پرەزيدەنت جيىندا بۇل كۇننىڭ تاريحي ماڭىزىنا ەرەكشە توقتالدى.
«بۇگىن بارشاڭىز تاريحىمىزداعى اسا ماڭىزدى, ءمان-ماعىناسى ايرىقشا, ەل ومىرىندە وشپەس ءىز قالدىراتىن وقيعانىڭ كۋاسى بولدىڭىزدار. مەن مەملەكەت باسشىسى رەتىندە بۇكىل حالىق اتىنان اتا زاڭىمىزعا قول قويدىم. سونىمەن قاتار كونستيتۋتسيانى ىسكە اسىرۋ جونىندەگى شارالار تۋرالى جارلىققا قول قويىلدى.
ەندى حالىق كونستيتۋتسياسى 1 شىلدەدەن باستاپ رەسمي تۇردە ءوز كۇشىنە ەنەدى. ال كونستيتۋتسيا كۇنىن مەملەكەتتىك مەرەكە رەتىندە ۇلتتىق دەڭگەيدە جىل سايىن 15 ناۋرىزدا اتاپ وتەتىن بولدىق. ەلىمىزدىڭ بارشا حالقىنا اتا زاڭىمىز قۇتتى بولسىن دەگىم كەلەدى!» دەدى قاسىم-جومارت توقاەۆ.
ايتا كەتەيىك, جاڭا كونستيتۋتسيا جوباسى بويىنشا رەسپۋبليكالىق رەفەرەندۋمنىڭ قورىتىندىسىن ورتالىق رەفەرەندۋم كوميسسياسىنىڭ توراعاسى نۇرلان ءابدىروۆ جاريالاعان بولاتىن.
سالتاناتتى جيىنعا ەلدىڭ ساياسي جانە مەملەكەتتىك باسقارۋ جۇيەسىنىڭ وكىلدەرى, ۇكىمەت مۇشەلەرى مەن ءوڭىر باسشىلارى قاتىستى.
مەملەكەت باسشىسىنا رەسپۋبليكالىق رەفەرەندۋم ناتيجەسىنە وراي قۇتتىقتاۋ جەدەلحاتتارى كەلىپ ءتۇستى
پرەزيدەنت قول قويعان قۇجات ەلدىڭ قۇقىقتىق نەگىزىن جاڭعىرتىپ, مەملەكەتتىك باسقارۋ جۇيەسىن جەتىلدىرۋگە باعىتتالعان. جاڭا اتا زاڭنىڭ كۇشىنە ەنۋى قازاقستاننىڭ ساياسي دامۋىنىڭ جاڭا كەزەڭىن ايقىندايدى.
