كەشە مەملەكەت باسشىسى نۇرسۇلتان نازارباەۆ الاتاۋدىڭ باۋرايىنداعى اسەم قالا الماتىداعى تابيعاتتى وزىنە جاقىنداتىپ, ورماندى, باۋ-باقشالى ەتىپ جاسالعان قازاقستان رەسپۋبليكاسىنىڭ تۇڭعىش پرەزيدەنتى اتىنداعى ساياباقتى ارالاپ كورىپ, جۋىردا عانا اشىلعان شاھارداعى ەڭ ءىرى ءارى بيىك سۋبۇرقاقتى تاماشالادى.
ەستەرىڭىزدە بولسا, وسىدان بىرنەشە جىل بۇرىن ەلباسىنىڭ باستاماسىمەن ارۋ قالا الماتىنىڭ عاجايىپ تابيعاتىنا, كوركىنە كورىك قوسقان, قالاداعى ەڭ اسەم دەمالىس ورىندارىنىڭ ءبىرى بولىپ تابىلاتىن دەندروساياباقتىڭ ىرگەتاسى قالانىپ, بىرنەشە كەزەڭدەرمەن ىسكە اسىرىلعان بولاتىن. ءبىر ايتا كەتەرلىگى, وسىدان ءبىر اي بۇرىن الماتى قالاسى ءماسليحاتىنىڭ كەزەكتى سەسسياسىندا الماتىلىقتار مەن قالا قوناقتارىنىڭ دەمالىس ورنىنا, كوز قۋانىشىنا اينالىپ ۇلگەرگەن بۇرىنعى ءال-فارابي داڭعىلى مەن دۋلاتي كوشەسىنىڭ قيىلىسىنداعى ەڭ كوركەم دەندروساياباققا تۇڭعىش پرەزيدەنتتىڭ ەسىمى بەرىلگەن-ءدى.
جۋىردا ارقا توسىندەگى باس قالامىز – استانا كۇنىنە وراي ساياباقتىڭ كوز تارتقان جاڭا كەلبەتىن ودان بەتەر اجارلاندىرعان بيىكتىگى 21 مەترگە جۋىق جاڭا سۋبۇرقاق اتقىلاپ, قالا جۇرتشىلىعى كوزايىم بولدى. بۇل كۇڭگەيدەگى باس قالامىزداعى ەڭ ءىرى سۋبۇرقاقتىڭ جالپى سۋ سىيىمدىلىعى 2820 تەكشە مەتر, ديامەترى 52 مەتر, 8 سورعى توپتاماسىنان جانە ءتۇرلى جارىقتاندىرعىشتاردان قۇرالعان. اسىرەسە, الۋان ءتۇستى, سۋدى سازدى اۋەنمەن ءتۇرلى فورمادا سان قۇبىلتىپ تۇراتىن سۋبۇرقاق كىمدى بولسا دا قىزىقتىرارى حاق.
الماتى قالاسىنىڭ باس ساۋلەتشىسى سايران فازىلوۆ مەملەكەت باسشىسىنا ساياباقتىڭ ماكەتىن كورسەتىپ, اۋماعى 73 گەكتاردان استام جەردى الىپ جاتقانىنان, ونداعى وتىرعىزىلعان 8 مىڭ الۋان ءتۇرلى اعاشتىڭ جاسى ون جىل شاماسىندا ەكەندىگىنەن حاباردار ەتتى. ءوز كەزەگىندە مەملەكەت باسشىسى ساياباقتىڭ اۋماعىنداعى الداعى ۋاقىتتا اتقارىلاتىن جوسپارلارمەن تانىستى. سونداي-اق, ساياباق اۋماعىندا گولف-الاڭىن ورنالاستىرۋ مۇمكىندىگىن قاراستىرۋدى, دەمالىس ورنىن ودان ءارى ساۋلەتتەندىرۋدى تاپسىردى.
گۇلزەينەپ سادىرقىزى, سۋرەتتەردى تۇسىرگەندەر س.بوندارەنكو, ب.وتارباەۆ.
