قاۋىپسىزدىك كەڭەسى جانىنداعى ساراپتامالىق كەڭەستىڭ وتىرىسى ءوتتى

استانا. 14 تامىز. اقوردادا قاۋىپسىزدىك كەڭەسى جانىنداعى ساراپتامالىق كەڭەستىڭ وتىرىسى ءوتتى. بۇل تۋرالى egemen.kz ءتىلشىسى حابارلادى. جۇمىس بارىسىندا الەمدىك ەكونوميكاداعى احۋال مەن ينتەگراتسيالىق ۇدەرىستەر اياسىندا ۇلتتىق مۇددەلەردى قورعاۋ ماسەلەلەرى قاراستىرىلدى. وتىرىسقا مەملەكەتتىك ورگاندار, بيزنەس قاۋىمداستىقتارى جانە «اتامەكەن» ۇكپ باسشىلارى, جەتەكشى وتاندىق ساراپشىلار مەن عالىمدار قاتىستى. ءسوز سويلەۋشىلەر وڭىرلىك ەكونوميكانى دامىتۋ, ەۋرازيالىق ەكونوميكالىق وداق اياسىنداعى ىقپالداستىق, قازاقستاننىڭ دۇنيەجۇزىلىك ساۋدا ۇيىمىنا كىرۋى ەل الدىنا ءتۇرلى سالالاردا ۇلتتىق مۇددەلەردى قورعاۋ جانە جۇزەگە اسىرۋ جونىندە جاڭا مىندەتتەر قوياتىنىن اتاپ ءوتتى. پرەزيدەنتتىڭ كومەكشىسى – قاۋىپسىزدىك كەڭەسىنىڭ حاتشىسى ن.ەرمەكباەۆ ساراپشىلار مەن بيزنەس قاۋىمداستىقتارىنىڭ ۇسىنىمدارىن ەسكەرە وتىرىپ, جاۋاپتى مەملەكەتتىك ورگاندارعا ەكونوميكالىق جانە ىقپالداستىق ۇدەرىستەردى جان-جاقتى تالداۋ جانە ولاردىڭ بارلىق ىقتيمال سالدارى مەن قاتەرلەرىنە بولجام جاساۋ قاجەتتىگىن اتاپ ءوتتى. جۇمىس قورىتىندىسى بويىنشا قازاقستاننىڭ ىقپالداستىق بىرلەستىكتەرىنە قاتىسۋىنىڭ تيىمدىلىگىن ارتتىرۋ جونىندە ناقتى ۇسىنىستار ەنگىزىلدى. ساراپتامالىق كەڭەستىڭ ۇسىنىمدارى قاۋىپسىزدىك كەڭەسى جۇمىسىندا جانە مەملەكەت باسشىسىنىڭ توراعالىعىمەن وتەتىن قاۋىپسىزدىك كەڭەسىنىڭ وتىرىستارىن دايىنداۋ بارىسىندا پايدالانىلاتىن بولادى. ايدار ورىسباەۆ. دەرەك, سۋرەت: akorda.kz.