تۇركىستان وبلىسى اكىمدىگىنىڭ قولداۋىمەن وتكەن ەكسپەديتسيا شىمكەنت قالاسىنان باستاۋ الىپ, الدىمەن يبراگيم اتا, قاراشاش انا, بيبىعياس انا كەسەنەلەرىنە زيارات ەتۋدەن باستالدى. سايرام اۋدانىندا جالعاسقان ءىس-شارا بارىسىندا نانجەمەستىڭ كوتەرگەن سيمۆولدىق بالۋان تاسى زەرتتەلىپ, ونىڭ تاريحي-مادەني ءمانى زەردەلەندى.
ساپار اياسىندا ەكسپەديتسيا مۇشەلەرى وڭىردەگى ءوندىرىس ورىندارىن دا ارالادى. سونىڭ ىشىندە «GenGroup Qazaqstan» جشس-نىڭ بانان پلانتاتسياسىنا بارىپ, كاسىپورىن جۇمىسىمەن تانىستى.
ودان ءارى جول ورداباسى اۋدانىندا جالعاسىن تاۋىپ, قاجىمۇقان مۇڭايتپاس ۇلى كەسەنەسىنە زيارات جاسالدى. پالۋان بابانىڭ ۇرپاقتارىنىڭ قولىندا ساقتالعان جادىگەرلەر زەرتتەۋ نىسانىنا اينالدى. اتاپ ايتقاندا, قاجىمۇقاننىڭ ارباسىنىڭ بەل تەمىرى, وجاۋى, سۋ قۇياتىن ىدىسى, سىرنايى مەن شابادانى كوپشىلىك نازارىن اۋداردى. ەكسپەديتسيا مۇشەلەرى پالۋان اۋلەتىنىڭ وكىلدەرىنەن بۇرىن بەيمالىم بولعان دەرەكتەردى جازىپ الدى.
سونداي-اق قاتىسۋشىلار جاڭعىرتىلعان قاجىمۇقان اتىنداعى وبلىستىق سپورت مۋزەيىنە بارىپ, وندا ساقتالعان سەگىز بالۋان تاستىڭ تاريحىمەن تانىستى. مۋزەيدە جەرگىلىكتى زيالى قاۋىم مەن سپورتشىلاردىڭ قاتىسۋىمەن «كۇش لەكتسياسى» ۇيىمداستىرىلىپ, ۇلى دالانىڭ كۇش مادەنيەتى مەن باتىر-بالۋانداردىڭ تاريحي ساباقتاستىعى ءسوز بولدى.
وسى جيىندا ءوڭىردىڭ بەلگىلى قالامگەرلەرى اسان تۇراباەۆ پەن ىلەسحان بايجانوۆقا ۇلت رۋحانياتىنا قوسقان ۇلەسى ءۇشىن «بالۋان تاس» توسبەلگىلەرى تابىستالىپ, «رۋحاني پالۋان» اتاعى بەرىلدى. جوبا جەتەكشىسى ابىلايحان قالنازاروۆ بالۋاندىق ۇعىمىنىڭ مانىنە توقتالىپ: «بالۋاندىق تەك قانا قارا كۇشپەن ولشەنبەيدى. ونىڭ رۋحاني جانە قايراتكەرلىك قاباتتارى بار. بالۋان تاس تا تەك قانا فيزيكالىق تۇردە كوتەرىلمەيدى. ول دا تۇتاس ءبىر فيلوسوفيا بولعاندىقتان, باسقا دا سالالاردا سيمۆولدىق تۇرعىدا كوتەرىلە بەرەدى. ەكى اعامىزدىڭ اتقارعان ءىسى جۇزدەگەن ادام جۇمىس ىستەيتىن ۇلكەن زەرتتەۋ ينستيتۋتتارىنا بەرگىسىز.
« ۇلىلاردىڭ باعاسىن حالىق بەرگەنىمەن, سىيىن جەكە ەرلەر بەرەدى» دەگەن بار. بىزدىكى سوعان يشارا», دەدى.
ءبىرىنشى كۇننىڭ قورىتىندىسى بويىنشا «قازاق كۇشىنىڭ كارتاسىنا» ءبىر سيمۆولدىق جانە سەگىز زاتتىق بالۋان تاس جەكە نىسان رەتىندە ەنگىزىلىپ, ولاردىڭ تولىق سيپاتتاماسى اقپاراتتىق بازاعا تىركەلدى.
ايتا كەتەيىك, ەكسپەديتسيا 21 ناۋرىزعا دەيىن جالعاسادى. الداعى كۇندەرى بايدىبەك, سوزاق, وتىرار, ساۋران اۋداندارى مەن تۇركىستان قالاسىندا زەرتتەۋ جۇمىستارى جۇرگىزىلەدى. جوبانى «Baluan tas» ۇلتتىق سپورت تۇرلەرى جانە مادەنيەتى اكادەمياسى ۇيىمداستىرىپ وتىر.
ساپار قۇرامىنا ارنايى جاساقتالعان جۋرناليستەر مەن بلوگەرلەر توبى, عالىمدار مەن سپورتشىلار ەنگەن. ولاردىڭ قاتارىندا زەيىن الىپبەك باستاعان مەديا وكىلدەرى, سەرىك ەرعالي جەتەكشىلىك ەتەتىن عالىمدار شوعىرى جانە ايگىلى بالۋان ارمان سۇلەيمەن بار.
ەسكە سالا كەتەيىك, «قازاق كۇشىنىڭ كارتاسى» جوباسىنىڭ تۇساۋى وتكەن جىلى ناۋرىز مەرەكەسىندە ەلوردادا كەسىلگەن ەدى. بۇعان دەيىن اقتوبە جانە پاۆلودار وبلىستارىندا ۇيىمداستىرىلعان ەكسپەديتسيالار ناتيجەسىندە العاشقى عىلىمي-مادەني دەرەكتەر جيناقتالعان. تۇركىستان باعىتىنداعى بۇل ساپار جوبانىڭ رۋحاني-تاريحي تۇرعىدان ماڭىزدى كەزەڭدەرىنىڭ ءبىرى سانالادى. سونىمەن قاتار ءىس-شارا ناۋرىز مەيرامى مەن تۇركىستاندا وتەتىن كوكپاردان الەم چەمپيوناتىنا ورايلاستىرىلعان.
جوبانىڭ باستى ماقساتى – قازاقتىڭ ءداستۇرلى كۇش مادەنيەتىن كەشەندى زەرتتەۋ, بالۋان تاستاردى ۇلتتىق مۇرا رەتىندە جۇيەلەۋ جانە ولاردى زاماناۋي مادەني اينالىمعا ەنگىزۋ ارقىلى ۇلتتىق بىرەگەيلىكتى نىعايتۋ.
