تالانتتى كومپوزيتوردىڭ ەسىمى ەلىمىزگە عانا ەمەس, شەت مەملەكەتتەرگە دە جاقسى تانىس. ونىڭ مۋزىكاسىندا ۇلتتىق پەن زاماناۋي ناقىش ادەمى ۇيلەسىم تاپقان. بۇگىنگە دەيىن دارىندى ونەر يەسى قانشاما سيمفونيالىق, كامەرالىق جانە حورعا ارنالعان تاماشا تۋىندى جازدى. حالىق اسپاپتارىنا ارنالعان بىرنەشە كۇيى دە بار. سونداي-اق ونىڭ شىعارمالارى «وتىراردىڭ كۇيرەۋى», «قوش, گۇلسارى», «بالالىق شاعىمنىڭ اسپانى», «شال» سەكىلدى فيلمدەردە پايدالانىلعان.
بىلتىر اقش-تا «Global Music Partnership Press» باسپاسى كومپوزيتوردىڭ جەكە سكريپكا مەن ىشەكتى
انسامبلگە ارنالعان «قاراكەمەر» كۇيىن جارىققا شىعاردى. وسىلايشا, كومپوزيتور شىعارماسى امەريكالىق باسپادا باسىلعان ەلىمىزدىڭ العاشقى وكىلى اتاندى. بۇل ونىڭ ومىرىندەگى حالىقارالىق دەڭگەيدە تانىلۋىنداعى ماڭىزدى كەزەڭگە اينالدى. سونىمەن قاتار «قاراكەمەر» كۇيى قازاقستاننىڭ نيۋ-يوركتەگى باس كونسۋلدىعىنىڭ قولداۋىمەن نيۋ-يورك قوعامدىق كىتاپحاناسىنىڭ قورىنا ەنگىزىلدى. تۋىندىنىڭ پرەمەراسى گارۆارد ۋنيۆەرسيتەتىندە, بوستونداعى بەينەلەۋ ونەرى مۋزەيىندە ءوتتى.
باس شاھاردا دۇركىرەپ وتكەن كەش – قۋات شىلدەباەۆتىڭ العاشقى شىعارماشىلىق كەشى. كونتسەرتكە حالىق كوپ جينالدى. كومپوزيتور شىعارمالارى «Saz&Soul» توبى مەن «استانا» ەسترادالىق-سيمفونيالىق وركەسترىنىڭ سۇيەمەلدەۋىمەن ورىندالدى. باعدارلاما اياسىندا كەش يەسىنىڭ «قايران كوڭىل», «ساعىم دۇنيە», «وتان انا», «جان انا», «كەشىر مەنى», «امانات», «ايالاعان ارمان-اي», «ساۋلە» اندەرى جانە تانىمال كينوفيلمدەردەن الىنعان مۋزىكالىق تۋىندىلارى تىڭدارماندى ءتانتى ەتتى. ونى قازاقستاننىڭ ەڭبەك سىڭىرگەن قايراتكەرلەرى ارداق بالاجانوۆا, رەنات عايسين, ديلناز احماديەۆا, داۋرەن سەرعازين, جانار دوعالوۆا, «ەرەن ەڭبەگى ءۇشىن» مەدالىنىڭ يەگەرى اننا ۋۆاروۆا, تالانتتى انشىلەر قايرات باەكەنوۆ, مارسەل, شابا ادەنقۇلقىزى, دارىندى قوبىزشى ولجاس قۇرمانبەك, رەسپۋبليكالىق جانە حالىقارالىق بايقاۋلاردىڭ لاۋرەاتتارى ەربول تاجىباەۆ, ديدار ابدۋحالىق, نۇراي شەرۋ, ءالي وقاپوۆ, ءمادي رىمباەۆ, گاۋحار ومىرزاقوۆا, اقمارجان قۇرمانبەك سەكىلدى ونەرپازدار ناقىشىنا كەلتىرىپ شىرقادى.
