10 جىلعا سوزىلعان سوت داۋىنان كەيىن پاتشايىم ەليزاۆەتا ءىى-ءنىڭ ۇلكەن ۇلى چارلز حانزادانىڭ حاتتارىنا قول جەتكىزدى. اتالعان حاتتار وسى ەلدىڭ ۇكىمەتىنە باعىتتالعان. بۇل تۋرالى 24today.net حابارلادى. جوعارعى سوتتىڭ شەشىمىنەن كەيىن 13 مامىردا جەتى ءتۇرلى مينيسترلىككە جىبەرىلگەن 27 حات ۇلىبريتانيا ۇكىمەتىنىڭ سايتىندا جاريالاندى. 2004-2005 جىلدارى جازىلعان بۇل حاتتار سول كەزدىڭ وزىندە باسپاسوزدە ءبىراز ايقاي-شۋ تۋدىرعان ەدى. ويتكەنى, ۇلىبريتانيا مونارحى ەلدى تەك شارتتى تۇردە باسقارادى. سول سەبەپتى پاتشايىم وتباسىنىڭ مۇشەلەرى ساياساتقا ارالاسۋ قۇقىنان ايىرىلعان. The Guardian باسىلىمى اقپارات بوستاندىعى تۋرالى زاڭعا سۇيەنە وتىرىپ, 2005 جىلى العاش رەت اتالعان حاتتاردىڭ مازمۇنىن اشىپ كورسەتۋدى سۇراعان بولاتىن. گازەتتىڭ مۇنداعى باستى ماقساتى – حانزادانىڭ مينيسترلىكتەرگە نە جونىندە جازعانىن انىقتاۋ ەدى. سودان باستاپ «بولاشاق مونارحتىڭ جەكە حاتتارى تۋرالى جۇرتشىلىق بىلۋگە مىندەتتى مە؟» دەگەن سۇراق توڭىرەگىندەگى زاڭ داۋى 10 جىلعا سوزىلدى. مامىر ايىنىڭ سوڭىندا جوعارعى سوت حاتتاردى جاريالاۋعا كەلىسىم بەردى. الايدا, چارلز حانزادانىڭ قورعاۋشىلارى بۇل شەشىمگە كەلىسپەي, قارسى شاعىم ءتۇسىردى. دەگەنمەن, ءبىر كۇن بۇرىن اپەللياتسيالىق پالاتا شەشىمدى ءوز كۇشىندە قالدىرعان. ءچارلزدىڭ رەسمي وكىلدەرى ۇلىبريتانيا ادىلەت ورگانىنىڭ شەشىمىنە كوڭىلى تولمايتىندارىن بىلدىرگەن. ولار «قۇپيالىلىق قاعيداسى بۇزىلدى» دەگەندى العا تارتىپ وتىر. «بۇل حاتتاردىڭ جاريالانۋى چارلز حانزادانىڭ قانداي دا ءبىر سۇراقتار بويىنشا جەكە الاڭداۋشىلىق ءبىلدىرۋ قۇقىن بۇزادى», – دەپ مالىمدەدى كلارەنس-حاۋستاعى لوندون رەزيدەنتسياسىندا حانزادا وكىلدەرى. ەلامان قوڭىر. دەرەك: 24today.net. سۋرەت: telegraph.co.uk.