ءۇش قۇراما اراسىندا وتكەن تۋرنيردە ءبىزدىڭ جىگىتتەر ەكىنشى ماتچتى كومور ارالدارىنا قارسى وتكىزىپ, 1.0 ەسەبىمەن باسىم ءتۇستى. 4-مينۋتتا رامازان ورازوۆ ەنشىسىنە گول جازىپ, قۇراماعا جەڭىس اكەلدى.
– بىزگە تاعى دا گول سوعاتىن مۇمكىندىك تۋدى, بىراق ونى ءمۇلت جىبەردىك. قارسىلاستاردى وسال دەۋگە استە كەلمەيدى, بىزبەن دەڭگەيلەس قۇرامالار. جاڭا ماۋسىم الدىندا تاجىريبەمىزدى شىڭداۋعا ورايلى تۋرنير بولدى, – دەيدى ۇلتتىق قۇراما ويىنشىسى ر.ورازوۆ.
ۇلتتىق قۇراما ويىنشىلارى العاشقى ماتچتا ناميبيا ۇلتتىق قۇراماسىن 2:0 ەسەبىمەن جەڭگەن بولاتىن. تارتىستى ويىندا يان ۆوروگوۆسكي 12-مينۋتتا ەسەپ اشىپ, الىبەك قاسىم 79-مينۋتتا ەنشىسىنە گول جازدى.
باس باپكەر تالعات مارۋا ۇلى ماۋسىماشار تۋرنيرگە قۇراما مۇشەلى ءتورت كوزى تۇگەل جينالعانىن, وقۋ-جاتتىعۋ جيىنى جوسپارعا ساي وتكەنىن ايتتى. افريكا قۇرلىعىنان كەلگەن قوس قۇراماعا قارسى تارتىسقا ءتۇسۋ ارتىق-كەم تۇستى باعامداۋعا تاپتىرماس مۇمكىندىك ەكەنىن جەتكىزدى.
– بۇل ەكى قۇرامانىڭ كەي ويىنشىلارى ءبىزدىڭ ىشكى بىرىنشىلىكتە وينايدى, جىگىتتەردىڭ شاما-شارقىن بىلەدى. فۋتبولشىلار وزدەرىنە جۇكتەلگەن سەنىمدى اقتاي ءبىلدى. ءبىزدىڭ باستى مەجەمىز – ۇلتتار ليگاسىندا جەڭىسكە جەتۋ. ەل چەمپيوناتى ەندى باستالدى, ءار تۋرداعى ويىندى سارالاپ, قۇراما قاتارىن تولىقتىرامىز. ماۋسىم ايىنا جوسپارلانعان جولداستىق ماتچ قارساڭىندا ۇلتتىق كوماندانىڭ قۇرامى تاعى ءبىر سارالانادى. قىركۇيەكتە ءتورت بىردەي رەسمي ماتچتىڭ جاۋاپكەرشىلىگى زور, – دەدى باس باپكەر.
بىلىكتى مامان ۇلتتىق قۇرامادا بۋىن الماسۋ كەزەڭى جۇرەتىندىكتەن تاجىريبەلى ويىنشىلار مەن جاستاردى توقايلاستىرىپ, قاتار شىڭداپ, ويىننىڭ ۇيلەسىم تابۋىنا كۇش سالىناتىنىن دا اتاپ ءوتتى.
