پوليتسيا اتالعان ىسكە بايلانىستى تەكسەرۋ جۇرگىزىپ, اكىمشىلىك شارا قولداندى.
قۇقىق قورعاۋ ورگاندارىنىڭ مالىمەتىنشە, ەر ادامنىڭ اگرەسسيۆتى ارەكەتى بەينەلەنگەن ۆيدەوعا بايلانىستى الماتى قالالىق پوليتسيا دەپارتامەنتى مەدەۋ اۋداندىق پوليتسيا باسقارماسى تەكسەرۋ جۇرگىزگەن. وقيعاعا قاتىسۋشىلاردىڭ بارلىعى انىقتالىپ, كۇدىكتى پوليتسيا بولىمىنە جەتكىزىلگەن.
«ازامات ا.-عا قاتىستى ۇساق بۇزاقىلىق فاكتىسى بويىنشا اكىمشىلىك ءىس قوزعالدى. ونىڭ قىزدى قورقىتىپ, بالاعات سوزدەر ايتىپ, اشىق اگرەسسيا مەن قۇرمەتسىزدىك تانىتقانى انىقتالدى. ءىس ماتەريالدارى سوتقا جولدانىپ, سوت شەشىمىمەن قۇقىق بۇزۋشى 10 تاۋلىككە قاماۋعا الىندى», دەپ حابارلادى ۆەدومستۆونىڭ ءباسپاسوز قىزمەتى.
پوليتسيا وكىلدەرى قوعامدىق ءتارتىپتى بۇزۋ, اگرەسسيا كورسەتۋ جانە اينالاداعى ادامدارعا قۇرمەتسىزدىك تانىتۋ ارەكەتتەرىنە زاڭ اياسىندا ءتيىستى باعا بەرىلەتىنىن اتاپ ءوتتى.
ايتا كەتەيىك, اسقار جۇمابەك تۇسىرىلىمگە باستالۋىنا بىرنەشە مينۋت قالعاندا كەلگەن. الايدا قىزدىڭ ايتۋىنشا, ول بىردەن ەرتە قوڭىراۋ شالعانى ءۇشىن نارازىلىق بىلدىرە باستاعان. جانجال تەز ارادا اگرەسسياعا ۇلاسقان.
«ول ساعات 9:55-تە كەلىپ, مەنى «تىم ەرتە» وياتتىڭ, قوڭىراۋ شالدىڭ دەپ بىردەن اشۋلى تۇردە كىنا تاعا باستادى. مەن «باستاماڭىزشى, اسقار, ۇيىقتاپ قالىپ قويا ما دەپ قورىقتىم, ءبىرىنشى رەت ەمەس قوي» دەپ جاۋاپ بەردىم. وسى ءسوزىم ونى قاتتى اشۋلاندىردى, سوزدەن ءسوز شىعىپ, جاعداي فيزيكالىق كۇش كورسەتۋگە دەيىن جەتتى. بۇل ادامنىڭ ىسكەرلىك ەتيكاسى جوق, كومانداداعى كەز كەلگەن ادام ونىڭ اشۋلانشاقتىعىن, ورىنسىز رەاكتسيالارىن, ايقايىن, ەسىك تارسىلداتۋىن جانە بوعاۋىز سوزدەرىن راستاي الادى. مەنى قورعايتىن ەر ازاماتتار بولمادى. ماعان شىنىمەن قورقىنىشتى بولدى», دەپ جازدى قىز الەۋمەتتىك جەلىدە.
ءوز كەزەگىندە اكتەر دە ءۇنسىز قالماي, الەۋمەتتىك جەلىدەگى پاراقشاسىندا بولعان جاعدايعا قاتىستى پىكىر ءبىلدىردى.
ونىڭ ايتۋىنشا, ول اگرەسسيۆتى ارەكەتى ءۇشىن قىزدان كەشىرىم سۇراعان جانە شىنىمەن دە «اشۋعا بەرىلگەنىن» مويىنداعان. سونداي-اق ول قىزعا شابۋىل جاساۋدى كوزدەمەگەنىن, تەك اشۋ ۇستىندە زاتتارى بار چەموداندى تەۋىپ جىبەرگەنىن اتاپ ءوتتى.
