فوتو: ۇكىمەت, تەلەگرام
كولىك سالاسىنىڭ دەرەكتەرىنە سايكەس, 2025 جىلى قازاقستاندا 20,8 ملن جولاۋشى اۋە ارقىلى تاسىمالدانعان. اۋەجايلار جالپى 31,8 ملن ادامعا قىزمەت كورسەتكەن, ولاردىڭ ىشىندە استانا اۋەجايى – 9,2 ملن, الماتى اۋەجايى – 12 ملن جولاۋشى قابىلداعان.
2028 جىلعا دەيىن اۆياتسيا ينفراقۇرىلىمىن دامىتۋ ماقساتىندا 11 ءىرى جوبا جۇزەگە اسىرىلماق. ونىڭ ىشىندە 4 جاڭا اۋەجاي سالۋ, 2 ۇشۋ-قونۋ جولاعىن جاڭارتۋ, سونداي-اق 5 قالاداعى اۋەجاي ينفراقۇرىلىمىن مودەرنيزاتسيالاۋ كوزدەلگەن.
بيىل حالىقارالىق مارشرۋتتىق جەلىنى كەڭەيتۋ جوسپارلانىپ وتىر. ناتيجەسىندە باعىتتار سانى 115-تەن 135 مارشرۋتقا, ال ەلدەر سانى 30-عا دەيىن ارتادى.
ۇكىمەت وتىرىسىندا پرەزيدەنت تاپسىرمالارى شەڭبەرىندە قابىلدانعان شارالاردىڭ ناتيجەسىندە وتاندىق اۋە كومپانيالار ءۇشىن اۆياوتىن قۇنى تومەندەگەنى ايتىلدى. قازىرگى تاڭدا قازاقستان اۋەجايلارىندا 1 توننا اۆياوتىننىڭ باعاسى شامامەن 800 دوللار, بۇل كورسەتكىش كورشى ەلدەرمەن سالىستىرعاندا باسەكەگە قابىلەتتى.
وسى ساياساتتىڭ ناتيجەسىندە قازاقستان اۋەجايلارىنا جاڭا شەتەلدىك اۋە تاسىمالداۋشىلارى كەلە باستادى. ولاردىڭ قاتارىندا Centrum Air (وزبەكستان), Shiraq Avia (ارمەنيا), Martinair (نيدەرلاند), One Air ( ۇلىبريتانيا), Atlas Air (اقش), MNG Airlines (تۇركيا) جانە وزگە دە كومپانيالار بار.
جيىندا «KTZ Air Cargo» اق جۇك اۋە كومپانياسىنىڭ مارشرۋتتىق جەلىسىن دامىتۋ جوسپارلارى دا قارالدى. كومپانيانىڭ نەگىزگى ماقساتى – ەلدىڭ كولىك جۇيەسىنىڭ تۇراقتىلىعىن ارتتىرۋ جانە جۇك تاسىمالىنىڭ گەوگرافياسىن كەڭەيتۋ.
سونىمەن قاتار پرەمەر-مينيستر شاعىن اۆياتسيا سالاسىندا كەمشىلىكتەر بار ەكەنىن اتاپ ءوتتى. ول اۋە كەمەلەرىن ساتىپ الۋدى جانە وسى باعىتتاعى اۆياكومپانيالاردى قارجىلاندىرۋ تەتىكتەرىن جەتىلدىرۋ قاجەتتىگىن ايتتى.
كەڭەستە اۆياتسيا جانە جالپى كولىك سالاسىن تسيفرلاندىرۋ ماسەلەلەرى دە كوتەرىلدى. قازىرگى تاڭدا قازاقستاننىڭ كولىك قاتىناسى الەمنىڭ 42 ەلىمەن جۇزەگە اسىرىلادى. شەتەلدىك رۇقسات بلانكىلەرىنىڭ سانى 2022 جىلمەن سالىستىرعاندا 3 ەسە ارتقان.
راسىمدەردى جەڭىلدەتۋ ماقساتىندا رۇقسات بەرۋ جۇيەسى تولىق ەلەكتروندى فورماتقا كوشىرىلدى. سونىمەن قاتار CarGoRuqsat جۇيەسى ەنگىزىلدى, قىتايمەن شەكسىز رۇقسات الماسۋ قامتاماسىز ەتىلدى, ال بلانكىلەردىڭ 70% تسيفرلاندىرىلدى.
بيىلعى ناۋرىز ايىندا تۇركى مەملەكەتتەرى ۇيىمى ەلدەرىمەن e-Permit پيلوتتىق جوباسى ىسكە قوسىلدى, سونداي-اق حالىقارالىق تاسىمالدار ءۇشىن e-CMR جۇيەسى بويىنشا پيلوتتىق جوبا باستالدى. بۇل باستامالار راسىمدەردىڭ اشىقتىعىن ارتتىرىپ, ۋاقىت پەن اكىمشىلىك شىعىندى قىسقارتۋعا باعىتتالعان.
پرەمەر-مينيستر حالىقارالىق سەرىكتەستەرمەن بىرلەسىپ شەتەلدىك رۇقسات بلانكىلەرىن تولىق تسيفرلىق فورماتقا كوشىرۋ جۇمىستارىن جالعاستىرۋدى تاپسىردى.
«پرەزيدەنت اتاپ وتكەندەي, ترانزيت – ءبىزدىڭ ەلىمىزدىڭ باستى باسەكەلەستىك ارتىقشىلىقتارىنىڭ ءبىرى ەكەنىن ءاردايىم ايتىپ كەلەدى. دەگەنمەن, تاپسىرمالاردىڭ ورىندالۋىنا سىن-ەسكەرتپەلەر بار, تولىق قامتۋ مەن جەدەلدىك جەتىسپەيدى. مەن ديناميكانى تىكەلەي ءوزىم قاداعالايتىن بولامىن. ءبىزدىڭ مىندەتىمىز – جۇمىستىڭ بارلىق باعىتتارى بويىنشا كۇش جۇمىلدىرۋ», دەدى ولجاس بەكتەنوۆ.
وسىلايشا, اۆياتسيا سالاسىن دامىتۋ باعىتىنداعى كەشەندى شارالار قازاقستاننىڭ حالىقارالىق كولىك-ترانزيتتىك حاب رەتىندەگى پوزيتسياسىن نىعايتۋعا باعىتتالىپ وتىر.
اۋە تاسىمالىنىڭ الەۋەتى زاماناۋي اۆياتسيالىق حابقا اينالۋى كەرەك
