فوتو: middleeasteye.net
بيىل قاجىلىق ساپارى 15 مامىر مەن 5 ماۋسىم ارالىعىندا وتەدى. قمدب مالىمەتىنشە, ماۋسىم كەزىندە قاجىلاردى تاسىمالداۋ جۇمىستارىن كونكۋرستىق نەگىزدە Air Astana جانە SCAT, سونداي-اق ساۋديالىق Flyadeal اۋەكومپانيالارى جۇزەگە اسىرادى. الماتى, استانا جانە شىمكەنت قالالارىنان شىققان رەيستەر تىكەلەي دجيددا مەن ءمادينا قالالارىنا باعىتتالادى. قاجىلاردىڭ ەلگە قايتۋ ساپارى دا وسى ەكى قالادان كەزەڭ-كەزەڭىمەن جوسپارلانعان. وسىلايشا, قاجىلىق ماۋسىمىن وتانداستارىمىز ءۇشىن بارىنشا قولايلى, قاۋىپسىز جانە جوعارى دەڭگەيدە ۇيىمداستىرۋ كوزدەلىپ وتىر.
سونداي-اق جيىن بارىسىندا قاجىلاردىڭ قازاقستان اۋماعىنان ءتيىستى تۋركودپەن شىعۋى, ۆاكتسيناتسيا ماسەلەسى, قاجىلىق بارىسىندا ساۋد ارابياسىنىڭ زاڭدارىن ورىنداۋ, قازاقستاندىق كۆوتامەن شەتەل ازاماتتارىن اپارماۋ ماسەلەسى دە تالقىلاندى. اتالعان ماسەلەلەرگە قاتىستى قاجىلىقتى ۇيىمداستىرۋعا رۇقسات العان وتاندىق 14 تۋروپەراتور وكىلدەرى ۇسىنىستارى مەن سۇراقتارىن ورتاعا سالدى.
