مۇعالىمدى  مۇگەدەك  ەتكەن  وقۋشى 5 جىلعا سوتتالدى

كوكشەتاۋ قالاسى تۇرعىندارى اراسىندا ايرىقشا قوعامدىق پىكىر قالىپتاستىرعان بۇل وقيعانىڭ نۇكتەسى اقمولا وبلىسىنىڭ كامەلەتكە تولماعاندار ءىسى جونىندەگى اۋدانارالىق سوتىنىڭ قورىتىندى ماجىلىسىندە قويىلدى. قالاداعى جوعارى تەحنيكالىق مەكتەبىنىڭ وقۋشىسى ۆ. قر قىلمىستىق كودەكسىنىڭ 103-بابىنىڭ 2-ءبولىمى «ج» تارماعىمەن, بۇزاقىلىق ارەكەتى بارىسىندا ءوز ۇستازىنا اۋىر جاراقات سالعانى ءۇشىن ايىپتى دەپ تانىلدى. ءسويتىپ, ول سوت ۇكىمىمەن بەس جىلعا باس بوستاندىعىنان ايىرىلدى. ەندى وقۋشى ايىبىن جالپى رەجىمدەگى تاربيە كولونياسىندا وتەيتىن بولادى. كوكشەتاۋ قالاسى پروكۋرو­رى­نىڭ جابىرلەنۋشىنىڭ مەملە­كەت تاراپىنان ەمدەلۋ شىعىندارىنا قاتىستى تالابى وتەلدى. ال, مۇعا­لىم­گە مورالدىق نۇقسان كەلتى­رىل­گەنىنە بايلانىستى 1 ميلليون تەڭگە وتەم ءىشىنارا قانا­عاتتاندىرىلدى. بۇعان قوسا, وبلىستىق ءبىلىم باسقارماسىنىڭ اتىنا قىلمىستىق زاڭ بۇزۋشىلىقتىڭ سەبەپ-سالدارىن انىقتاپ, ءتيىستى شارا قولدانۋ جونىندە جەكە قاۋلى شىعارىلدى. سوت وقۋشىنىڭ مۇعالىمدى قاتتى سوققىعا جىققاندىعى, وسىنىڭ سالدارىنان ەدەنگە باسىمەن قۇ­لاپ, ەسىنەن تانعانىن انىقتادى. سونداي-اق, جابىرلەنۋشىنىڭ اۋىز قۋىسىنىڭ سۇيەگى جانە ەكى ءتىسى سىنىپ, ميى شايقالعان. قازىرگى كۇنى ول توسەك تارتىپ جاتىر, سول جاق دەنەسى عانا قوزعالاتىندىقتان وزگەنىڭ كومەگىنە ءماجبۇر. كيكىلجىڭ مۇعالىمنىڭ ساباق بارىسىندا ۆ-عا جاساعان ەسكەرت­پەسىنەن تۋىنداعان ەكەن. باقبەرگەن امالبەك,  «ەگەمەن قازاقستان». اقمولا وبلىسى.