ءماجىلىس قاراۋىنا ۇسىنىلعان «قازاقستان رەسپۋبليكاسىنىڭ مەملەكەتتىك قىزمەتى تۋرالى» زاڭ جوباسىنىڭ جاڭا رەداكتسياسى مەملەكەت باسشىسىنىڭ تاپسىرمالارىن ىسكە اسىرۋ اياسىندا ازىرلەنگەن. نەگىزگى ماقسات – سەرۆيستىك جانە ازاماتقا باعىتتالعان قاعيداتتارعا سۇيەنەتىن زاماناۋي مەملەكەتتىك قىزمەت مودەلىنە كوشۋ.
جاڭا قۇجاتتا مەملەكەتتىك قىزمەتشىلەرگە قويىلاتىن تالاپتار ناقتىلانعان. ولاردىڭ قاتارىندا پاتريوتيزم, كاسىبيلىك, اشىقتىق, ادەپتىلىك, ءمىنسىز بەدەل, قۇقىقبۇزۋشىلىقتارعا جانە مۇددەلەر قاقتىعىسىنا توزبەۋشىلىك سياقتى قاعيداتتار بار.
جاڭا كونستيتۋتسيا ازاماتتاردىڭ دەربەس دەرەكتەرىن قالاي قورعايدى؟
مەملەكەتتىك اپپاراتتى كاسىبيلەندىرۋ ءۇشىن بىرقاتار تەتىكتەر ەنگىزىلمەك. اتاپ ايتقاندا, تومەنگى جانە باسشىلىق لاۋازىمدارعا كادر دايارلاۋعا ارنالعان ارنايى ينستيتۋت قۇرىلادى. تالىمگەرلىك جۇيەسى كۇشەيتىلىپ, قۇقىقبۇزۋشىلىقتاردىڭ الدىن الۋعا باعىتتالعان جاڭا قىزمەت ىسكە قوسىلادى. بۇل قۇرىلىم تارتىپتىك كوميسسيا جۇمىسىن ۇيلەستىرىپ, قىزمەت ادەبىنىڭ ساقتالۋىن باقىلاپ, مەملەكەتتىك قىزمەتشىلەرگە قاتىستى شاعىمداردى قارايدى جانە ولاردىڭ مۇددەلەرىن سوتتا قورعايدى.
سونىمەن قاتار HR-پروتسەستەر تولىق تسيفرلاندىرىلماق. مەملەكەتتىك قىزمەتكە ىرىكتەۋ, بوس ورىن تاڭداۋ, ءوتىنىش بەرۋ جانە قىزمەتكە تاعايىنداۋ كەزەڭدەرى تۇگەلدەي «E-قىزمەت» اقپاراتتىق جۇيەسى ارقىلى جۇزەگە اسادى. بۇل جۇيە تەك مەملەكەتتىك قىزمەتشىلەردى عانا ەمەس, مەملەكەتتىك زاڭدى تۇلعالارداعى باسقارۋشى لاۋازىمدارعا ۇمىتكەرلەردى دە قامتيدى.
زاڭ جوباسىندا مەملەكەتتىك قىزمەتشىلەردىڭ الەۋمەتتىك كەپىلدىكتەرىن كۇشەيتۋگە دە باسىمدىق بەرىلگەن. جالاقىنى كەمىندە ءۇش جىلدا ءبىر رەت يندەكستەۋ ەنگىزىلەدى. سونداي-اق ۇستەمە جۇمىسقا, دەمالىس جانە مەرەكە كۇندەرىندەگى ەڭبەككە وتەماقى تولەۋ قاراستىرىلعان. قىزمەت ءوتىلى 25 جىلدان اسقان جانە مەملەكەتتىك نەمەسە ۆەدومستۆولىق ناگرادالارى بار قىزمەتشىلەر زەينەتكە شىققاندا ءتورت لاۋازىمدىق جالاقى كولەمىندە بىرجولعى سىياقى الادى.
قىزمەتتىك اۋىس-ءتۇيىس كەزىندە دە قولداۋ شارالارى كۇشەيتىلەدى. ءبىر ەلدى مەكەننەن ەكىنشىسىنە كوشكەن جاعدايدا كوتەرمە جاردەماقى مەن م ۇلىك تاسىمالىنا وتەماقى تولەنەدى. سونىمەن قاتار قىزمەتشىلەردىڭ بالالارى بالاباقشاعا كەزەكسىز قابىلدانادى جانە جەڭىلدەتىلگەن تۇرعىن ءۇي باعدارلامالارىنا قاتىسۋ مۇمكىندىگى بەرىلەدى.
ادىلەت ءمينيسترى: 5 دەربەس كونستيتۋتسيالىق زاڭدى ازىرلەۋ باستالدى
جالپى, جاڭا زاڭ جوباسى مەملەكەتتىك قىزمەتتىڭ تارتىمدىلىعىن ارتتىرىپ, بىلىكتى كادرلاردى تارتۋ مەن ۇستاپ قالۋعا باعىتتالعان.
