– تولەنبەگەن نەسيە كوللەكتورلىق كومپانياعا نەمەسە سوت ورىنداۋشىسىنا وتكەندە ادامدار نە ىستەرىن بىلمەي, الاڭداپ جاتادى. ەڭ الدىمەن ءبىر نارسەنى ءتۇسىنۋ كەرەك, نەسيە كوللەكتورعا نەمەسە سوت ورىنداۋشىسىنا وتكەنمەن, بورىشكەردىڭ نەگىزگى مىندەتتەمەسى سول كۇيىندە قالادى. سوندىقتان ۇرەيلەنۋدىڭ قاجەتى جوق. ەگەر قارىز كوللەكتورلىق كومپانياعا وتسە, ولار سىزبەن بايلانىسقا شىعىپ, قارىزدى قايتارۋ ماسەلەسىن تالقىلايدى. مۇنداي جاعدايدا كوبىنە قارىزدى ءبولىپ تولەۋ نەمەسە تولەم كەستەسىن قايتا جاساۋ سياقتى ۇسىنىس بولۋى مۇمكىن. ياعني كوللەكتورلارمەن كەلىسىپ, بەلگىلى ءبىر گرافيكپەن قارىزدى جابۋعا مۇمكىندىك بار. ەگەر ەكى تاراپ كەلىسىمگە كەلسە, ماسەلە سول جەردە شەشىلۋى مۇمكىن.
ال ەگەر كوللەكتورلارمەن كەلىسىمگە كەلۋ مۇمكىن بولماسا, وندا ولار سوتقا جۇگىنۋى ىقتيمال. بۇل دا زاڭ اياسىنداعى قالىپتى ۇدەرىس. سوت قارىزدى ءوندىرۋ تۋرالى شەشىم شىعارسا, ءىس ءارى قاراي سوت ورىنداۋشىلارىنا بەرىلەدى.
سوت ورىنداۋشىسى ىسكە كىرىسكەن كەزدە ارنايى اتقارۋشىلىق ءىس جۇرگىزۋ اشىلادى. وسىدان كەيىن سوت ورىنداۋشىسىنىڭ بەلگىلى ءبىر وكىلەتتىكتەرى بار. مىسالى, ول بورىشكەردىڭ بانكتەگى شوتىن تەكسەرىپ, قاجەت بولعان جاعدايدا ونى بۇعاتتاي الادى. ياعني شوتتاعى قاراجاتتان قارىزدى ءوندىرۋ ۇدەرىسى باستالادى.
سوت ورىنداۋشىسى بورىشكەردىڭ مۇلكىنە دە شەكتەۋ قويۋعا قۇقىلى. كەي جاعدايدا قارىز سوماسىنا بايلانىستى ازاماتتىڭ شەتەلگە شىعۋىنا ۋاقىتشا تىيىم سالۋ شاراسى دا قولدانىلۋى مۇمكىن.
بىراق بۇل جەردە تاعى ءبىر ماڭىزدى نارسەنى ءتۇسىنۋ كەرەك. ەگەر ادامنىڭ اتىنا تىركەلگەن مۇلكى, بانكتە اقشاسى بولماسا, وندا سوت ورىنداۋشىسى ءوندىرىپ الاتىن ناقتى رەسۋرس بولمايدى. مۇنداي جاعدايدا ءىس جۇرگىزۋ توقتاپ قالمايدى, بىراق ءوندىرىپ الۋ مۇمكىندىگى شەكتەلەدى.
زاڭ تۇرعىسىنان قاراساق, سوت ورىنداۋشىسى قارىزدى ءوندىرىپ الۋ ماقساتىندا بارلىق زاڭدى شارانى قولدانادى. سايىپ كەلگەندە ەڭ دۇرىس جول – ماسەلەنى سوتقا جەتكىزبەي, مۇمكىندىگىنشە كەلىسىم ارقىلى شەشۋگە تىرىسۋ. قارىزدى مويىنداپ, ناقتى تولەم كەستەسىن جاساپ, بىرتىندەپ وتەۋ كوبىنە ەڭ ءتيىمدى شەشىم بولادى.
