فوتو: ۆيدەودان الىنعان كادر
وقيعا 28 اقپاندا بەدەلدى «Fairmont The Palm» قوناقۇيىندە بولعان. عيماراتقا درون سوعىلىپ, ءورت شىققان. سالدارىنان 4 ادام زارداپ شەككەن. دەمالىستا جۇرگەن 40 جاستاعى بريتاندىق ەر ادام بولعان جاعدايدى ۇيالى تەلەفونىنا ءتۇسىرىپ العان.
ول ۆيدەولاردى جاريالاماعان, تەك تۋىستارىنا جەكە حابارلاما ارقىلى جىبەرىپ, ءوزىنىڭ امان ەكەنىن جەتكىزگىسى كەلگەن. الايدا 10 كۇننەن كەيىن, 9 ناۋرىزدا تۋريست پەن ونىڭ اكەسى ۇستالعان. باستاپقىدا «ەكى ساعاتتىق سۇراق-جاۋاپ» دەپ جوسپارلانعان تەكسەرۋ بەلگىسىز مەرزىمگە سوزىلعان.
«Detained in Dubai» ۇيىمىنىڭ جەتەكشىسى رادحا ستيرلينگتىڭ ايتۋىنشا, ۇستالعانداردىڭ وتباسى ولاردىڭ جاعدايىنا الاڭداۋلى.
«ەشقانداي قاساقانا ارەكەت بولعان جوق. سوعان قاراماستان زاڭ بويىنشا ولاردى بەلگىسىز ۋاقىتقا دەيىن ۇستاۋى مۇمكىن», دەدى ول.
قۇقىق قورعاۋشىنىڭ مالىمەتىنشە, كۇدىكتىلەر قازىر تولىق وقشاۋلاۋدا وتىر – ادۆوكاتپەن, تۋىستارىمەن نەمەسە ەلشىلىك وكىلدەرىمەن بايلانىسقا شىعۋ مۇمكىندىگى جوق. تۋريست ءوز ارەكەتى ءۇشىن كەشىرىم سۇراپ, بولعان جايتقا وكىنەتىنىن بىلدىرگەن.
ءباا زاڭدارى قاتاڭداتىلعان
سوڭعى ۋاقىتتا درون شابۋىلدارىنان كەيىن دۋباي بيلىگى وقيعالارعا قاتىستى فوتو جانە ۆيدەو تاراتۋعا باقىلاۋدى كۇشەيتكەن. پوليتسيا «ۇرەي تۋدىراتىن نەمەسە جالعان اقپارات تاراتۋ» زاڭمەن جازالاناتىنىن ەسكەرتكەن.
قۇقىق قورعاۋشىلاردىڭ ايتۋىنشا, سوڭعى اپتالاردا ونداعان ادام ۇستالعان. كۇشتىك قۇرىلىم وكىلدەرى كوشەدە ازاماتتاردىڭ تەلەفونىن تەكسەرىپ, كۇماندى جازبالاردى ءوشىرىپ جاتىر. ءتىپتى وقيعا ورنىندا بولعان ادامداردىڭ ءوزى كۇدىككە ءىلىنىپ وتىر.
باق مالىمەتىنشە, كەيبىر ازاماتتار جاريالانباعان ماتەريالدار ءۇشىن دە جاۋاپقا تارتىلعان. زاڭ بۇزعاندارعا ەكى جىلعا دەيىن باس بوستاندىعىنان ايىرۋ جانە ءىرى كولەمدە ايىپپۇل سالۋ قاراستىرىلعان.
تۋريستەر نەنى ەسكەرۋى ءتيىس؟
ساراپشىلاردىڭ پىكىرىنشە, قاۋىپسىزدىككە قاتىستى كەز كەلگەن فوتو نەمەسە ۆيدەونى, ءتىپتى جەكە حات ارقىلى جىبەرۋدىڭ ءوزى سالدارعا اكەلۋى مۇمكىن. شەكتەۋ تەك بلوگەرلەرگە ەمەس, قاراپايىم تۋريستەرگە دە قاتىستى.
ماماندار مۇنداي جاعدايدا ءتۇسىرىلىم جاساماۋعا جانە ەشقانداي ماتەريال تاراتپاۋعا كەڭەس بەرەدى. سونىمەن قاتار تەك رەسمي اقپاراتقا سۇيەنىپ, جەرگىلىكتى بيلىك تالاپتارىن قاتاڭ ساقتاۋ قاجەت.
قازاقستاندىق اۋە كومپانياسى دۋبايعا رەيستەردى 19 ساۋىرگە دەيىن توقتاتتى
