فوتو: astanatv.kz
ۇلان سايتمۇحاەۆتىڭ جۇمىس بولمەسىنە كىرگەن ساتتەن-اق قازاقى رۋح سەزىلەدى. نەگىزگى قىزمەتى – مەملەكەتتىك سالادا, اۋداننىڭ باس قازىناشىسى. قاربالاس تىرشىلىگىنە قاراماستان, ول ءوزىنىڭ سۇيىكتى ىسىنە ۋاقىت تابادى.
بوس ۋاقىتىندا تازىسىن ەرتىپ, قويان جۇگىرتىپ, تابيعات اياسىندا سەرۋەندەيدى. شەبەر ءۇشىن تۇلپارى نايمانكوزگە وتىرىپ, كەڭ دالادا ەركىن كوسىلۋ – جان تىنىشتىعىنىڭ كەپىلى. ول وسىنداي ساتتەردە بار كۇيبەڭ تىرلىكتى ۇمىتىپ, تابيعاتپەن تىلدەسكەندەي كۇي كەشەدى.
كوكشەتاۋدا قولونەر شەبەرلەرى عاجايىپ بۇيىمداردى كوپشىلىك نازارىنا ۇسىندى
ال ونىڭ شاڭىراعى ناعىز شاعىن مۋزەي ىسپەتتى. ءۇي اۋلاسىنا كىرگەن جاندى ەڭ الدىمەن ءىرى قوشقاردىڭ باسى قارسى الادى – بۇل ءۇيدىڭ سيمۆولدىق كۇزەتشىسى ىسپەتتى. ءداستۇر مەن زامان ۇندەستىگىن ساقتاعان شەبەردىڭ ايتۋىنشا, بۇل ەرەكشە جادىگەردى ول جەتىسۋ الاتاۋىنان, جاركەنت ماڭىنداعى اۋىلدان الىپ كەلگەن. بۇل ول ءۇشىن اسا قىمبات دۇنيە. قالپاقتارىن سوعان ءىلىپ قويادى ەكەن.
ءۇي ىشىندەگى قابىرعالارعا قاسقىر تەرىسى, ءارتۇرلى قامشىلار ىلىنگەن. مۇندا مۋزەيدەن عانا كورەتىن سيرەك بۇيىمدار دا بار. ۇلان بىرنەشە جىلدان بەرى قامشى ورۋمەن اينالىسىپ كەلەدى. ول ءوز قولىمەن جۇبايى مەن ءتورت قىزىنا ارنايى قامشى ءورىپ بەرگەن. الايدا شەبەردىڭ قولىنان شىققان دۇنيەلەر كوبىنە ۇيدە ساقتالمايدى, ول ولاردى قوناقتارىنا سىيعا تارتادى ەكەن.
وتباسىنداعى ونەرگە دەگەن سۇيىسپەنشىلىك بالالارىنان دا بايقالادى. شەبەردىڭ ۇل-قىزدارى جاستايىنان دومبىرا تارتىپ, ۇلتتىق ونەرگە جاقىن بولىپ ءوسىپ كەلەدى. ۇلان سايتمۇحاەۆ ءوز ونەرىنىڭ باستاۋى بالا كەزىنەن قالانعانىن ايتادى.
«بالا كۇنىمدە اكە-شەشەمدى, اتا-اجەلەرىمدى كورىپ ءوستىم. ولار قوي قىرقىپ, ءجۇن وڭدەپ, كيىز باساتىن. اعاش ويۋ, تەمىر سوعۋ – ءبارى دە ءبىزدىڭ ۇيدە بار ەدى. اقىن ولەڭدى شابىتپەن جازسا, ءبىز دە ءار بۇيىمدى سۇيىسپەنشىلىكپەن جاسايمىز. بۇل ءبىزدىڭ ءومىر فيلوسوفيامىز», دەيدى ول.
بۇگىنگى تەحنولوگيالىق داۋىردە ۇلان سايتمۇحاەۆ ۇلتتىق ءداستۇردى زامان تالابىمەن ۇيلەستىرە بىلگەن. ونىڭ ەڭ ۇلكەن ارمانى – بالالارىن ەلىن سۇيەتىن, اتا مۇراسىن ارداقتايتىن ناعىز پاتريوت ەتىپ تاربيەلەۋ.
