فوتو: اشىق دەرەككوز
مەدياتسيا – بۇل داۋ-جانجالدى سوتقا جەتكىزبەي, بەيتاراپ ءۇشىنشى تاراپتىڭ (مەدياتوردىڭ) كومەگىمەن ءوزارا كەلىسىم ارقىلى شەشۋ ءتاسىلى. ونىڭ باستى قاعيداتى – تاراپتاردىڭ ەرىكتىلىگى, تەڭدىگى جانە قۇپيالىلىقتى ساقتاۋ. مەدياتسيا بارىسىندا ءار تاراپ ءوز ۇستانىمىن اشىق ايتىپ, ورتاق شەشىمگە كەلۋگە مۇمكىندىك الادى. بۇل ءادىس تەك داۋدى شەشىپ قانا قويماي, قاتىسۋشىلار اراسىنداعى ءوزارا تۇسىنىستىكتى نىعايتىپ, بولاشاقتاعى جانجالداردىڭ الدىن الۋعا ىقپال ەتەدى.
وقۋ-اعارتۋ مينيسترلىگىنىڭ مالىمەتىنشە, جاڭا قىزمەت بالالار, ستۋدەنتتەر, پەداگوگتەر مەن اتا-انالار اراسىنداعى تۇسىنىسپەۋشىلىكتەردى رەتتەۋگە كومەكتەسەدى. بالاباقشالاردا مەدياتسيا تاربيەشىلەر مەن اتا-انالارعا بالالار اراسىنداعى داۋلى جاعدايلاردى بىرلەسىپ تالداۋعا مۇمكىندىك بەرەدى. سونىڭ ناتيجەسىندە بۇلدىرشىندەر ەرتە جاستان قارىم-قاتىناس مادەنيەتىن مەڭگەرىپ, بولىسە ءبىلۋ, كەلىسۋ جانە جانجالدى ۋشىقتىرماي شەشۋ داعدىلارىن قالىپتاستىرادى.
مەدياتسيا مادەنيەتى: قوعامداعى تاتۋلىقتى نىعايتاتىن تەتىككە اينالدى
ال كوللەدجدەردە مەدياتسيا قىزمەتى ستۋدەنتتەر اراسىنداعى كەلىسپەۋشىلىكتەردى رەتتەپ, قورقىتۋ مەن قىسىم كورسەتۋ جاعدايلارىن بولدىرماۋعا ىقپال ەتەدى. بۇل ءوز كەزەگىندە ءبىلىم الۋشىلار اراسىنداعى جانجال سانىن ازايتىپ, وقۋ ورنىنداعى پسيحولوگيالىق احۋالدى جاقسارتۋعا جول اشادى.
جۇمىستىڭ بىرىزدىلىگىن قامتاماسىز ەتۋ ءۇشىن ى.التىنسارين اتىنداعى ۇلتتىق ءبىلىم اكادەمياسى ازىرلەگەن ادىستەمەلىك ۇسىنىمدار مەن ارنايى ەرەجە قولدانىلادى. قۇجاتتاردا داۋلاردى شەشۋ مەن اگرەسسيانىڭ الدىن الۋعا ارنالعان ناقتى پراكتيكالىق تەتىكتەر قامتىلعان.
مەدياتسيا قىزمەتىنىڭ قۇرامىنا ديرەكتوردىڭ تاربيە ءىسى جونىندەگى ورىنباسارى, پەداگوگتەر, پەداگوگ-پسيحولوگتار, الەۋمەتتىك پەداگوگتەر, اتا-انالار, قوعام وكىلدەرى جانە جاس ەرەكشەلىگىنە قاراي بالالاردىڭ وزدەرى دە كىرەدى.
ايتا كەتەيىك, بۇعان دەيىن مۇنداي قىزمەت مەكتەپتەردە «100 مەدياتيۆتى مەكتەپ» جوباسى اياسىندا ەنگىزىلگەن ەدى. جوبا تاجىريبەسى جانجالداردىڭ الدىن الۋدا جانە وقۋشىلار اراسىنداعى پسيحولوگيالىق احۋالدى جاقسارتۋدا تيىمدىلىگىن كورسەتكەن.
